Read Ntcham Galates 4 Bible Online

Galates 4 - Ntcham bible

Galates 4

¹M làá tí yòon̄ tibɔŋmantikaal tiba. Di sá yii un làá fōō u-baa gaajawantee yaa dáá sá kibikee, baa ŋūǹ kí gàntī u nì uyumbu, ama u mun di yì tikɔkɔ.

²U dáá bí binib bin ŋúb́-u ki kpèé u-wantee taapu ní ki cí ŋyunti ŋun u-baa yóoǹee ń dāá bàń.

³Míǹ mbaantiim, ŋyunti ŋun taa láá béè Kriisitoo saŋŋuee, ti nìn sá duulinya marab yumbui ní.

⁴An sāā ŋyunti bāańee, ní Unimbɔti túnní u-Jipɔɔn ní ki yāntì unimpu màl̄-u, ní u mun bí Juuda yab marab taapu,

⁵án nín làá ŋá pu ú fīī timbi bin bí mara taapuee kí dū-ti kí kpántí Unimbɔti biyaamuee.

⁶Kun dàkà yii ni lafun sá u-biyaamuee di sá Unimbɔti túnní u-Jipɔɔn Fam ti-pɔbiliŋin. Ŋfamee di yì-tì ti yíì-u yii: «Ti-Baa[18].»

⁷Míǹ puee, aa ti sá uyumbu, a kíǹ ki sá u-biki ní. A nín sá u-bikee puee, ní u tìì-si u-gaajawanti.

⁸Dooooyee, naa nìn nyí Unimbɔti ní ki nìn sá awaa yumbui, awaa ŋin kaa sá Unimbɔti, kaa máaǹ bí nóó-ŋee[19].

⁹Kɔŋkɔnnee, ni béè Unimbɔti, an dàkà yii Unimbɔti di béè-ni. Ba ŋá ní ni gíti là kí gítí duulinya marab bin kaa cáá mpɔn, kaa bí tibanee taapu kí nīn sá bi-yumbui kii dooooyee ní?

¹⁰Ni gàntī iwiin iba yii i sá ikpaan, ki gàntī iŋmal nì iyunti nì abin mbaantiim[20].

¹¹An puee, m fàŋkí yii digìńdi din m gīī ni-puee ń taa ŋá fám.

¹²Nnabiyaamu, m mèé-ni yii ní nīn bímaan kii mamee, a lì kii ma mun nín nìn gíiǹ m-ba kii nimbee. Ama naa ŋá-mi tibeeee!

¹³Ni nyí yii m-weeŋyi di nìn yāntì m sòon̄ nì ni Tibɔmɔntiil mpeepeekaam.

¹⁴Nì min kamaa m-weeŋyee bàà nìn ŋūǹ kí yàntī ní gīiǹ-mee, naa kpēē-mi fámaaa, kaa núutiǹ-mi. Áli gba, ni nìn gíti fōō-mi kii Unimbɔti tuuŋŋuaaa, Yeesu Kriisitoo u-bee ní.

¹⁵Ba ŋá ní an kaa ti mɔ̄ǹ-ni kii dooooyee? Di sá yii m ŋūǹ kí sòoǹ ni-pu yii, ni yaan ŋūǹ, ni bàà lèekī ni-nimbiliŋ kí tīī-mi.

¹⁶Ibaamɔn in m sòoǹ nì nee puee ní naa ti là m-bɔtaaa?

¹⁷Binib nee nín cáá bi-ba ki nākantíǹ-ni dinakándi diŋyee, dàa sá dimɔntiil, bi là kí yàkatī man nì ni kansikin ní, kí dáaliń-ni kí nákáǹ bi-ba.

¹⁸An máaǹ tin ŋān̄ee pu ní unil ń dū u-ba kí nákáǹ-si kí nīn cá jaanjaan, kaa sá m yaa bí ni-kansikinee baba.

¹⁹M-bineeŋkaamu, an tí wù-mi tikpil kii imatiŋweenee kí nīn cí ŋyunti ŋun ni làá dāá kpántí kii Kriisitoo nín bí puee.

²⁰M yaan bímaan ni-kansikin ŋyunti nee kí ŋmā kí béé m nín làá sòoǹ-ni puee! Kɔŋkɔnnee, m bíi yáliŋkí ni-pu.

²¹Nimbi bin là kí nīn bí Mooyiisi marab taapuee, tùkùmaan-mi, naa gbìl̀ marab gbɔŋku poon bɔtaaa?

²²Di sá yii an ŋmàn̄ yii Abraam nìn màl̄ mbininjabiyaamu muli, kiba sá unimpuyumbu biki ní kin kíǹee sá unimpu un yì u-bee biki.

²³U màl̄ uyumbu biki nniyaamin, ama ní unimpu un yì u-bee biki màaltam sá Unimbɔti pòontam[21].

²⁴Tibɔti nee ŋūǹ kí nīn sá-ti tibɔŋmantikaal: binimpoobi bili gbanti ŋūǹ kí dàkà min ní Unimbɔti nìn bóob́ u nì binib kansikinee. Bi nín nìn bóob́ tin Siinaayi jool puee di sá Agaar ní ki màal̀ ŋyumbubiyaamu.

²⁵Agaar gbanti sá Siinaayi jool din bí Bilaalibub tiŋkinee, ní ki sá Jeerusaleem nì u-biyaamu mun bí kuyuŋun díǹ pu nan ní[22].

²⁶Ama Jeerusaleem un bí yilpuee sá un yì u-bee, úǹ di sá timbi na.

²⁷Kun puee an ŋmàn̄ yii: «Unimpuŋmaŋŋmanti un kaa ŋúń ki màl̄ ki kée, án nīn mɔ̄ǹ-si! Sii un kaa nìn nyí imatiŋween ki kée, á nīn kūuntí nì dipɔɔpindi! Kun puee unimpu un bi cāntèe màl̄ mbiyaamu ki jítiǹ unimpu un cáá calee[23].»

²⁸Nnabiyaamu, míǹ ní nimbi sá Unimbɔti pòontam biyaamu, kii Isaaki nín nìn sá puee.

²⁹Dooooyee, kibiki kin bi màl̄ nniyaaminee nìn páb̀ kibiki kin Unimbɔti Fam yāntì bi màl̄ee. Ní áli nìn díǹ an gbíntìi sá míǹ ní.

³⁰An ŋmàn̄ Unimbɔti gbɔŋku poon yii ba ní? An ŋmàn̄ yii: «Jà unimpuyumbu nì u-jipɔɔn. U-jipɔɔn nì unimpu un yì u-bee jipɔɔn kaa máaǹ kí yàkatī bi-baa gaajawanti[24].»

³¹Míǹ puee, m-nabiyaamu, timbi sá unimpu un yì u-bee biyaamu ní, taa sá unimpuyumbu biyaamu.