Read Ntcham 1 Corinthiens 8 Bible Online

1 Corinthiens 8 - Ntcham bible

1 Corinthiens 8

¹Tiwaŋkuti tin bi tōotì awaayee nanti bɔtee[21], ti nyí yii báà ŋma nyí, ama dinyil cāabìń dilambil ní, ní dineendi yàntī binib cá nyɔkɔpu nnimbɔtisan poon.

²Un dàkafī yii u nyí tibee kaa láá béè min sá ú bééyee.

³Ama un yaa néeń Unimbɔtee, Unimbɔti béè udaan dee.

⁴Ni nín bālifì yii ni ŋūǹ kí ŋmɔ́ tiwaatootinanaaayee, ti nyí yii diwaal kaa sá tiba duulinya poon, míǹ ní báà unimbɔti ubɔ gíti kpá see Unimbɔtibaantee.

⁵Binib dàkafī yii inimbɔti wīikí, iba bí yilpu ní iba bí taapu. Tiŋman, bíǹ ceeyee, inimbɔti wīikí ní bidindambi mun wīikí.

⁶Timbee, ti cáá Unimbɔtibambaanti ní, úǹ di sá Ubaati un náań tikɔkɔee. Úǹ pu ní ti bí. Ní ti-Dindaan sá ubaanti, úǹ di sá Yeesu Kriisitoo. Úǹ pu ní tiwan kɔkɔ bí, u-pu ní ti mun bí.

⁷Ama bi-kɔkɔ kaa nyí míǹ. Di sá yii awaatuun mántiǹ biba, ní bi gbíntì ki ŋmóò tiwaatootinan, a lì kii diwaal di lafun baasii yì tinan gbantee, ní bi-pɔbiliŋ nín kaa pɔ̄ɔ̄ puee ní bí ŋá ikpiti.

⁸Di sá yii tijin di kaa làá yàntī tí sútí kí pìl̄ Unimbɔti. Ti yaa jíńaaa, an kaa làá bàtī-ti tiba, ti yaa kaa jíńaaa, an kaa làá gbéeǹ-ti tiba[22].

⁹Ama ní nīn nyíǹ ni-ba nì ni nín tɔ́ ni-ba ki ŋáań miŋyee, án taa yàntī bin kaa pɔ̄ɔ̄ nnimbɔtisan poonee ń lítí.

¹⁰Un kaa pɔ̄ɔ̄ nnimbɔtisan poonee yaa ká sii un nyí Unimbɔti bɔti tiŋanee yaa kā ditaŋgbandi diba taapu ki jīǹee, an kaa téekí-u ú ŋmɔ́ tiwaatootinanaaa?

¹¹Ní sii nyítam puee, kinabiki kin kaa láá béè ki dóòyee, kinabiki kin pu Kriisitoo kpíìyee ń wāŋkàaa?

¹²Ni nín bí ki ŋáań ni-nabiyaamu ikpiti min ki kɔ̄ntí bin kaa láá béè ki dóòyee landɔkɔi iweenee, an sá Kriisitoo ní ni ŋáań ikpiti gbanti.

¹³An puee, tijin jītam di yaa làá yàntī m-nabiki ń lítée, m kpá kí ŋmɔ́ tinan, án nín làá ŋá pu m-nabiki ń taa lítée.