Read Ntcham 1 Corinthiens 14 Bible Online

1 Corinthiens 14 - Ntcham bible

1 Corinthiens 14

¹An puee ní péé péé kí nyàab̀ dineendi, kí nyàab̀ dipɔl din Unimbɔti Fam pūǹee, cilinjee: nyàab̀maan Unimbɔti nyɔɔbundi nàatitam pɔl.

²Un sòoǹ isooncaanee kaa bíi sòoǹ nì binib, u sòoǹ nì Unimbɔti ní, kun puee binib kaa gbìl̀ tin u sòoǹee taapu. Unimbɔti Fam pɔŋŋu di yàntī u sòoǹ tin bí dibalinee.

³Ama un fòol̄ Unimbɔti cee tibɔti ki nàatēe sòoǹ nì binib ní, ní bi-nimbɔtinóotam mɔ̀tīi cá nyɔkɔpu ki tìì-bi kunyannyaau ki sɔ̀ŋkī bi-pɔbiliŋ.

⁴Un sòoǹ isooncaanee, úǹ baba ní an tútúǹ, ama un fòol̄ Unimbɔti cee tibɔti ki nàatēe tútúǹ Kriisitoo nikitil kɔkɔ dí cù nyɔkɔpu ní.

⁵M là báà ŋma ń nīn sòoǹ isooncaan, ama tin m baasii nyàab̀ ní nīn cááyee di sá ní nīn fòol̄ Unimbɔti cee tibɔti ki nàatī. Di sá un fòol̄ Unimbɔti cee tibɔti ki nàatēe jítiǹ un sòoǹ isooncaanee, asee ubɔ yaa bí ki ŋūǹ kí nàatī isooncaan taapu án tūtuǹ báà ŋma ń cù nyɔkɔpu baba.

⁶Nnabiyaamu, tí dū tibɔti nee kí ŋmàntī: tí lì yii m dɔ́miń ni-cee ní ki bí ki sòoǹ nì ni isooncaan in naa gbìl̀ee. Tin m sòoǹee yaa kaa kútì-ni tiba, àá kaa cántì, àá naa béè tiba poon, àá naa gbìl̄ Unimbɔti nín tīī dinyɔɔbundi diŋyee, àá kaa fōō didàkal diba poonee, mana ní án làá tūtuǹ-ni?

⁷Tí tí dū kí ŋmàntī nì tigbiŋgbiiliwan diwul àá kubeeu. Tiwanee liitil siim yaa kaa nyēē u-ba u-bee, mana ní bi ŋūǹ kí gàntī kí béé yii diwul di sūǹ nee, àá kubeeu di sūǹ nee?

⁸Ukantámbunli yaa kaa búń dijanjakantándi ki cántì, mana ní bin kíǹee làá béé kí bɔ́ntí kujaau?

⁹Míǹ mbaantiim, ni yaa bíi sòoǹ isoon in baa gbìl̀ee, bi làá ŋá mana ní kí gbìl̄ taapu? Mimmee ni sòoǹ ki féeń dee.

¹⁰M nyí yii isoon nín bí i-ba i-ba puee wīikí duulinya poon, ama isoon iba kpá kaa cáá taapu.

¹¹Ama, ubɔ yaa bíi sòoǹ nì mi isooncaanee, udaan sá man cee unicaan ní ma mun sá úǹ cee unicaan.

¹²Kii ni nín bí ki nyàab̀ Unimbɔti Fam pɔl puee, ní nyàab̀ din làá yàntī Kriisitoo nikitil ń cù nyɔkɔpu nnimbɔtisan poonee tikpil.

¹³An puee un sòoǹ isooncaanee ń mèè Unimbɔti ń pɔ̄-u ŋŋmam ú nīn nàatī tin u sòoǹee taapu.

¹⁴Di sá yii m yaa bíi mèé nì isooncaanee, an sá m-fam di mèé, ní m-landɔkɔŋu kaa bíi ŋáań diba.

¹⁵Mimmee, an máaǹ ḿ mèè mana? M làá mèè nì m-fam ní kí mèè nì m-landɔkɔŋu mun binib ń gbìl̄ taapu, kí gāā ilan nì m-fam ní kí tí dū m-landɔkɔŋu kí gāā binib ń gbìl̄ taapu.

¹⁶M yaa bíi mèé ki pàkà Unimbɔti nì ŋfamin ŋmaniŋma, mana ní ubɔ un kaa gbìl̀ taapuee ŋūǹ kí kíí yii «Ameeni», ŋyunti ŋun ní waa gbìl̀ tin a sòoǹee taapuee?

¹⁷Tiŋman a-wimmeem gbanti bàà ŋān̄, ama an kaa tútúǹ a-juti.

¹⁸M jáaḿ Unimbɔti, di sá yii m sòoǹ isooncaan ki jítiǹ ni-kɔkɔ.

¹⁹Ama Kriisitoo nikitil kansikinee, an yaa sá anyɔɔbun aŋmoo ní ḿ sòoǹ binib ń gbìl̄ taapu án tūtuǹ-bee, m néeń míǹ ki jítiǹ ḿ sòoǹ isooncaan poon anyɔɔbun kutukub saalaa.

²⁰Nnabiyaamu, ní taa nín̄ dàkafī kii mbiyaamu nín dàkafī puee, nín̄ cáámaan binicikitikaabi landɔkɔŋu. Ama ikpiti jandi púee, ní nīn bí kii mbiyaawaamuee kí taa nín̄ ŋáań ikpiti.

²¹An ŋmàn̄ Unimbɔti gbɔŋku poon yii: ti-Dindaan lī yii: «M làá dāá dī binicambi biba pu ní bí sòoǹ nì m-samaau nee inicansoon, ama nì míǹ kɔkɔee, baa làá pīlifiǹ-mi[49].»

²²An puee Unimbɔti Fam nín tìì isooncaan iŋyee sá Unimbɔti daaŋku kubɔ ní ki tīī bin kaa nóó Yeesuee, an kaa sá ki tīī bin nóó Yeesuee. Ama kí fōō tibɔti Unimbɔti cee kí dūú nàatēe di sá Unimbɔti daaŋku ki tīī bin nóó Yeesuee, ní kaa sá ki tīī bin kaa nyí Yeesuee.

²³An yaa sá yii Kriisitoo nikitil kɔkɔ yaa kpáfì kí jāam̀ Unimbɔti ní báà ŋma bí ki sòoǹ isooncaanee, un kaa nyí Yeesuee àá un pée kóoń kí pīlifèe yaa gbìl̄ ni nín sòoǹ miŋyee, waa yíì-ni biwaatiibaaa?

²⁴Ama ni-kɔkɔ yaa bí ki fòol̄ Unimbɔti cee tibɔti ki nàatēe, án làá gbēē un kaa nyí Unimbɔtee àá un pée kóoń kí pīlifèe pɔbil ní ú béé yii u sá ukpiti, kun puee u gbìl̄ tin ni sòoǹee taapu,

²⁵ní ki wál̀ u-landɔkɔi in bál̀ u-pɔbilinee. Niinee ní ú tātìi dòon̄ dicincibil Unimbɔti nimbiin nì ijaam ní kí bí yii: «Tiŋman, Unimbɔti lafun bí ni-kansikin.»

²⁶Mimmee nnabiyaamu, an sá tí ŋá mana ní? Ni yaa kpáfì kí jāam̀ Unimbɔtee, ubɔ ń gāā ilan, ubɔ ń dàkà Unimbɔti bɔti. Unimbɔti yaa dàkā ubɔ tiba, ú sòoǹ, ní ubɔ ń sòoǹ isooncaan, ní ubɔ ń nàatī isooncaanee taapu. Tin báà ŋma làá ŋée ń tūtuǹ Kriisitoo nikitil ń cù nyɔkɔpu nnimbɔtisan poon.

²⁷Ni yaa làá sòoǹ isooncaanee, án nīn sá binib bili kii bita, bí nīn sòoǹ ubɔ ubɔ, boonee ubɔ ń nàatī tin bi sòon̄ee taapu.

²⁸Ubɔ yaa kaa bí kí nàatī tin bi sòoǹee taapuee, un bíi sòoǹ isooncaanee ń ŋmīĺ kí nīn kíǹ ki sòoǹ úǹ nì Unimbɔti kansikin ŋmaniŋma.

²⁹Bin fòol̄ tibɔti Unimbɔti cee ki nàatēe máaǹ kí nīn bí bili kii bita ní bin kíǹee ń nīn pílifí ki dāantí tin bi sòoǹee.

³⁰Ama Unimbɔti yaa nyántì tibɔti tiba ki dàkā ni-kansikin ubɔee, un bíi sòoǹee ń ŋmīĺ.

³¹Ni ŋūǹ ni-kɔkɔ ń nīn nàatī Unimbɔti nyɔɔbundi ubɔ ubɔ án nín làá ŋá pu ní béé kí ká kunyannyaauee.

³²Ubɔnaatil máaǹ kí nīn cáá Ŋfam min tìì-u tibɔti u cáa nàatēe pu mpɔn.

³³Kun puee Unimbɔti kaa sá fikil fikil Nimbɔtiu, ama ŋgbansɔŋfi Nimbɔtiu ní u sá. Kii Unimbɔti nikitiŋ kɔkɔ poon an nín pée sá puee,

³⁴Kriisitoo nikitil kansikinee, binimpoobi máaǹ kí nīn kā ki ŋmí ní. Baa cáá nsan kí sòoǹ tiba. Bi máaǹ kí sìntīǹ bi-ba taapu kii Unimbɔti gbɔŋku poon nín lī puee.

³⁵Bi yaa kaa gbìl̄ tiba taapuee, bí tin bàlifì bi-calib mmɔŋki. An kaa ŋān̄ binimpoobi ń sòoǹ tiba Unimbɔti nikitiŋ kansikin.

³⁶Nimbi cee ní Unimbɔti bɔti nyáńaaa? Àá nimbi baba cee ní Unimbɔti bɔti dɔ́miń ní?

³⁷Un yaa nyí yii u sá Unimbɔti bɔnaatiliu àá Unimbɔti Fam tīī-u dipɔl dibee máaǹ kí béé yii tibɔti tin m ŋmàn̄ nee sá ti-Dindaan marau ní.

³⁸Un kaa béè yii an sá ti-Dindaan marauee, ní yàntī udaan bɔti.

³⁹An puee nnabiyaamu, nyàab̀maan Unimbɔti ń tīī-ni dipɔl din làá yàntī ní nīn fòol̄ u-cee tibɔti ki nàatēe, ama kí taa pìin̄ bin sòoǹ isooncaanee nsan.

⁴⁰Ní nīn ŋáań tikɔkɔ án nīn kítí ki dī nì nsan.