Read Ntcham 2 Corinthiens 1 Bible Online

2 Corinthiens 1 - Ntcham bible

2 Corinthiens 1

¹Man Pɔɔl un Unimbɔti là m sá Yeesu Kriisitoo kpambalee, nì ti-nabiki Tiimootee di ŋmàn̄ kugbɔŋu nee kí tīī nimbi Unimbɔti yab bin kóò Kɔranti tiŋkinee nì bin kɔkɔ sá Unimbɔti nikitil ki kóò Akaayi timmu mun kíǹee nee[1].

²Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.

³Tí nyɔ̄ŋkìmaan Unimbɔti ti-Dindaan Yeesu Kriisitoo Baa un di sūǹ ti-saai ki ŋmēentí-ti tikɔkɔ poonee[2].

⁴Falaabi bin kɔkɔ jēetí ti-puee, úǹ di ŋmēentí-ti, án nín làá ŋá pu ti mun ń dū diŋmeendi din ti fòol̄ u-ceeyee kí ŋméeǹ bin mun bí báà falaa un kamaa poonee.

⁵Kii Kriisitoo pu ti nín jīǹ falaa tikpil tikpil puee, míǹ mbaantiim ní u-puee ti tí fòol̄ diŋmeendi tikpil tikpil mun.

⁶Timbi yaa bí ki jīǹ falaayee, an sá nimbi ń ká diŋmeendi nì difiil pu. Ní timbi yaa ká diŋmeendee, an sá yii ni mun ń ká diŋmeendi kí ŋmā kí ŋmèè nì kimɔtii falaabi bin timbi bíi jīǹee jutiibi yaa láa bāań-nee.

⁷Ti máká ni-pu mbaamɔmin, kun puee ti nyí yii ni mun bí ki jīǹ falaa kii ti mun nín bí ki jīǹ pu nan ní, an puee ní ni ŋūǹ kí fōō diŋmeendi din bí ki tīī-tee mun.

⁸Nnabiyaamu, ti là ní béé falaa un ti jíń Asii tiŋkinee. Falaa gbanti nìn cúú-ti ki lákatì ti-pɔŋŋu pu. Taa nìn gíti máká yii ti làá nīn bí dimaŋfalin[3].

⁹Timbi ti-ba nìn pée ká yii tiba kaa ti bí, see ŋkúm ní ti làá kpú. Tin bí nee nìn bāań ti-pu án nín làá ŋá pu tí taa dū ti-mákal kí páań timbi ti-ba pu, ama tí nīn máká Unimbɔti un fìkitī bitaŋkpiibee pu.

¹⁰Úǹ di nyántì-ti dinimbinaamandi kúm gbanti poon, ní ki làá dāá nyāntí-ti. Ní ti cáá dimákal u-pu yii úǹ di làá dāá gíti nyāntí-ti,

¹¹kun puee ti nyí yii ni bíi tútúǹ-ti ŋwimmeem poon. Di sá yii kunipaau yaa mēē ti-pu ní Unimbɔti fōō bi-wimmeemee, kunipaau làá dāá tí pàkà-u u nín ŋá tiŋan tin ki tīī-tee pu.

¹²Kun pu an mɔ̄ǹ-tee di sá yii ti-pɔbiliŋ poonee, ti nyí yii ti dū dipɔbil diba nì mbimbimɔntiim ní ki kāl̀ duulinyan, cilinjee ni-kansikin. Tíǹ kɔkɔ nyánní Unimbɔti cee ní. An sá Unimbɔti ŋanti di kpōotì-ti, kaa sá unil ciiŋyi.

¹³Di sá yii tigbɔn tin kɔkɔ ti ŋmàn̄ ki tīī-nee poonee, taa ti kútì tiba kii tin ni kàan̄ ki gbìl̄ee. Ní m máká yii ni làá gbìl̄ tibɔti nee taapu tiŋan.

¹⁴- Di sá yii naa láá gbìl̄ kɔkɔ ki dóò -: Ama ti-Dindaan Yeesu gítintam dalee, timbi puee, án làá dāá mɔ̄ɔkiǹ-ni, ní ni mun puee, án làá dāá mɔ̄ɔkiǹ ti mun.

¹⁵Tíǹ pu ní m máká ki bàà là kí dīń ni-cee án nín làá ŋá pu ní ká tiŋan mili puee.

¹⁶M bàà dākafì yii ḿ dīń ni-cee ní kí nín càatī Maseeduwaan tiŋkin, ní boonee kí fàtīí tí dīń ni-cee ní bàà tūtuǹ-mi ḿ nìkī m-saŋkindi kí nīn cá Juudee tiŋkin.

¹⁷M nín bɔ́ntì kí còom̀ m-saŋŋu puee, an sá man di gāā m-bindi ki là kí cù-ŋu naaa? Àá m sá unil un nyɔkɔ kaa bīī tibɔti kí lì yii iiin, ní kí dāá fàtīí lì yii aayeeyee ní?

¹⁸Ibaamɔn, Unimbɔti sá m-seeradaaŋwu. M-bɔti tin m sòon̄ nee kaa sá «Iiin» nì «Aayee» bɔti.

¹⁹Di sá yii Unimbɔti Jipɔɔn Yeesu Kriisitoo un bɔti man nì Siilasi nì Tiimootee[4] sòon̄ ni-cee niinee kaa sá «Iiin» nì «Aayee» bɔti. Ama, u-nee, an pée sá «Iiin» ŋmaniŋma ní.

²⁰Kun puee Unimbɔti nín pōoǹ tiŋyee, Yeesu pu ní an sá «Iiin» tiŋman. An puee Yeesu Kriisitoo pu ní ti lì yii «Ameeni» ki nyɔ́ŋkí Unimbɔti.

²¹Unimbɔti di báaǹ timbi nì nimbi inyaan Kriisitoo ni. Unimbɔti u-ba di lútì-ti.

²²Úǹ di dū u-daaŋku ki ŋá ti-pu, ní ki dū u-Fam ki ŋá ti-pɔbiliŋin kí dàkà-ti yii ti sá u-yab u kpáafì tiwammɔntiil ki yóoǹ kí dāá tīī-ti fool boon.

²³Unimbɔti pu ní m sòoǹ ibaamɔn. Kun pu maa dīń ni-cee Kɔranti tiŋkinee di sá maa là kí yòon̄ ni-pɔbiliŋ. M yaa mɔ́ntì ú kpɔ̀-mi.

²⁴Di sá yii taa là kí dū mpɔn kí dàkà-ni ni nín máaǹ kí fōō kí kíí puee. Ama ti là kí jòò-ni ní nīn cáá dipɔɔpindi ní, kun puee ni-fookiiu pɔ̄ɔ̄.