Read Ntcham 2 Corinthiens 8 Bible Online

2 Corinthiens 8 - Ntcham bible

2 Corinthiens 8

¹Nnabiyaamu, ti là ní béé Unimbɔti nín ŋá tiŋan tin ki tīī Kriisitoo nikitiŋ ŋin bí Maseeduwaan ŋi túń ditundi diŋyee ní.

²Bi nìn bí agìń tikpil poon, ama ní bi-pɔɔpindi nìn gíti lákatì. An di yāntì ní min kɔkɔ bi sá bisoodambee, bi dàkā bi-niti an nyāŋkì.

³M lēē bi-mɔ́ɔŋŋu yii bi tīī nì dipɔbil diba min bi ŋúńee áli ki jítiǹ min bi ŋūǹee pu kpataaa.

⁴Bi gbāam̀-ti tikpil, yii tí pée pɔ̄ bi mun diyimɔɔl bí tɔ̄ tootoo kí tūtuǹ Kriisitoo yab bin bí Juudeeyee[20].

⁵Bi tīī ki jítì min pu timbi bàà dàkafēe, di sá yii bi dá láá péé ki dū bi-ba ki tīī ti-Dindaan ki wāatì ní ki ŋá Unimbɔti nín là puee, ki dū bi-ba ki tīī ti mun.

⁶An pu ní ti gbāam̀ Tiiti yii ú gítiń ni-cee kí tīī-ni kunyannyaau ní púntí ni-tootoou un u nìn tīī-ni kunyannyaau ni kíĺee kí tɔ̄ nì tiniti.

⁷Ni cáá tikɔkɔ nì tikɔkɔ: ni cáá fookii, ki nyí disoondi, ki cáá dinyil, ki cáá difaŋgiil tikɔkɔ pu, nì dineendi ti mun pu. An puee ti là yii ní dū tin kɔkɔ ni cááyee kí dàkà tootoo nee poon ni-niti.

⁸Kaa sá mara ní m bíi tìì-ni, ama m bíi máafí-ni biba faŋgiil ní, ni mun ń ŋmā kí dàkà ni-neendi nín sá ibaamɔn puee.

⁹Kun puee ni nyí tiŋan tin ti-Dindaan Yeesu Kriisitoo ŋá-tee. Úǹ un sá ugaajee, u gíiǹ u-ba usoodaan[21], timbi ń kpántí bigaajab úǹ soodaŋku pu.

¹⁰Man nín ká tin tibɔti nee poonee ní m là kí tùkù-ni: m ká yii an ŋān̄ ní nìkī ni-tundi din ni nìn kíĺ jiilee, kun puee nimbi di nìn péé péé ki kánní an landɔkɔŋu ní ki nìn péé ki tɔ́ mun.

¹¹An puee kɔŋkɔnnee, ní púntímaan ni-tundi gbanti, án nín làá ŋá pu bí dāá ká min ni lēē ni-pɔbiliŋ poon yii ni làá ŋée, ní púntí kí ŋá ni-pɔŋŋu nyɔkɔm.

¹²Ni yaa làá tīī tiba nì dipɔbil dibee, an kaa sá ni nín làá tīī kuŋyee wíiŋŋu di sá tiba Unimbɔti cee, ní tīī min nyɔkɔm ni ŋūǹee di sá.

¹³An kaa sá yii ní dū tin ni cááyee kɔkɔ kí jòò bin kíǹee kí ŋmìntī ni-ba, ama an máaǹ un bi tútúǹee nì un tútúǹ-uee kɔkɔ ń nīn ŋmà ní.

¹⁴Kɔŋkɔnnee ni cáá tikpil kí ŋmā kí tūtuǹ bin kaa cááyee, ní daliŋkin ní ni mun yaa lóòyee, ní bi mun ń jòoń nimbi, míǹ di làá yàntī ni-kɔkɔ ń ŋmàntī.

¹⁵A lì kii Unimbɔti gbɔŋku poon nín lī puee yii: «Un fāā tikpilee kaa cáá ki lákatì, ní tiba kaa lóò un fāā fiiiyee[22].»

¹⁶M jáaḿ Unimbɔti un di tīī Tiiti difaŋgiil ni-pu kii ti mun nín cáá ni-pu miŋyee.

¹⁷Ti nín bālifì-u yii ú cù ni-ceeyee, u kíí-ti yii u làá cù, áli gba úǹ u-ba nìn pée bɔ́ntì yii u dòoń ni-cee.

¹⁸Ti dū u nì kinabiki kin túń dituŋkpaandi Unimbɔti bɔti sòontam poon, Kriisitoo nikitiŋ kɔkɔ pàkà-uee, ki túnní ni-cee.

¹⁹Kriisitoo nikitiŋ mun gíti lēē-u yii ú céeǹ-ti tí cáá tootoo un ti ŋá nì tinitee kí cùnnì Jeerusaleem. An di làá dàkà ti nín néeń kí tūtuǹ ti-jutiibi puee ní kí tīī ti-Dindaan tinyool.

²⁰Taa là biba ń nīn bí ki sòoǹ ki bíiĺ-ti kunimbigbaau kun ti yōoǹ kí cáá yàkatī binib nee pu.

²¹Ti là yii tin ti ŋáańee ń nīn ŋān̄ ti-Dindaan ceeyaaa, kí nīn ŋān̄ binib mun cee[23].

²²Ti túnní-bi ni-cee bi nì ti-nabiki kiba kin ti cɔ́ŋkì ŋfunyɔm tikpil ki ká yii u cáá difaŋgiil tikɔkɔ poonee. Ama kɔŋkɔnnee, u gíti mɔ̄tìi ká difaŋgiil dimákakpaandi din u cáá ni-puee pu.

²³Tiiti úǹ sá man bɔɔ ní ki sá m-tɔntɔnjuti ni-cee. Bin kíǹee, Kriisitoo nikitiŋ di túnní-bi ní bi-bimbim tìì Kriisitoo tinyool.

²⁴Dàkàmaan-bi ni-neendi, Kriisitoo nikitiŋ ń béé ibaamɔn yii ti cáá nsan kí nīn fàal̀ ni-pu.