Read Ntcham 2 Corinthiens 11 Bible Online

2 Corinthiens 11 - Ntcham bible

2 Corinthiens 11

¹M yaa gbíntì ki sòoǹ kii uwaatee, ní jīmaan m-pu kimɔtii, ní lafun jīmaan m-pu kimɔtii!

²M néeń-ni kaa mɔ̄ ni-pu, ní dineendi gbanti nyánní unimbɔti cee. Di sá yii m bɔ́ntì-ni kí dū-ni kí tīī uninjabaanti ní: úǹ di sá Kriisitoo. Tiŋman, úǹ ní m làá dū-ni kí tīī kii usapɔɔn un kaa nyí uninjee.

³Ama kii ukoobu nín nìn kíil̀ Awa puee, míǹ ní m fàŋkí ubɔ ń taa láa dāá cúú ni-landɔkɔi kí lábití kí yàntī ní fá Kriisitoo un ni nóó ibaamɔn nì dipɔbil dibee[28].

⁴Kun puee ni jīǹ kimɔtii ki fòol̄ bin dòoń ki sòoǹ nì ni Yeesu ubɔ pu, kaa sá un timbi sòon̄ nì ni nee ní. Míǹ mbaantiim ní ni fòol̄ ŋfam miba min kaa sá Unimbɔti yam min ni fōōyee, ní ki tí fòol̄ tibɔcan tiba mun ki kíikí.

⁵M pàkā yii bíǹ bin ni yíì akpambamɔntee kaa jítiǹ-mi.

⁶Nì min kɔkɔ ní maa ŋūǹ kí sòoǹee, m nyí Unimbɔti bɔti. Ti dàkā-ni míǹ ŋfunyɔm kupaau nimbi ni-ba ká míǹ.

⁷Mimmee, m nín cáań Unimbɔti bɔti ki sòon̄ ni-cee faalaa ki sīntì m-ba taapu nimbi ń yīkì yilpuee, m yīntàaa?

⁸M nín dɔ́miń ni-cee ki sòon̄ Unimbɔti bɔtee, Kriisitoo nikitiŋ aba di nìn yì m-paati. M nìn fúkuĺ bíǹ ní ki cáa tútúǹ nimbi.

⁹M nín nìn bí ni-ceeyee, maa nìn báká ubɔ pu. Animbil nín nìn lóò-mee, nnabiyaamu mun nìn nyánní Maseeduwaanee di nìn cáań-mi tin kɔkɔ nìn lóò-mee[29]. M kpēē m-ba kaa nìn báká ubɔ pu báà tiba poon, ní ki làá nīn pée gbíntìi kpèé m-ba míǹ kí nīn cá.

¹⁰M sòoǹ nì ni Kriisitoo baamɔŋyi in bí m-nee ní yii: Akaayi tiŋki kɔkɔ poon ubɔ kpá kí lēē an nyandee m-pu.

¹¹Maa néeń-ni naaa, ba pu ní m lī míǹ? Unimbɔti nyí m nín néeń-nee.

¹²Min m ŋáań nee, m làá nīn pée gbíntìi ŋáań míǹ ní, kí kpìtī biŋmatinliibi bin mun là kí nīn pàkà bi-ba ki lì yii bi sá akpambal kii timbee dàkatam.

¹³Binib gbantee kaa sá akpambal. Bi mɔ́ntí yii bi tūǹ Unimbɔti tundi ní ki gīintí bi-ba[30] Kriisitoo kpambaliŋ yam.

¹⁴Tinee kaa sá maamaaci bɔti, kun puee Sitaan u-ba ŋūǹ kí kpántí ŋwalifi tuuŋŋu.

¹⁵An puee an kaa sá atulim bɔti yii u-tɔntɔnliibi mun ŋūǹ kí gíiǹ bi-ba kii bitɔntɔnliibi bin bí deedeeyee. Unimbɔti làá dáaĺ bi-tafal bi-tuuŋŋi nín sá miŋyee ní.

¹⁶M gíti bùsī ki tùkù-ni yii ní taa dàkafì yii m sá uwaati. Ni yaa tí dàkafī mimmaaa, ní jī m-pu kimɔtii an pu, kí yàntī ma mun ḿ pàkà m-ba fiii.

¹⁷M nín bíi lì pu nee, an kaa sá ti-Dindaan di bí yii ḿ nīn sòoǹ ki pàkà m-ba míǹ. M bíi sòoǹ kii unil un yil lábitèe ní. Kun puee m cáá tin pu ní m làá sòoǹ kí pàkà m-bee.

¹⁸Binib bí ki pàkà bi-ba duulinyan doo wanti pu, an pu ní ma mun bíi pàkà m-ba.

¹⁹Nimbi di bí yii ni cáá iciin, ama ní ki jīǹ kimɔtii biwaatiibi pu an mɔ̄ǹ-ni.

²⁰Bi cáá-ni ki sàantí kii iyumbuee, ki jīǹ ni-pu, ki kíiĺ-ni, ki kpèé-ni fám, ki fátí-ni itampa, ní ni jīǹ bi-pu kimɔtii.

²¹An sá-ti icoo ní yii timbi kaa cáá mpɔn kí ŋmā kí ŋá-ni míǹ. Ubɔ yaa ŋūǹ kí pàkà u-ba tiba puee, ma mun ŋūǹ kí pàkà m-ba. M bíi sòoǹ ŋwaatiyaamin dee.

²²Di sá an nibee yaa dàkà bi-ba yii bi sá Eebru yabaaa, ma mun sá ueebruja ní, bi yaa bí yii bi sá Isirayeel yabaaa, ma mun sá Uisirayeelja ní. Bi yaa bí yii bi sá Abraam naantiibaaa, ma mun sá Abraam naantiiu ní[31].

²³Bi yaa bí yii bi sá Kriisitoo tɔntɔnliibaaa, man di nín sá ki jítiǹ-bi, m bíi sòoǹ ŋwaatiyaamin dee. M túń ditundi ki jítiǹ-bi. Bi pìintí-mi kudii múlmul ki jítiǹ-bi. Bi gbáń-mi ki jítiǹ-bi, m jēetí nnaabu ŋun sá ŋkúmee ni múlmul ki jítiǹ-bi.

²⁴Juuda yab gbáń-mi anaalab diba kpá imuŋku ili ŋfunyɔm miŋmoo pu[32].

²⁵Room yab gbáń-mi ndɔ ŋfunyɔm mita pu, bi yáŋkì-mi ataŋkpee kí bàà kpɔ̀-mi diba pu[33], ŋfunyɔm mita pu ní iŋaliŋfi múĺ nnyimin nnyim bàà làá yòon̄-mi, ki gbíntì dalba nnyimin ŋwiimpu nì kunyeeu.

²⁶M-saŋkiŋŋi ŋin m cōom̀ tikpilee poonee, m kántì dinimbinaamandi inyiŋgbeenni, ki kántì dinimbinaamandi digaŋgam dambi cee, ki kántì dinimbinaamandi m-jutiibi Juuda yab nì bin kaa sá Juuda yabee cee[34], ki kántì dinimbinaamandi ntimu poon nì kuteeun. M kántì dinimbinaamandi tiŋku pu, nì bin mɔ́ntí yii bi sá Kriisitoo yabee cee.

²⁷M túń atuun ki gīī, ki ká dinimbinaamandi ki jíń falaa, kaa gèeǹ. Ŋkùm nì nnyinnyoo cúú-mi, m gbíntí ŋkùm múlmul, tiwool cútí-mi tiwampeeŋkaal kpá ḿ pèen̄.

²⁸Falaabi tikpil kíǹ maa lī. Baabadalee Kriisitoo nikitiŋ kɔkɔ bɔti sá-mi diwaŋgul ní ki nyìm̀ m-pu.

²⁹Un kaa pɔ̄ɔ̄yee puee, see ma mun ń nīn bí kii úŋ̀wuee kí taa nīn pɔ̄ɔ̄. Ubɔ yaa lítì ikpitinee, man ní an wù pɔ̀lpɔl.

³⁰An yaa sá ḿ pàkà m-bee, m-wɔfii pu ní m bàà pàkà m-ba.

³¹Unimbɔti ti-Dindaan Yeesu Baa yindi ń ká inyɔŋki kí nīn pée cá, di sá u nyí yii tin m sòoǹ nee maa mɔ́ntí.

³²M nín nìn bí Damaasi tiŋkinee, gɔmina un nìn bí ubɔti Areetaasi tundinee nìn yāntì u-soojab yúl̀ kitiŋ gundi punyɔmmu caŋin kí bàà cúú-mi,

³³ní m-bɔɔbi dū-mi ki ŋá kukabikun ki dūu nāatì nì ŋŋmii digundi tɔkɔlau pu, ní m ŋmátì[35].