Read Ntcham 2 Corinthiens 3 Bible Online

2 Corinthiens 3 - Ntcham bible

2 Corinthiens 3

¹Mimmee ti fātìi tí bíi dàkà ti-ba yii ti ŋá tiba deeyaaa? Àá an bàlifī yii tí cáań tigbɔn tin bi ŋmàn̄ ki pàkā-tee kí dàkà-ni naaa? Àá an sá yii tí bàlifì-ni ní ŋmà kugbɔŋu kí pàkà-ti ní, a lì kii biba nín ŋáań puee?

²Nimbi Kɔranti yab di sá kugbɔŋu kun báà ŋma wāĺ ki kàaǹee, ní kugbɔŋuee ŋmàn̄ ti-pɔbiliŋin.

³Báà ŋma wāĺ yii ni sá kugbɔŋu kun Kriisitoo dī ti-pu ki ŋmàn̄ee ní. Waa ŋmàn̄ nì ŋgbaŋŋmamɔɔn. Ama Unimbɔti un bí dimaŋfalinee Fam di ŋmàn̄. Waa ŋmàn̄ ataŋkpee pu, u ŋmàn̄ binib pɔbiliŋin ní[6].

⁴Kriisitoo puee dimákal din ti cáá Unimbɔti puee dee.

⁵Di sá taa bí yii ti ŋūǹ kí ŋá tiba ti-ba pɔŋŋu pu. Tin ti yaa ŋúń ki ŋée, an sá Unimbɔti pɔŋŋu di cāntì ti ŋúń ki ŋá.

⁶Kun puee úǹ di tìì-ti ŋŋmam ní ti sòoǹ dipoompɔndi din u ŋée Bɔmɔntiiti. Dipoondi gbanti kaa sá mara un nìn sá nì tiŋmaŋmabitee, ama dì sá nì Unimbɔti Fam tundi ní. Di sá mara kù ní, ama Unimbɔti Fam míǹ tìì binib dimaŋfal ní[7].

⁷Unimbɔti nín nìn ŋmàn̄ u-marab ataŋkpee puee, bi nìn ká u-nyooti. Ní Mooyiisi mun nimbiin nìn kíǹ ki jìl̀, ní Isirayeel yab kaa nìn gíti ŋūǹ kí kpèè-u[8]. An nyootee sá tin jītée ní. Marab bin bi yaa yīntì an cāabìń ŋkúmee yaa nìn dɔ́miń nì kunyaaŋŋu míǹ,

⁸kin ataa aŋa pu ní Unimbɔti Fam min tìì dimaŋfalee nyooti kaa máaǹ ki jítiǹ míǹ.

⁹An yaa sá yii marab bin làá cáań ŋkúmee pu ní Unimbɔti nyooti dɔ́miń ki jìl̀ mimmee, mana ní Unimbɔti Fam tundi din làá yàntī binib ń kpántí deedeedambi Unimbɔti nimbiinee nyooti làá nīn jìl̀ dee?

¹⁰Taa ŋūǹ kí dū tinyool tin nìn jítèe kí ŋmàntīǹ tin bí nee báà fiii. Kun puee, tíǹee sá tikpaandi ní.

¹¹Tin bí ki làá jītée di yaa cáá tinyool mimmee, kin tin làá nīn pée bí kí nīn cée fáà!

¹²Ti nín cɔ́tí tin pu tikpilee dee. An pu ní ti cáá dipɔbil ki sòoǹ ki cántí tikɔkɔ.

¹³Timbi kaa làá ŋá kii Mooyiisi nín nìn dū ŋŋaabu ki bīiǹ u-nimbiin Isirayeel yab ń taa kpèè-u kí nīn cí ŋyunti ŋun ní ŋwalifee làá dāá lēēyee[9].

¹⁴Ama bi-landɔkɔi kaa cútí tibɔti malaa, a lì kii ŋŋaabuee dáá gbíntì ki lìkī bi-nimbiinee. Di sá yii bi yaa kàaǹ Dipooŋkpikil gbɔŋku poonee, baa gbìl̀ taapu, áli ki dāa sāā díǹee, bi-landɔkɔi kaa cútí tibɔti. See unil un fōō Kriisitoo ki kííyee baba nimbiin ní ŋŋaabu bìitī.

¹⁵Áli ki dāa sāā díǹ, bi yaa bíi kàaǹ Mooyiisi gbɔntee, an bí kii ŋŋaabuee lìkī bi-landɔkɔi ní baa gbìl̀ taapuee.

¹⁶Unil un yaa fōō ti-Dindaan ki kííyee nimbiin ní ŋŋaabuee lèekī[10].

¹⁷Di sá yii ti-Dindaanee, Ŋfam dee. Laakin ti-Dindaan Fam yaa bée, niin ní dibatɔl bí.

¹⁸Timbi bin kɔkɔ nimbiin ŋŋaabuee lēēyee di sá bin pu ní bi wāĺ ti-Dindaan nyootee. Ti-Dindaan un di sá Ŋfamee di kpántí-ti míǹ, ní ti náań nì u, ní ki cáá tinyool tin wīintí ki cée.