Read Ntcham 1 Corinthiens 5 Bible Online

1 Corinthiens 5 - Ntcham bible

1 Corinthiens 5

¹M gbìl̄ bi sòoǹ tijɔkɔndi tin bí ni-kansikinee pu. An jɔkɔntee, bin kaa fōō Yeesu ki kííyee kaa kíikí kí ŋá míǹ gba. M gbìl̄ yii ni-kansikin ubɔ cáá u-baa nimpuaa!

²Ni ŋáań míǹ ní ki gíti cáá dilambil kaa bí kunimbaaun kí nyāntí un ŋá an tundee ni-kansikin.

³Maa bí ni-cee ni wāĺ-mi, ama m-landɔkɔŋu bí ni-cee. M pūtì kpáàa kūū un ŋá an tuŋkpitilee bɔti a lì kii m bí ni-kansikinee.

⁴Ní kpāfìmaan nì ti-Dindaan Yeesu yindi pu, m-landɔkɔŋu làá dāá nīn bí ni-kansikin. Nì ti-Dindaan Yeesu pɔŋŋu puee,

⁵ní dāá dū an niliuee kí tīī Sitaan[15]. U làá sàaǹ u-wunti ní u-naŋki ń dāá ŋmátí ti-Dindaan gítintam.

⁶Kun pu ní ni dàkafī ki cáá dilambilee kaa ŋān̄. Naa nyí yii ŋkpɔnɔnyɔkɔ fiiiyee ní bi dù kí ŋá bukpɔnɔsaa ní án jɔ̄m̀aaa[16]?

⁷Nyāntímaan nnyɔɔkpiki gbanti ŋun sá ikpitee kí nīn sá circirdambi kii bukpɔnɔsaa bun kaa cáá nnyɔkɔee. Ni kpántì míǹ ki dóò, kun puee Kriisitoo un sá-ti Dilákatil jiŋaaliu pibilee dū u-ba ki ŋá saraa ipii yil pu ki tīī timbi.

⁸An puee, tí jīmaan ti-jiŋaaliu gbanti nì kpɔnɔb bin poon baa ŋá ŋkpɔnɔnyɔkɔ ŋun sá kii ikpiti nì tijɔkɔndee, ama án nīn sá kii kpɔnɔb bin kaa cáá nnyɔkɔee, ki sá circir nì ibaamɔnee[17].

⁹M nìn ŋmàn̄-ni kugbɔŋu ki tùkū-ni yii ní taa yàntī ni nì bin tūǹ ajɔkɔntuunee ń nīn kpáfí.

¹⁰Maa nìn lì bin bí duulinyan ki tūǹ ajɔkɔntuunee nì nnimbitaataam dambi nì binaayub nì biwaatootiliibi. An yaa bàà sá bíǹ pu ní m lèe, m bàà lì yii ní nyā duulinya poon ní.

¹¹M nín baasii là kí lì min kugbɔŋu gbanti poonee di sá: unil un lì yii u sá Kriisitoo yɔu, ama ní ki tūǹ ajɔkɔntuun àá ki cáá nnimbitaataam àá ki sá uwaatootil àá ki sìí binib àá ki sá udanyɔgbil àá unaayuuyee ní m lì. Ni nì an niliuee ń taa kpāfì kí jī tijin.

¹²Man di kaa làá sòoǹ bin kaa nóó Yeesuee bɔti. Bin sá Kriisitoo yabee bɔti ní an sá ní sòoǹ.

¹³Unimbɔti di làá sòoǹ bin kaa sá Kriisitoo yabee bɔti. Nyāntímaan unikpiti ni-kansikin[18].