Read Ntcham 2 Corinthiens 10 Bible Online

2 Corinthiens 10 - Ntcham bible

2 Corinthiens 10

¹Man Pɔɔl m-ba, m dū Kriisitoo basintil nì u-niti ki sáŋkí-ni, man un ni lì yii m yaa bí ni-cee m-nyɔkɔ pɔ̀fì, ama ní m yaa bíń ndan, m sòoǹ nì anyɔɔbun ŋin pɔ̄ɔ̄yee.

²Tin m mèé-nee di sá, m yaa láa bāań ni-ceeyee, ní taa láa yàntī ḿ tāā kí bīikì ni-kansikin biba pu, kun puee m nyí yii m yaa láa bāań, see ḿ dāá tāā kí bīikì bin lì yii ti-bimbim nì ti-bɔti tin ti dàkèe sá nniyaaminee pu.

³Tiŋman ti lafun sá binib, ama dikɔ̀ndi din poon ti bí nee, taa jáà nniyaamin.

⁴Di sá tijanjawan tin ti cáa jáàyee kaa sá binib nín mɔ́ɔ̀ tiŋyee. Ama an sá mpɔn ŋun nyánní Unimbɔti ceeyee ní, ní ki bíiĺ ipɔn in pu binib mákée. Ní ti cáa kpìtī bi-nyimɔmbɔti,

⁵nì alambil ŋin kɔkɔ bi cáá kaa là kí béé Unimbɔtee. An ní ti cáa cútí binib landɔkɔi ki gīintiń-bi bí nīn tɔ́ Kriisitoo.

⁶Ti bɔ́ntì ki cí ŋyunti ŋun nimbi yaa láa dū ni-ba kɔkɔ ki tīī Unimbɔtee ní tí dāá dáaĺ bin bin kaa tɔ́ Unimbɔtee tafal.

⁷Ní nīn kpèémaan tiwan ti-pú. Un yaa nyí u-ba pu yii u sá Kriisitoo yɔuee, ú béé tiŋan yii ti mun sá míǹ ní.

⁸Ti-Dindaan tīī-ti mpɔn tí dūú tūtuǹ-ni nnimbɔtisan poon, an kaa sá kí ŋá-ni tikpitil. An pu ní m sòoǹ kí gúntí m-ba, ní an kaa cáá-mi icoo!

⁹Kaa sá m nyàab̀ kí nīn ŋmà tigbɔn ki fàantí-ni.

¹⁰Di sá yii binib lì yii: «Pɔɔl gbɔnti tin u ŋmèe poonee, u sòoǹ ní an pɔ̄ɔ̄ kpaŋkpam, ama ní u yaa bí ti-kansikin ki sòoǹee ní u sá uwɔfi ní u-nyɔkɔ pɔ̀fì.

¹¹Bin bin dàkafī an landɔkɔŋuee ń béé yii ti nín yaa bí ndan ti sòoǹ ti-gbɔŋku poon an pɔ̄ɔ̄ miŋyee, míǹ ní ti yaa pée tí bí ni-nimbiinee, ti làá tí sòoǹ.

¹²Taa là kí dū ti-ba kí ŋmàntīǹ kii biba nín pàkà bi-ba min ki cáǹ bi-ba ki ŋmàntīǹ min bi lèe, an sá digbaandi ní.

¹³Timbi kaa cáǹ ti-ba laakin taa bàn̄ee. Unimbɔti nín yóoǹ tí tɔ̄ kí gbèen̄ nimbi nyɔkɔmee di sá ti túń ki bàn̄ ni-cee nee.

¹⁴Timbi kaa lákatí laakin an sá tí sòoǹ kí gbèen̄ee pu. Míǹ ní taa tí ŋūǹ kí gbèen̄ nsanni kí taa bàń-ni. Míǹ pu ní ti péé ki dɔ́miń ni-cee ki sòon̄ nì ni Kriisitoo Bɔmɔntiiti.

¹⁵An puee taa lákatí ti-gbeennyɔkɔm pu, taa tí pàkà ti-ba biba tuuŋŋi pu. Ama ti-mákal di sá yii ni-fookiiu yaa bíi wīintée, ti nín túń ditundi ni-cee ki gbēeǹ laakiŋyee, an nìkī kí cù nyɔkɔpu tikpil, ama kí taa nín lákatí ti-kpaanyɔkɔ[26].

¹⁶Boonee ní ti dāa ŋūǹ kí cáá Tibɔmɔntiilee kí cùnnì ntimu mun bí ni-nyɔkɔpu ubɔ kaa láá cūtèe, kí taa nín̄ fòol̄ atuun ŋin biba túń laan sá bí tɔ̄ee nyooti ki gà ti-biŋŋi.

¹⁷An ŋmàn̄ Unimbɔti gbɔŋku poon yii: «Un pàkèe ń pàkà ti-Dindaan[27].»

¹⁸An kaa sá a yaa bí ki pàkà a-bee di dàkà yii a lafun máaǹ kupampakau, see sii un Unimbɔti pàkèe.