Read Ntcham 1 Corinthiens 6 Bible Online

1 Corinthiens 6 - Ntcham bible

1 Corinthiens 6

¹Ba pu ní ni-kansikin ubɔ nì u-juti yaa cáá tɔb tibɔtee, ni cáa cáǹ bin kaa nóó Yeesuee cee, kaa cáa cáǹ bin nóó Yeesuee cee ní?

²Naa nyí yii bin fōō Yeesu ki kííyee di làá dāá sòoǹ duulinya yab bɔtaaa? Nimbi bin làá dāá sòoǹ duulinya yab bɔtee di kaa ŋūǹ kí sòoǹ tibɔti tin bí sɔkɔmiiyeeee?

³Naa nyí yii timbi di làá dāá sòoǹ ituun bɔtaaa? Kin ataa aŋa pu ní taa ŋūǹ kí sòoǹ binib bɔti.

⁴Di sá yii nimbi kansikinee, ni yaa cáá tɔb tibee, bin Kriisitoo nikitil kaa dūu yíiń binibee, bíǹ ní nimbi cāabìń bí nīn sá bibɔsoonliibi.

⁵Mimmee ni-kansikin ubɔ kaa bí ki cáá iciin kí nīn ŋáŋkí ni-kansikin bɔtaaa? Ni-cooi ní m bíi lì nee.

⁶Nimbee, ni nì ni-nabiki yaa cáá tɔb tibɔtee, see bin kaa nyí Unimbɔtee cee ní ni tin sòoǹ-tì.

⁷Kɔŋkɔnnee ni yīntì kpataaa ni nì ni-nabiyaamu nín cáá tɔb tibɔtee pu. Ba pu ní bi yaa ŋá-ni tin kaa kítèe, naa jīǹ kimɔtii ní? Ba pu ní naa yàntī un yùn̄-nee ń nīn cáa cá ní?

⁸Ama nimbi gba di ŋáań tin kaa kítèe ní ki yù. Ni-nabiyaamu mun nóó Kriisitooyee ní ni ŋáań mimmee!

⁹Naa nyí yii bin ŋáań tin kaa kítèe kaa làá dāá kɔ́ Unimbɔti Beelinaaa? Ubɔ ń taa mɔ̄ntì u-ba. Bin ŋáań tijɔkɔndee nì biwaatootiliibi nì bilaakpaadambi nì bin dɔ̀ nì bi-ninjajutiibee,

¹⁰nì binaayub nì nnimbitaataam dambi nì bidanyɔgbiliibi nì bin sìí binibee nì biyipɔɔdambee kaa làá dāá kɔ́ Unimbɔti Beelin.

¹¹Míǹ poon ní ni-kansikin biba nìn bí. Ama Unimbɔti fùl̄-ni ki lēē ni-kpitii, ki gāntì-ni ki yóoǹ ní nīn sá u-yab. Ti-Dindaan Yeesu Kriisitoo nì Unimbɔti Fam puee, ni kpántì deedeedambi.

¹²Ni-kansikin biba lì yii: «M cáá nsan kí ŋá tikɔkɔ», ama tikɔkɔ di kaa ŋān̄ ki tīī-mi. Báà m yaa cáá nsan kí ŋá tikɔkɔɔɔ, an kaa sá báà kuŋyee ní ḿ dū m-ba kí tīī kuyuŋu.

¹³«Tijin bí ki tīī dipool ní, ní dipool mun bí ki tīī tijin,» ama Unimbɔti làá dāá kúntí tíǹ liitil. Tiwun tíǹ kaa bí ki tīī dijɔkɔntundi, tì bí ki tīī ti-Dindaan ní, ní ti-Dindaan mun bí ki tīī tiwun.

¹⁴Ní Unimbɔti un fīkitì ti-Dindaanee ń dāá dū u-pɔŋŋuee kí fìkitī ti mun.

¹⁵Naa nyí yii ni-wunti sá Kriisitoo wunjaŋŋi níii? M kíikí kí yòon̄ Kriisitoo wunjaŋŋi kí dūú kpāfì nì kilaakpaai yɔŋuɔɔɔ? Aayee, báà fiii!

¹⁶Naa nyí yii un nì kilaakpaai yaa kpáfèe, udaan wunti nì kilaakpaai yati ŋá tibaantiilaaa? Kun puee Unimbɔti gbɔŋku poon lī yii: «Bi-liitilee ŋá ubaanti dee[19].»

¹⁷Ama un nì ti-Dindaan yaa kpáfèe, udaan nì ti-Dindaan ŋá ubaanti ŋfamin dee.

¹⁸Ní fámaan ajɔkɔntuun, di sá yii ikpiti in kíǹ binib ŋáańee kaa gbèetī tiwun, ama un ŋáań ajɔkɔntuunee, úǹ u-ba wunti ní u ŋáań ikpiti.

¹⁹Àá naa nyí yii ni-wunti sá Unimbɔti Fam min u tīī-nee diiku ní naa yì ni-ba?

²⁰Unimbɔti dá-ni nì kudapɔɔu ní, an puee ní kpáaǹ ni-wunti kí tīī-u tinyool.