Read Ntcham 1 Corinthiens 9 Bible Online

1 Corinthiens 9 - Ntcham bible

1 Corinthiens 9

¹Maa tɔ́ m-baaa? Maa sá Yeesu kpambalaaa? Maa ká Yeesu ti-Dindaanaaa[23]? M nín túń ti-Dindaan tundi ki nyántì kuŋyee di kaa sá nimbaaa?

²Báà bin kíǹee yaa bí yii maa sá bíǹ cee Yeesu kpambal, nimbi máaǹ kí nīn nyí-mi yii m sá dikpambal. Ni nì ti-Dindaan nín ŋá ubaanti puee di dàkà yii m sá dikpambal.

³M nín sòoǹ tin ki tùkù bin kpākantí-mee dee.

⁴Man kaa cáá nsan kí jī kí nyɔ̀ m-tundi puɔɔɔ?

⁵Maa cáá nsan ki mun ń yòon̄ unimpu un nóó Yeesuee kí ŋá m-nimpuu ú nīn táá-mi kii akpambal ŋin kíǹee nì ti-Dindaan nabiyaamu nì Peetroo nín ŋá pueeee?

⁶Àá an sá yii man nì Baarnaabaasi[24] baba ní ń tɔ̄ ditundi ní kí nín ká kí jī ní?

⁷Ŋma di kóò tisoojati baa pà-u? Àá unil kaa ŋmóò busubu bun u cóoǹee biliŋaaa? Àá unaakpaal kaa nyù inaa in u kpàáyee naabiimaaa?

⁸An kaa sá min binib nyí ki ŋáań díǹ nì foolee pu ní m sòoǹ, Mooyiisi marau mun lī míǹ ní.

⁹An ŋmàn̄ Mooyiisi marab poon yii: «Á taa bóob́ unaa un gbáà idee nyɔkɔ[25].» Mimmee inaa bɔti páb́ Unimbɔtaaa?

¹⁰An kaa sá timbi pu ní an sòon̄ mimmaaa? Tiŋman, an sá timbi pu ní bi sòon̄ míǹ. An máaǹ un kù idee nì un gbáàyee ń nīn cáá dimákal yii bi làá ká bi-paatii poon.

¹¹Unimbɔti bɔti ní timbi búĺ ni-pɔbiliŋin. Mimmee ni-wanti tin ni cáá duulinyanee, ti yaa fōō tiba poonee, ti fōō ki lákatàaa[26]?

¹²Biba yaa cáá nsan ki jīǹ ni-puee, timbi kaa máaǹ kí jī ni-pu kí jītíǹ bidambaaa? Ama min bàà máaǹ ní ŋá kí tīī-tee, ti ŋmēē kaa bālifì-ni an pu, án nín làá ŋá pu tiba ń taa lìkin̄-ni Kriisitoo Bɔmɔntiiti saŋŋunee.

¹³Ni nyí yii bin tūǹ ditundi kunimbɔtidiinee, niin jinti ní bi jīǹ, ní bin ŋáań saraabee mun cáá bi-jandi saraabee poon[27].

¹⁴Míǹ ní ti-Dindaan pú kinyɔkɔ yii bin sòoǹ Tibɔmɔntiilee ń nīn jīǹ bin cee bi sòoǹee ŋaan[28].

¹⁵Ama maa bālifì tin an sá ní ŋá kí tīī-mee tiba nì tiba pu. Maa tí bíi ŋmà yii ní ŋá kí tīī-mi. M yaa gbíntì míǹ ki kpíì, an sɔ́ ki jítiǹ ubɔ ń bàtī m-nyooti.

¹⁶Tibɔmɔntiil sòontamee kaa sá-mi dilambitundi, ama an páb́-mi yii ḿ sòoǹ ní, kun puee an sá-mi mbusu ní m yaa kaa sòoǹ Tibɔmɔntiil gbantee.

¹⁷M yaa tūǹ ditundi gbanti nì dipɔbil dibee, m cáá tipaal. M yaa kaa tí túń-dì nì dipɔbil dibaaa, ditundi din Unimbɔti tīī-mee dee.

¹⁸Mimmee, m-paati di sá ba? M-paati di sá ḿ sòoǹ Tibɔmɔntiil kí tīī binib faalaa kí taa fōō tiba, ama ki mun bàà cáá nsan kí fōō tiba.

¹⁹M sá unil un yì u-bee ní, maa sá uyumbu. Ama kí ŋmā kí dáaliń kunipaau kí cáań Kriisitoo ceeyee, see m nín dū m-ba ki gíiǹ báà ŋma yumbuuee.

²⁰M yaa bí Juuda yab ceeyee, m gīintí m-ba kii Juuda yab nín bí puee ní, kí ŋmā kí cáań-bi Kriisitoo cee. M yaa bí bin dī Mooyiisi marabee ceeyee, m gīintí m-ba kii bi mun nín bí puee ní, kí ŋmā kí cáań-bi Kriisitoo cee. Ama ní kaa bí m-ba marabee taapu.

²¹M yaa tí bí bin kaa nóó Mooyiisi marabee ceeyee, m tí gīintí m-ba kii unil un kaa nóó marabee ní, kí ŋmā kí cáań-bi Kriisitoo cee. Míǹ kaa dàkà yii maa tɔ́ Unimbɔti marab. M tɔ́-bi, Kriisitoo marab taapu ní m bí.

²²M yaa bí bin kaa pɔ̄ɔ̄ nnimbɔtisanee ceeyee, m gīintí m-ba kii bi mun nín bí puee ní, kí ŋmā kí cáań-bi Kriisitoo cee. Míǹ ní m gīintí m-ba báà ŋma nín bí miŋyee kí ŋmā kí fīī biba tiŋman pu.

²³Tibɔmɔntiil pu ní m pée bí ki ŋáań míǹ kɔkɔee kí ŋmā kí dāá ká tiwammɔntiil an poon.

²⁴Naa nyí yii bin kɔkɔ cá ki sáń kpaŋkpakantikuee, ubaanti di lìntī ní kí fōō tipaalaaa? Ni mun, nín̄ sáḿmaan min máaǹ ní sāǹ kí lìntī kí fōō tipaalee.

²⁵Bin bin cá ditaatandi kpaŋkpakantikuuee kòó tiwan tikpil, mbeefuulimu mun kúùyee pu ní bíǹ ŋáań kpaŋkpakantikubee. Ama timbee, ti sáń kí fōō kifuulii kin làá nīn bí jaanjaanee ní.

²⁶An pu ní m sáń m-nimbiliŋ bá kun m sáń ki nyàab̀ee pu. M yaa làá mɔ̀ee, m bɔ́ntí ní kí nín bɔ̄, maa bōotí fám fám.

²⁷M sàantí m-wunti ní ki ŋúb́-tì. M pɔ̄ɔntí ní, án nín làá ŋá pu ḿ taa sòoǹ nì bin kíǹee Unimbɔti bɔti kí wāŋkì m-bee.