Read Ntcham 1 Corinthiens 15 Bible Online

1 Corinthiens 15 - Ntcham bible

1 Corinthiens 15

¹Nnabiyaamu, m téetí-ni Tibɔmɔntiil tin m nìn sòon̄ nì ni, ni fōō ki kíí ki sí ti-puee bɔti.

²Tibɔmɔntiil gbanti pu ní Unimbɔti fīī-ni. An puee ní nīn gbíntì ki ŋúb́-tì kii m nín nìn sòon̄ nì ni puee. Yaa sá fám, ni fōō ki kíí fám dee.

³Tin bi dàkā-mee, tíǹ ní m cáań ki dàkā-ni. Tibɔti gbanti poonee, tin páb́ tikpilee di sá yii Kriisitoo kpíì timbi kpitii pu ní, kii Unimbɔti gbɔŋku nín lī puee.

⁴Bi síb́-u ní iwiin ita dalee, Unimbɔti fīkitì-u, kii an nín ŋmàn̄ pu Unimbɔti gbɔŋku poonee.

⁵U lēē u-ba ki dàkā Peetroo nì u-kpambaliŋ saalaa nì alee[50].

⁶Boonee u-boonnooliibi alaataa aŋmoo mun ká-u dicilpu. Bi-kansikin tikpil dáá bí kaa kpíì, ama biba mun kpíì.

⁷Boonee ní u lēē u-ba ki dàkā Yakubu, nì akpambal kɔkɔ.

⁸Bíǹ kɔkɔ boon kpataaayee, ní u lēē u-ba ki dàkā ma mun, man un bí kii m-ŋmalii kaa bàn̄ ní bi màl̄-mee.

⁹Man di sá kiwaai akpambal kansikin. Maa máaǹ bí yíiń-mi Yeesu kpambal báà fiii, kun puee m sāaǹ Unimbɔti nikitil[51].

¹⁰Unimbɔti ŋanti pu ní m sá kun m sá díǹ nee. Tiŋan tin u ŋá-mee cáá mpɔn ki yāntì m túń ditundi ki jítiǹ akpambal ŋin kíǹee. An kaa sá man m-ba di túń an tuuŋŋi, an sá Unimbɔti ŋanti tin bí m-nee di túń ditundi gbanti.

¹¹An puee an yaa sá mamaaa, an yaa tí sá bin kíǹeeyaaa, tin pu ti sòon̄ee dee, tin ni mun fōō ki kííyee dee.

¹²Ti yaa sòon̄ ki tùkū-ni yii Unimbɔti fīkitì Kriisitoo ditaŋkpiilinee, mana ní ni-kansikin biba lì yii bitaŋkpiibi kaa bí kí fìkitī?

¹³Bitaŋkpiibi yaa kaa fìkitī ditaŋkpiilinee, mimmee Kriisitoo mun kaa fīkitì deeyaa!

¹⁴Kriisitoo yaa kaa bàà fīkitèe, Tibɔmɔntiil tin ti sòoǹee bàà sá fám ní, ní ni mun nín fōō ki kíí miŋyee ŋá fám.

¹⁵Áli gba ti bàà sá binyimɔndambi, kun puee ti mɔ́ntì ki túǹ Unimbɔti pu yii u fīkitì Kriisitoo ditaŋkpiilin, kin u mun kaa fīkitì-u, an yaa lafun sá tiŋman yii bitaŋkpiibi kaa fìkitēe.

¹⁶Bitaŋkpiibi yaa kaa fìkitēe, mimmee Kriisitoo mun kaa fīkitì dee.

¹⁷Kriisitoo yaa kaa fīkitì ditaŋkpiilinee, mimmee ni-fookiiu sá fám dee, ni dáá gbíntì ki bí ni-kpitii poon dee.

¹⁸An yaa sá mimmee, bin nóó Kriisitoo ki kpíìyee wáŋkì.

¹⁹An yaa sá dimaŋfal din poon ti bí nee ŋmaniŋma pu ní ti yaa máká Kriisitoo puee, mimmee timbi falaau jítiǹ binib kɔkɔ yɔu dee.

²⁰Ama Kriisitoo fīkitì ditaŋkpiilin tiŋman. Bitaŋkpiibi bin làá dāá fìkitēe, úǹ di sá upeepeekaa ki fīkitì.

²¹Di sá yii unibaanti pu ní ŋkúm dī ki jéetì binib pu. Míǹ mbaantiim ní bitaŋkpiibi fìkititam tí dīń unibaanti pu kí fìkitī báà ŋma.

²²Kii inifunaan kɔkɔ nín cáá mpèé nì Adam ki kúù puee, míǹ mbaantiim ní bin kɔkɔ ŋá ubaanti nì Kriisitooyee làá dāá ká dimaŋfal[52].

²³Ama an sá báà ŋma nì u-yuntiŋu ní. Kriisitoo di sá upeepeekaa ki fīkitì ditaŋkpiilin, ní bin nóó Kriisitooyee mun ń dāá fìkitī ŋyunti ŋun u yaa láa fātìi gítińee.

²⁴Boonee ní duulinya kúntitam ń nín bàń. Ŋyunti ŋun u yaa láa kúntì ipɔn kɔkɔ nì i-nyɔkɔmee ní ú dū Dibeel kí tīī u-Baa Unimbɔti.

²⁵Kriisitoo làá jī dibeel míǹ ní kí tin sāā ŋyunti ŋun u làá já kí pɔ̄ɔkiǹ u-nannanliibi kí dū-bi kí ŋá u-taaŋi taapuee[53].

²⁶U-nannanliu un u làá kúntí katanjooliiyee di sá ŋkúm.

²⁷Kun puee an lī Unimbɔti gbɔŋku poon yii: «U dū tikɔkɔ ki ŋá u-taaŋi taapu[54].» Unimbɔti nín lī yii u dū tikɔkɔ ki ŋá u-taaŋi taapuee, kaa sá ki kpáaǹ úǹ Unimbɔti u-ba ní u kpáàa dūu ŋá u-taapu.

²⁸Ŋyunti ŋun ní tikɔkɔ yaa láa sīntiǹ ti-ba ki tīī Kriisitooyee, niinee ní úǹ Unimbɔti Jipɔɔn mun u-ba ń dāá sìntīǹ u-ba kí tīī Unimbɔti un sīntiǹ tikɔkɔ taapu ki tīī-uee, ní Unimbɔti ń nīn yì tikɔkɔ nì tikɔkɔ.

²⁹Kpèèmaan bin yàntī bi fùul̀-bi Unimbɔti nyim bin kpíìyee yil puee: bin kúùyee yaa kaa bàà fìkitēe, ba pu ní bi yàntī bi fùul̀-bi Unimbɔti nyim bitaŋkpiibi yil pu?

³⁰Bi yaa kúù kaa fìkitī ní, ba pu ní ŋyunti kamaayee timbi bí dinimbinaamandin ní?

³¹Nnabiyaamu, baabadalee ŋkúm tà ki kíbití-mi ní. Ni nín nóó ti-Dindaan Yeesu Kriisitoo puee nín tìì-mi disíndi diŋyee di yì-tì ní m lì míǹ.

³²An yaa sá yii unil yaa kpíì waa ti fìkitēe, mimmee m nín jáń nì kumooun peelii in bí Eefeesee, ba paatii ní m ká? An yaa sá yii bitaŋkpiibi kaa fìkitēe, mimmee càmaan tí ŋá kii dilaŋkpandi nín lī puee yii: «Tí jī kí nyɔ̀maan, kun puee fool ti làá fu kpú[55].»

³³Ní taa yàntī ubɔ ń kīil̀-ni: «Ni yaa nóó binib bin bimbim kaa ŋān̄ee, see ni mun ń dāá bīil̀.»

³⁴Ní gítiḿmaan ni-ban kí nīn cáá ilandɔkɔmɔnti kí taa ti ŋá ikpiti. Ni-kansikin biba kaa nyí Unimbɔti. M nín lī pu nee, an sá ni-cooi ní.

³⁵Ama ubɔ làá lì yii: «Mana ní bin kpíìyee làá fìkitī? Tiwun tilati ní bi làá dāá nīn cáá dee?»

³⁶Ugbaan, a yaa búĺ ŋwamboolee, ŋwamboolee yaa kaa kpíìyee, ŋuaa nyēē.

³⁷Kí kūtèe, kun a búĺee sá idi àá iwambool iba ní an nyā ki sá tifaal, kaa ti sá ŋwambool ŋun a búĺee.

³⁸Unimbɔti di tìì ŋwamboolee u nín là ŋú nyā kí nīn bí miŋyee. Úǹ di tìì iwambool kɔkɔ nín máaǹ kí nyā kí nīn bí miŋyee.

³⁹Tiwan tin kɔkɔ cáá kufoouee wunti kaa sá tibaantiil, binib wunti bí ti-ba, ipeel yati bí ti-ba, nnɔmbiyaamu yati bí ti-ba, ní ijɔm mun yati bí ti-ba.

⁴⁰Tiwun tin sá yilpu yatee bí, ní tin mun sá taapu dooyee yati bí. Tin sá yilpuee nyaaŋku nyáń ku-ba nì tin sá taapu dooyee.

⁴¹Ŋwìiń nyaaŋku bí ku-ba ní uŋmal mun yɔkɔ bí ku-ba, áli gba iŋmalbijaa kansikinee i-nyaaŋku bí ku-ba ku-ba ní.

⁴²Míǹ mbaantiim ní bitaŋkpiibi yaa láa fīkitèe, an dāa bí. Tiwun tin kúùyee ní bi dù kí síb́, ní tí dāá fìkitī nì tiwun tin kaa kúùyee.

⁴³Kí wàatī bí dū-tì kí síb́ee, tàa ŋān̄, kaa pɔ̄ɔ̄ mun. Ama ní tí dāá fìkitī nì kunyaaŋŋu nì mpɔn.

⁴⁴Taapu doo wunti ní bi dùú síb́ ní tì yaa fīkitèe, Circir Fam ń dāá tīī-ti dimaŋfal. Míǹ puee, taapu doo wunti bí ní tiwun tin Circir Fam tīī dimaŋfalee mun bí.

⁴⁵Kii Unimbɔti gbɔŋku poon nín lī puee yii: «Adam unipeepeekaayee, Unimbɔti náań-u ní ki tīī-u dimaŋfal[56]», ama Adam joolkaayee, úǹ sá Ŋfam min tìì dimaŋfalee ní.

⁴⁶An kaa sá un nyánní Unimbɔti ceeyee di péetí kí dāan̄, an sá un nyánní taapu dooyee di péetí, ní un nyēeń Unimbɔti ceeyee ń páanní boon.

⁴⁷Ntam ní Unimbɔti dūu náań Adam peepeekaa ní u sá taapu doo[57], ama Adam liliitee nyánní Unimbɔti cee ní.

⁴⁸Binib bin sá taapu doo yabee náań nì un Unimbɔti dū ntam ki náańee ní, ní bin sá yilpu yabee náań nì un nyánní yilpuee.

⁴⁹Ti nì un sá taapu dooyee nín náań pu nee, míǹ mbaantiim ní ti nì un sá yilpuee làá dāá nīn tí náań.

⁵⁰Nnabiyaamu, tin m là kí tùkù-nee sèé: tiwun nì fatiku kaa ŋūǹ kí kɔ́ Unimbɔti Beelin, míǹ ní tin kúùyee kaa ŋūǹ kí fōō tin kaa kúùyee.

⁵¹M làá tùkù-ni tibɔti tin nìn bí dibalinee: di sá yii ti-kɔkɔ kaa làá dāá kpú, ama ti-kɔkɔ wunti di làá dāá kpántí.

⁵²Dikantánjoolkaal yaa láa búńee, niin niin dicilpu kii dinimbil nín pée kábití puee, bitaŋkpiibi kpáàa fīkitì nì tiwun tin kaa ti kúùyee, ní timbi bin kíǹ kaa kpíìyee wunti ń cúú kpántí[58].

⁵³Di sá yii tiwun tin bíiĺee dāa kpántí tin kaa bíiĺee, míǹ ní tiwun tin kúùyee dāa kpántí tin kaa kúùyee.

⁵⁴Ŋyunti ŋun ní tiwun tin bíiĺee yaa láa kpántì tin kaa bíiĺee, ní tiwun tin kúùyee yaa láa kpántì tin kaa ti kúùyee, ŋyunti gbantee an ŋá kii an nín ŋmàn̄ Unimbɔti gbɔŋku poon puee dee, yii: «Bi kúntì ŋkúm, dijajil ŋá dimɔndi.»

⁵⁵«Too, ŋkúm, a-jajil bí la? Too, ŋkúm, a-looti bí la[59]?»

⁵⁶Ŋkúm looti di sá ikpiti, ní ikpiti pɔŋŋu sá mara.

⁵⁷Tí jāam̀maan Unimbɔti u nín dìŋfī ti-Dindaan Yeesu Kriisitoo pu ki tìì-ti dijajil diŋyee pu.

⁵⁸An puee, m-nabineeŋkaamu, ní nīn ŋúb́ an píkí, kí báań inyaan kí nīn tūm̀maan ti-Dindaan tundi kí taa gbèen̄, kí nīn nyí yii ni-tundi kaa làá gbíntí fám.