Read Ntcham 2 Corinthiens 6 Bible Online

2 Corinthiens 6 - Ntcham bible

2 Corinthiens 6

¹Di sá yii timbi nì Unimbɔti di bí ki tūǹ ditundi, an pu ní ti mèé-ni yii ní taa yàntī diyimɔɔl din ni fōō u-ceeyee ń ŋá fám.

²Unimbɔti lī u-gbɔŋku poon yii: «M-niti yuntiŋuee, m nìn pílifiǹ-si, m nìn tútúǹ-si difiil wiiŋŋu a ká difiil[16].» An puee Unimbɔti niti yuntiŋu sèé, difiil wiiŋŋu sèé.

³Taa là kí bàkan̄-ni báà tiba nì tiba poon, án nín làá ŋá pu ubɔ ń taa ká ibɔkpiti iba ti-tundi nee pu kí lèe.

⁴Ama ti pée dàkà ti-bimbim kɔkɔ poon yii ti sá Unimbɔti tɔntɔnliibi ní, ní ki jīǹ kimɔtii tikpil, falaabi nì kunimbaau nì dinimbinaamandi poon.

⁵Bi gbáà-ti ki cáǹ-ti ki pìintí kudii[17], ki mèé tijáti ki tòó ti-pu, ki yàntī ti tūǹ atuun ŋin pɔ̄ɔ̄yee, kaa kāntí ŋgeem, kaa jīǹ tijin.

⁶Ti-nyaŋkanti nì ti-nyil nì kimɔtii nì ti-niti nì Circir Fam pɔŋŋu nì dineembaamɔndi ní ti cáa dàkà yii ti sá Unimbɔti tɔntɔnliibi.

⁷Ti sòoǹ Unimbɔti bɔti tin sá ibaamɔnee nì u-pɔŋŋu ní ki dàkà yii ti sá Unimbɔti tɔntɔnliibi. Ti nín yú deedee nì Unimbɔtee di sá tijanjawan tin ti cáa jáàyee, nì tin ti cáa cí ti-bee.

⁸Ŋyunti ŋubɔee, bi tìì-ti tinyool, ní ŋyunti ŋubɔee, bi kɔ̄ntí-ti icoo. Ŋyunti ŋubɔee, bi sòoǹ ti-pu tin ŋān̄ee, ní ŋyunti ŋubɔee, bi sòoǹ ti-pu tikpitil mun. Bi kpèé-ti kii binyimɔndambee, ama ní ti mun sòoǹ ibaamɔn.

⁹Bi kpèé-ti kii báà ubɔ kaa nyí-tee, ama ní báà ŋma nyí-ti. Bi kpèé-ti kii bin làá kpúee, ama ní ti mun kaa kúù. Bi dátí ti-tafal, ama ní kaa kù-ti.

¹⁰Bi kɔ̄ntí-ti kunimbaau, ní timbi bí dipɔɔpindin. Bi kpèé-ti yii ti sá bisoodambi, ama timbi di tìì binib tikpil Unimbɔti gaajati. Bi kpèé-ti yii taa pée cáá tiba nì tiba, ama ní ti mun di cáá tikɔkɔ nì tikɔkɔ.

¹¹Nimbi Kɔranti yab, ti sòon̄ nì ni ti-poon bɔti kɔkɔ ki pīitì ti-pɔbiliŋ ki tīī-ni.

¹²Timbi pīitì ti-pɔbiliŋ ki tīī-ni, nimbi di kaa pīitì ni-yaŋ.

¹³M bíi sòoǹ nì ni kii ubaati nín sòoǹ nì u-biyaamu puee ní: kii ti nín néeń-ni miŋyee puee, pìitīmaan ni-pɔbiliŋ kí tīī-ti.

¹⁴Ni nì binib bin kaa nyí Unimbɔtee ń taa kpāfì kí ŋá ubaanti. Nnyɔɔpee ŋulɔŋu di bí tin bí deedeeyee nì tin kaa bí deedeeyee kansikin? Mana ní dibɔmbɔndi nì ŋwalifi ŋūǹ kí kpāfì?

¹⁵Mana ní Kriisitoo nì Sitaan ŋūǹ kí pèen̄ kinyɔkɔ? Àá ba nyɔɔpeeŋu di bí unimbɔtinool nì un kaa nyí Unimbɔtee kansikin ní?

¹⁶Mana ní Unimbɔti nì awaa ŋun kí pèen̄ kudii? Timbi sá Unimbɔti un bí dimaŋfalinee diiku ní[18], a lì kii Unimbɔti u-ba nín lī puee, yii: «M làá nīn kóò m-nibul cee, ní kí nīn còom̄ bi-kansikin. Man di làá nīn sá bi-Nimbɔtiu, ní bíǹ ń nīn sá man nibul.»

¹⁷An pu ní Unimbɔti lī u-nibul yii: «Ní nyā binib nee kansikin kí gàntīmaan ni-ba, kí taa gbēē tin sá tijɔkɔndee, ní man ń nín fōō-ni,

¹⁸kí nīn kíǹ ki sá ni-Baa, ní ni mun ń nīn kíǹ ki sá man jipɔmbi nì m-bisalib. Ti-Dindaan Mpɔŋkɔdaan di lī míǹ[19].»