Read Ntcham Galates 6 Bible Online

Galates 6 - Ntcham bible

Galates 6

¹Nnabiyaamu, ni yaa cúú ubɔ bíi ŋáań ikpitee, nimbi bin Unimbɔti Fam kpòotēe ń ŋá soooo kí gíiǹ-u nsammɔnti poon, ní kí nīn kpèé ni-ba tiŋan ki mun ń taa lítí ni-ba.

²Ní nīn tútúǹ tɔb ni-gìŋ́ŋi poon, mimmee, ni bíi ŋáań min Kriisitoo marau lēe dee.

³Ubɔ yaa dākafì yii u bí tiban ní kaa bée, udaan kíiĺ u-ba ní.

⁴Báà ŋma ń cɔ̄ŋkì u-ba kí kpèè u-tuuŋŋi, ní u yaa làá nín gāā u-bindaaa, ú gāā an nīn sá úǹ u-ba ŋmaniŋma tuuŋŋi pu. Ú taa dū kí ŋmàntīǹ u-jutiibi yaŋ pu.

⁵Di sá yii báà ŋma máaǹ kí kpèè u-ba bɔti ní.

⁶Un bi yaa dàkà Unimbɔti bɔtee, udaan máaǹ kí lēē u-gaajawanti tin kɔkɔ u cááyee poon kí tīī un dàkà-uee.

⁷Taa nín̄ kíiĺmaan ni-ba: baa gbíilíǹ Unimbɔti. Di sá yii kun unil yaa búĺee, kúǹ ní u dāa cēē[28].

⁸Un ŋáań min u-bimbikpitim lèe búĺ u-bimbikpitim dee, ní kí dāá cā ŋkúm. Ama un ŋáań min Circir Fam lèe búĺ Circir Fam dee, ní kí dāá cā dimaŋfal din kaa kúntée.

⁹Tí taa gīī kí gbèen̄ tiŋan diŋál. Ti-wunti yaa kaa yɔ̄tì, ŋyunti yaa láa bāań, ti làá dāá fōō tipaal.

¹⁰Míǹ puee, ŋyunti ŋun poon ti cáá mpaan nee, tí nīn ŋáań báà ŋma tiŋan, ama cilinjee tí nīn ŋáaḿmaan timbi nì bin pēē nnimbɔtisanee tiŋan.

¹¹Kpèèmaan, m nín dū m-ŋal ki ŋmàn̄ tiŋmaŋmabiti an gbìfì puee!

¹²Bin téekí-ni ní gíí dikpancandee là binib ń nīn nyí bi-pu dee. Kun pu bi ŋáań mimmee di sá baa là kí ká digìńdi Kriisitoo dɔpuntikaaŋu pu.

¹³Di sá yii bin gífì dikpancandee bi-ba kaa ŋúb̀ Mooyiisi marab. Kun pu bi là ní gííyee di sá bi là kí gāā bi-biŋŋi yii, ni-wunti daaŋku nee, bíǹ di páb́-ni ní ni ŋá.

¹⁴Maa là kí gāā m-bindi tiba pu kpataaa an yaa kaa sá ti-Dindaan Yeesu Kriisitoo dɔpuntikaaŋu baba pu. Man ceeyee duulinya kpíì ndɔpuntikaa pu, ní duulinya ceeyee ma mun kpíì ndɔpuntikaa pu.

¹⁵A yaa gíí dikpancandaaa, a yaa kaa gííyaaa, an kaa páb́, tin páb́ee di sá á kpántí unipɔɔn.

¹⁶Bin kɔkɔ làá nóó min m lī nee, Unimbɔti ń tīī-bi ŋgbansɔŋfi kí sɔ̄ bi-saai, ki kpáaǹ bin sá Isirayeel yab kiŋkiŋ Unimbɔti nibulee.

¹⁷Kí pée yòon̄ díǹ kí nīn cá, ubɔ ń taa ti ŋá-mi digìńdi, kun puee m-wunti buŋwati di sá Yeesu daanti.

¹⁸Nnabiyaamu, ti-Dindaan Yeesu Kriisitoo ŋanti ń nīn bí ni-pu! Ameeni.