Read Ntcham 2 Corinthiens 2 Bible Online

2 Corinthiens 2 - Ntcham bible

2 Corinthiens 2

¹An pu ní m ká yii an ŋān̄ ḿ taa dāan̄ ni-cee kí fàtīí tí kɔ́ǹ-ni kunimbaau.

²Kun puee nimbi di tìì-mi kunyannyaau. Kin m yaa kɔ́ǹ-ni kunimbaauee, bilab di làá gíti tīī-mi dipɔɔpindi?

³Kun yì-tì m ŋmàn̄-ni kugbɔŋuee di sá maa là kí bàń kí ká bin bàà làá tīī-mi dipɔɔpindee ń kɔ́ǹ-mi kunimbaaun, di sá m nyí yii man pɔɔpindi sá nimbi yal, ní ni mun pɔɔpindi sá man yal.

⁴An nìn sá-mi kunimbaau nì dipɔɔbiildi nì nsiim ní m ŋmàn̄-ni kugbɔŋu. An kaa nìn sá kí kɔ́ǹ-ni kunimbaau pu ní m ŋmàn̄-ni, ama an nìn sá ní ŋmā kí béé dineendi din bulifi m cáá ni-puee ní.

⁵Unil un di yaa cáań kunimbaau neeyee, an kaa sá man baba ní u kɔ́ǹ kunimbaau, u kɔ́ǹ ki kpáaǹ ni-kɔkɔ ní. Ama kí taa sòoǹ kí càatēe, ni-kansikin biba ní u kɔ́ǹ kunimbaau.

⁶Ni-kansikin kupaau nín kpáfì kinyɔkɔ ki dáaĺ udaan tafal miŋyee ŋmāntì.

⁷Kɔŋkɔnnee ni máaǹ kí dūú pɔ̄-u kí tīī-u kunyannyaau ú taa gíti kɔ́ kunimbaakpaŋkpaaŋŋun.

⁸An puee m gbāam̀-ni, ní dàkàmaan ni-neendi udaan pu.

⁹M nìn ŋmàn̄-ni tibɔtee kí cɔ̄ŋkì-ni kí kpèè yii ni tɔ́-mi tiŋman puɔɔɔ!

¹⁰Ni yaa dū unil un kpitii ki pú-uee, ma mun làá dūú pɔ̄-u. Tiba yaa bí ki sá ḿ dūú pɔ̄ udaanee, nimbi puee, m dūu pú-u Kriisitoo nimbiin,

¹¹án nín làá ŋá pu tí taa yàntī Sitaan ń jī ti-pu dinyandee, kun puee ti nyí u-landɔkɔŋu.

¹²M nín bàn̄ Troowaasi tiŋkin kí sòoǹ Kriisitoo bɔmɔntiitee, m nìn ká yii ti-Dindaan pīitì-mi nsan ḿ sòoǹ-tì.

¹³Ama m nín kaa ká m-nabiki Tiiti niinee, m-pɔbil kaa nìn sɔ̀m̀ ḿ kàl̄ niin. An pu ní m yíkì bi-cee ki búntì Maseeduwaan[5].

¹⁴Tí jāam̀ Unimbɔti Kriisitoo pu, u nín cáá ti mun ki ŋáań u-jajil faalii poon puee. Ti nì Kriisitoo nín ŋá ubaantee puee, u dì ti-pu ki gbìtī ajan kɔkɔ Kriisitoo bɔti kii talaaluee.

¹⁵Ti sá kii talaalu un sɔ́fèe ní Kriisitoo cáa tìì Unimbɔti. Míǹ ní ti tí sá ki tīī binib bin ká difiilee nì bin mun wáŋkèe.

¹⁶Bin wáŋkèe ceeyee, an sá ŋkúm nunuŋu ŋun cáǹ ŋkúminee, ní bin ká difiilee ceeyee, an sá dimaŋfal sɔnsɔfiŋu ŋun tìì dimaŋfalee. Ŋma di bàn̄ kí tɔ̄ an tundi gbanti?

¹⁷Timbi kaa sá kii binib tikpil bin dū Unimbɔti bɔti ki kpántì dibàntilee, ti sá ibaamɔn nib ní, Unimbɔti di lēē-ti ki tú. Ti nín ŋá ubaanti nì Kriisitooyee pu ní ti sòoǹ Unimbɔti nimbiin.