Read Ntcham 2 Corinthiens 13 Bible Online

2 Corinthiens 13 - Ntcham bible

2 Corinthiens 13

¹Ntataatiim ní m dòoń ni-cee nee. An ŋmàn̄ Unimbɔti gbɔŋku poon yii: «Binib bili kii bita seerau di cáá mbaamɔn[38].»

²M cáá tibɔti kí kpāafì bin bin nìn ŋá ikpitee nì bin kɔkɔ kíǹee. M nín nìn dɔ́miń ni-cee nliliitiimee, m nìn lī-tì ní ki gíti bíi bùsī ki lì díǹ m-kpátam ni-cee. M nín làá dāan̄ min nee, m làá ŋá an nín máaǹ puee ní, maa làá kpèè ubɔ nimbiin.

³Kii ni nín là kí ká kudaaŋŋu yii Kriisitoo di dì m-pu ki sòoǹee, ni làá lafun ká. Kriisitoo dàkà u-pɔŋŋu ni-kansikin, ama waa sá kiwɔfii.

⁴Tiŋman, u dū u-ba ki ŋá kii uwɔfee ní bi kpáá-u ndɔpuntikaa pu, ama Unimbɔti pɔŋŋu yāntì u bí dimaŋfalin. Ti nì u nín ŋá ubaantee puee, ti mun bí iwɔfin ní, ama u-puee ti cáá dimaŋfal. Nì Unimbɔti pɔŋŋu puee ti bí dimaŋfalin ki tīī-ni.

⁵Ní cɔ̄ŋkìmaan ni-ba kí kpèè ni yaa lafun fōō Yeesu Kriisitoo ki kíí tiŋman. Ní kpèè ni-ban tiŋan, naa ká yii u bí ni-naaa? U bí ni-ni, asee ni nín cɔ́ŋkì ki kpēēyee, ni yaa ká yii naa fōō-u ki kíí baba.

⁶Míǹ ní ni làá béé yii ti mun cɔ́ŋkì ti-ba ní ki béè yii ti sá Kriisitoo tɔntɔnliibi tiŋman.

⁷Ti mèé Unimbɔti ni-pu ní taa ŋá ikpiti iba. An kaa sá kí dàkà ti-ba yii ti túń ditummɔntiil, ama ti là ní nīn ŋáań tiŋan báà bi yaa bíi sòoǹ ki bíiĺ timbi.

⁸Kun puee taa cáá mpɔn kí dūú já nì ibaamɔn, ti cáá mpɔn kí dūú tūtuǹ ibaamɔn ní.

⁹An mɔ̄ǹ-ti ŋyunti kamaa timbi yaa bí iwɔfin, nimbi ń nīn pɔ̄ɔ̄yee pu. Ti mèé Unimbɔti ni-pu yii ní nīn sá binimbɔtinooliibi tiŋman pu yab.

¹⁰Kun pu m bí ndan ki ŋmà-nee di sá maa là ḿ dāá bàń ni-cee kí dū mpɔn ŋun ti-Dindaan tīī-mee kí wɔ́b́-ni. Mpɔn gbantee sá ḿ dūú tūtuǹ-ni ni-nimbɔtinóotam ń cù nyɔkɔpu ní, an kaa sá kí dūú nàan̄-ni.

¹¹Nnabiyaamu, tin m làá dū kí kàan̄ nee sèé: ní nīn cáámaan dipɔɔpindi, ni-nimbɔtinóotam ń nīn sá tiŋman pu yal kí nīn tìì tɔb kunyannyaau, kí nīn pēē kinyɔkɔ nì ŋgbansɔŋfi poon. Unimbɔti un sá dineendi nì ŋgbansɔŋfi daanee làá nīn bí ni-cee.

¹²Ní jāam̀maan tɔb kí kpàl̄ tɔb nnabiyaamin. Unimbɔti nikitil din bí dooyee jáaḿ-ni.

¹³Ti-Dindaan Yeesu Kriisitoo ŋanti nì Unimbɔti neendi nì u-Fam nín cāabìń nnyɔɔpee ŋuŋyee ń nīn bí ni-kɔkɔ cee[39].