Read Ntcham 1 Corinthiens 2 Bible Online

1 Corinthiens 2 - Ntcham bible

1 Corinthiens 2

¹Nnabiyaamu, m nín nìn dɔ́miń ni-cee ki sòon̄ nì ni Unimbɔti bɔti tin bí dibalinee, maa nìn dū anyɔɔbuŋkpaanaaa, kaa nìn tí dū binib ciiŋyi ní ki sòon̄ nì ni.

²M lēē yii maa làá sòoǹ ni-kansikin báà tiba nì tiba, an yaa kaa sá Yeesu Kriisitoo un bi kpáá ndɔpuntikaa puee bɔti.

³An pu ní m kāl̀ ni-kansikin kii uwɔfee nì tifaandi yɔ́kɔ́ yɔkɔ[8].

⁴Unimbɔti bɔti tin m nìn cáań-nee nì min min m nìn dàkā-ni tibɔti gbantee kaa nìn nyánní binib ciiŋyi dàkatamin, ama an nìn sá Unimbɔti Fam pɔŋŋu tundi ní.

⁵Mimmee ni-fookiiu kaa cɔ́ binib ciiŋyi pu, ama Unimbɔti pɔŋŋu pu ní an cɔ́.

⁶An puee bin béè nnimbɔtisan mmɔntiiminee, iciin ní ti dàkā-bi. An kaa nìn sá duulinya yab ciiŋyi, kaa tí sá ipɔŋkpiti in jíń abee duulinyan ki làá dāá kúntée ciiŋyi.

⁷Timbee, Unimbɔti ciiŋyi in nìn bí dibalinee pu ní ti sòoǹ. Unimbɔti nìn pée lēē-i ki yóoǹ-ti án nīn sá ti-nyooti ki wāatì ní ki nín náań duulinya.

⁸Duulinya bɔtiibi báà ubɔ kaa ŋúń ki béè Unimbɔti ciiŋyi gbanti. Bi yaa bàà nìn béè-i, baa bàà nìn kpáà ti-Dindaan tinyooldaan ndɔpuntikaa pu.

⁹An bí kii Unimbɔti gbɔŋku poon nín ŋmàn̄ puee yii: «Tin unil nimbil kaa kée, nì tin u-tafal kaa gbìl̄ee, nì tin unil kaa dākafì ki kée, tíǹ ní Unimbɔti bɔ́ntì ki yóoǹ bin néeń-uee[9].»

¹⁰Di sá yii timbi ní Unimbɔti dī u-Fam pu ki dàkā-ti abɔɔn gbanti. Di sá yii Unimbɔti Fam gbanti di ŋūǹ kí béé tin Unimbɔti cááyee, ki kpáaǹ tin bí dibalin poon poon kábuee.

¹¹Ulanil ni-kansikin di ŋūǹ kí béé u-juti landɔkɔŋu? See úǹ u-ba fam min bí u-nee di ŋūǹ kí béé kun u sée. Míǹ mbaantiim ní ubɔ kaa ŋūǹ kí béé Unimbɔti landɔkɔŋu, see Unimbɔti Fam di ŋūǹ kí béé u-landɔkɔŋu.

¹²Timbee, an kaa sá duulinya Fam ní ti fōō, an sá Unimbɔti di tīī-ti u-Fam, án nín làá ŋá pu tí béé tiŋan tin kɔkɔ Unimbɔti ŋá-tee.

¹³An puee, anyɔɔbun ŋin ti cáa sòoǹee kaa sá binib nín dàkà iciin iŋyee nyɔɔbuŋŋi, ama an sá anyɔɔbun ŋin Unimbɔti Fam tīī-tee ní ti cáa sòoǹ ki bɔ́bití ibaamɔn in nyēeń Unimbɔti Fam nee ki tùkù bin cáá Unimbɔti Famee.

¹⁴Unil un dàkafī nniyaamin ŋmaniŋmee kaa ŋūǹ kí fōō ibaamɔn in Unimbɔti Fam sòoǹee. Úǹ ceeyee, an sá tiwaatibɔti ní. Waa ŋūǹ kí fōō-tì, kun puee Unimbɔti Fam baba di yàntī unil ń ŋmā kí béé kí gàntī.

¹⁵Unil un cáá Unimbɔti Famee di ŋūǹ kí nīn nyí tikɔkɔ ki gàntī, ama ubɔ kaa gbìl̀ úǹ bɔti taapu kí gàntī.

¹⁶Kii Unimbɔti gbɔŋku poon nín lī puee yii: «Ŋma di nyí ti-Dindaan landɔkɔŋu? Ŋma di ŋūǹ kí sāŋkì-u[10]?» Ama timbee, ti cáá Kriisitoo landɔkɔŋu ti-ni.