Read Ntcham 2 Corinthiens 9 Bible Online

2 Corinthiens 9 - Ntcham bible

2 Corinthiens 9

¹An kaa bàlifī ḿ gíti ŋmà-ni kugbɔŋu kí tùkù-ni ti nín máaǹ kí tūtuǹ Kriisitoo yab bin bí Juudeeyee puee.

²M nyí ni-landɔkɔmɔntii pu, m tīī-ni disíndi Maseeduwaan yab cee ki tùkū-bi yii doooo jiil ní nimbi nnabiyaamu Akaayi yab bɔ́ntì, ní ni-faŋgiil tīī binib tikpil kunyannyaau.

³An pu ní m dū nnabiyaamu nee ki túnní ni-cee, án nín làá ŋá pu disíndi din m tīī-nee, bí lafun ká yii ni máaǹ-dèe, kí lafun bɔ́ntí tikɔkɔ kii m nín tùkū-bi yii ní bɔ́ntí puee.

⁴An yaa sá fám, man nì Maseeduwaan yab biba yaa táań ki bāań ní naa láá bɔ́ntì ki dóòyee, ti-mákal din ti cáá ni-puee làá kpántí-ti icoo ní, icoo gbanti làá jī kí kpáaǹ ni mun.

⁵An puee ní m mēē nnabiyaamu nee bí péeǹ timbi kí dāan̄ ni-cee. Ní bɔ́ntí kí ŋá ni-niti tin ni pōoǹ kí ŋée, man dāa bàńee, an bɔ́ntì dee. Míǹ di làá dàkà yii ni tīī nì dipɔbil diba, naa tìì ki yáliŋkí.

⁶Téetímaan yii un yaa búĺ fiiiyee dāa tí cēē fiii ní, ní un búĺ tikpilee mun dāa tí cēē tikpil.

⁷An puee báà ŋma ń tīī min u-pɔbil fáatì ú tīīyee, án taa nín̄ sá nì kunimbaauaaa, dipabil bɔti, kun puee Unimbɔti néeń un tìì nì dipɔɔpindee ní.

⁸Unimbɔti cáá mpɔn kí tīī-ni tiŋan kɔkɔ nì ti-nyɔkɔm tikpil tikpil, án nín làá ŋá pu ní nīn cáá baabadal tin kɔkɔ ni yaa lèe án lákatí ní nīn cáa tūǹ atummɔnti kɔkɔee.

⁹A lì kii Unimbɔti gbɔŋku poon nín lī puee yii: «Un ŋáań biwɔfib tinitee, Unimbɔti làá bìin̄ u-boon ní u-niti ń nīn pée bí ki cá[24].»

¹⁰Unimbɔti un tìì ukpaal iwambool, ki tìì tijikaalee[25], làá tīī-ni iwambool kɔkɔ nì i-nyɔkɔm kí yàntī í lòoǹ, án nín làá ŋá pu ni-niti ń lòoǹ abimɔntee.

¹¹U làá yàntī ní nīn sá bigaajab kí ŋmā kí nīn ŋáań tiniti, án nín làá ŋá pu binib tikpil ń nīn jáaḿ Unimbɔti tin ni ŋáań ki tìì-bi ti cāabìń-bee pu.

¹²An kaa sá Kriisitoo yab bin lóò tibee ŋmaniŋma ní ni-tundi din ni tūǹee tútúǹ, ama an yàntī binib tikpil jáaḿ Unimbɔti múlmul.

¹³Ni-tundi din ni tūǹee di dàkà binib bin ní ni sée, ní ki yàntī binib nyɔ́ŋkí Unimbɔti ni nín tɔ́ Kriisitoo Bɔmɔntiiti puee, ní ki nyɔ́ŋkí Unimbɔti ni-niti tin ni ŋáań ki tìì bíǹ nì bin kɔkɔ kaa cááyee.

¹⁴Bi làá mèè ni-pu ní ki dàkà-ni dineeŋkpaandi, kun puee Unimbɔti ŋá-ni tiŋaŋkpaandi.

¹⁵Tí jāam̀maan Unimbɔti u-pɔ̄tam nín kaa cáá jutee pu!