Read Ntcham 1 Corinthiens 7 Bible Online

1 Corinthiens 7 - Ntcham bible

1 Corinthiens 7

¹Tí kpèè kugbɔŋu kun ni ŋmàn̄ee bɔti. An ŋān̄ ki tīī unil ń taa bàà cáá unimpu.

²Ama, án taa láa yàntī ní kɔ́ ajɔkɔntuun poonee, an máaǹ uninja kamaa ń nīn cáá u-nimpuu, ní unimpu kamaa ń nīn cáá u-cal.

³Uninja ń tɔ̄ u-tundi nín sá puee kí tīī u-nimpuu, ní unimpu mun ń ŋá míǹ mbaantiim kí tīī u-cal.

⁴Di sá yii an kaa sá unimpu di yì u-wunti u-ba, an sá u-cal di yì. Míǹ mbaantiim an kaa sá uninja di yì u-wunti u-ba, an sá u-nimpuu di yì.

⁵An puee, ubɔ ń taa ŋmìntī u-juti báà tiba, asee ni yaa sòon̄ ki gbìlīǹ tɔb kí dū ŋyunti ŋubɔ kí taa gbēē tɔb kí ŋmā kí mèè. Ni nín mēē míǹ ki dóòyee, ní ní fàtīí kpāfì. An yaa kaa sá míǹ, ni nín kaa ŋūǹ kí nīn gbíntì ki ŋúb́ ni-ba ki ŋmèéyee puee, Sitaan ŋūǹ kí dī míǹ pu kí cɔ̄ŋkì-ni.

⁶Tin m sòoǹ-ni nee, kaa sá mara ní m síiǹ-ni, m sáŋkí-ni ní.

⁷M bàà là yii bininjab kɔkɔ ń bàà nín̄ bí kii man nín bí pu nee ní, ama báà ŋma nì Unimbɔti nín tīiń-u puee ní. U tīī ubɔ tiba ní ki tīī un kíǹee mun tiba.

⁸Ama, m tùkù bin kaa cáá binimpoobi àá kaa mɔ́ǹee nì bikpiipoobi yii an bàà ŋān̄ bí gbíntí míǹ kii man nín bí pu nee.

⁹Ama bi yaa kaa ŋūǹ kí cúú bi-ba kí kàl̄ míǹ, bí mɔ̄ǹ àá bí cáá binimpoobi, kun puee an sɔ́ á cáá unimpu àá á mɔ̄ǹ ki jítiǹ á nīn kā ki wù fɔ̀rrr fám.

¹⁰Nimbi binimpucaaliibi nì bicamɔnliibi ní m tìì mara nee, (ti-Dindaan di yóoǹ mara gbanti, kaa sá man) yii: Unimpu ń taa yīkì u-cal cee.

¹¹U yaa tí cāntì u-calaaa, ú nīn kā míǹ kí taa mɔ̄ǹ ubɔ, àá u nì u-cal ń ŋāŋkì bi-kansikin ú fàtīí gítiń-u. Míǹ mbaantiim, uninja mun ń taa jà u-nimpuu[20].

¹²Nimbi bin kíǹee, tin m làá tùkù-nee sèé, (an kaa sá ti-Dindaan di sòon̄ míǹ, man di lī.) M lī yii a yaa cáá unimpu ní ki dāa fōō Yeesu ki kíí ní a-nimpuu kaa fōō Yeesu ki kíí, ama ní ki kíí kí nīn gbíntìi sá a-nimpuuee, á taa yàntī-u.

¹³Míǹ ní unimpu mun yaa tí nóó Yeesu ní u-cal kaa nóó Yeesu, ama ní ki kíí ú nīn gbíntìi sá u-nimpuuee, ú taa yīkì-u.

¹⁴Uninja un kaa nóó Yeesuee nimpuu nín nóó Yeesuee puee, u kíǹ ki pìl̄ Unimbɔti dee. Ní unimpu un kaa nóó Yeesuee mun kíǹ ki pìl̄ Unimbɔti u-cal un nóó Yeesuee pu. An yaa kaa sá mimmee, bi-biyaamu kaa bàà pìl̄ nì Unimbɔti. An nín sá mimmee puee, bi-biyaamu bí circir.

¹⁵Ama a yaa nóó Yeesu ní a-cal àá a-nimpuu kaa nóó Yeesu ní ki là kí càntī-see, pɔ̄-u nsan ú nīn cá, mara ubɔ kaa bóob́-si á cúú-u mpɔn kí kàan̄. Di sá yii Unimbɔti yíiń-ti tí dāan̄ kí nīn bí ŋgbansɔŋfin ní.

¹⁶Unimpu, a nyí yii sii nì a-cal yaa làá nīn gbíntì ki bí, a làá ŋmā kí fīī-uaaa? Àá uninja, a nyí yii sii nì a-nimpuu yaa làá nīn gbíntì ki bí a làá ŋmā kí fīī-u?

¹⁷Tin bée di sá yii báà ŋma ń nīn ŋúb́ min ti-Dindaan tīī-u ki wāatì ní u nín fōō Yeesu ki kííyee. An marau ní m síiǹ Kriisitoo nikitiŋ kɔkɔ kansikin.

¹⁸Sii un yaa gíí dikpancandi ní ki nín fōō Yeesu ki kííyee ń taa nín̄ yáliŋkí yii a làá gíti ŋá mana. Sii un kaa gíí dikpancandi ní ki fōō Yeesu ki kííyee ń taa gíí.

¹⁹A yaa gííyaaa, a yaa kaa gííyaaa, tíǹ bɔti kaa páb́, tin pée páb́ee di sá á nīn ŋúb́ Unimbɔti marab.

²⁰Báà ŋma ń nīn gbíntì ki bí min ní u nìn pée bí ní ki nín fōō Yeesu ki kííyee.

²¹A yaa nìn sá uyumbu ní ki nín fōō Yeesu ki kíí, á taa nín̄ yáliŋkí, ama a yaa tí ŋūǹ kí fōō a-baaa, á pɔ́ɔǹ kí fōō a-ba.

²²Uyumbu un fōō ti-Dindaan ki kííyee, ti-Dindaan nyántì-u ikpiti yuŋkun, míǹ ní un yì u-ba ki fōō Yeesu ki kííyee sá Kriisitoo yumbuu.

²³Unimbɔti dá-ni nì kudapɔɔu ní, an puee ní taa gíti dū ni-ba kí ŋá binib yumbui.

²⁴Nnabiyaamu, ni nín nìn pée bí min ki wāatì ki nín fōō Yeesu ki kííyee, ní nīn gbíntìi bí míǹ kí dū ni-ba kí tīī Unimbɔti.

²⁵An yaa kíǹ bin làá cáá binimpoobi nì bin làá mɔ̄ǹee bɔtee, ti-Dindaan kaa tīī-mi mara ḿ yóoń-bi, ama man nín dàkafī puee ní m làá lì kii m nín sá unil un ti-Dindaan pú diyimɔɔl bi cáá m-pu dimákalee pu.

²⁶Man ká yii, kii dinimbinaamandi din bí kɔŋkɔnnee puee, an ŋān̄ unil ń taa cáá unimpu.

²⁷A yaa gíti dáá cáá unimpuee, taa ti nyàab̀ nsan yii a làá jà-u. A yaa kaa láá tí cááyaaa, á taa ti cáá.

²⁸Ama nì míǹ kɔkɔee, uninja yaa cáá unimpu, waa yīntì, míǹ ní unimpu mun yaa mɔ́ǹ waa yīntì. Ama digìŋ́kpaandi di làá bà binimpucaaliibi nì bicamɔnliibi. An pu ní m bàà là kí nyāntí-bi digìńdin.

²⁹Nnabiyaamu, tin m làá lèe di sá yii ŋyunti kaa ti náaǹ. An puee bin cáá binimpoobee ń nīn bí kii bin kaa cááyee,

³⁰bin sūǹee ń nīn bí kii kunimbaau kaa cáá-bee, bin lāāyee ń nīn bí kii an kaa mɔ̄ǹ-bee, binyampoobi bin dāāyee ń nīn bí kii baa cáá tibee.

³¹Bin bí ki jīǹ duulinya puee ń nīn bí kii baa bíi páatí tibee. Kun puee, ni nín wāĺ duulinya bí min nee, u làá dāá kúntí.

³²M bàà là yii ní nīn tɔ́ ni-ba kí taa nín̄ nìiǹ, di sá yii ti-Dindaan tundi ŋmaniŋma pu ní un kaa cáá unimpuee nimbiliŋ máǹ ki nyàab̀ kí fáatí ti-Dindaan.

³³Ama un cáá unimpuee nimbiliŋ máǹ duulinya tuuŋŋi pu ní u nyàab̀ kí fáatíǹ u-nimpuu.

³⁴Niinee u-landɔkɔi ŋá ili dee. Míǹ ní unimpu àá usapɔɔn un kaa mɔ́ǹee nimbiliŋ máǹ ti-Dindaan tundi pu, án nín làá ŋá pu u-wunti nì u-pɔbil ń nīn bí circiree. Ama unimpu àá usapɔɔn un mɔ́ǹee nimbiliŋ máǹ duulinya tuuŋŋi pu ní u nyàab̀ kí nīn fáatì u-cal.

³⁵Ni-ŋanti pu ní m sòoǹ tin bí nee, an kaa sá kí bàkan̄-ni. M là ní nīn ŋáań min ŋān̄ ki kítèe ní, kí dū ni-ba kɔkɔ kí ŋá ti-Dindaan ŋaan kí taa kíń báà laaba.

³⁶Unaacimpɔɔn un di yaa bàà lēē yii waa làá cáá u-bɔɔn ní ki dāa gíti ká yii waa ŋūǹ kí cúú u-ba, án làá nīn pée páb́-u míǹ kí nīn cée, ú cáá u-bɔɔn, waa ŋá ikpiti.

³⁷Ama un di lēē u-pɔbil poon kaa ti bí kí gítí u-boon ki yì u-ba ki nyí min u lēēyee, u nín baasii lēē u-pɔbil poon kí ŋá miŋyee deeyee, udaan lēē min ŋān̄ee.

³⁸Un kaa ŋúń ki cúú u-ba ki cáá u-bɔɔnee cee ŋān̄. Ama un ŋúń ki cúú u-ba kaa cáá u-bɔɔnee cee ŋān̄ ki lákatì.

³⁹Unimpu un mɔ́ǹee máaǹ kí nīn pée náká u-cal ní bí nīn bí iyunti kɔkɔ. Ama u-cal yaa kpíìyee, u tɔ́ u-ba kí mɔ̄ǹ un u yaa lèe. Ama un fōō Yeesu ki kííyee ní an sá ú fàtīí mɔ̄ǹ.

⁴⁰Man ceeyee, u yaa gbíntì míǹ kaa mɔ́ǹ, u-pɔbil làá nīn sɔ̀m̀ ki jítiǹ u yaa mɔ́ǹ. Man nín dàkafī puee dee, ní m fōō ki kíí yii ma mun cáá Unimbɔti Fam.