Read Ntcham Ephésiens 1 Bible Online

Ephésiens 1 - Ntcham bible

Ephésiens 1

¹Man Pɔɔl un Unimbɔti lēē ḿ nīn sá Yeesu Kriisitoo kpambalee di ŋmàn̄ kugbɔŋu nee. M ŋmàn̄-ku kí tīī nimbi Unimbɔti yab bin kóò Eefeesi tiŋkin[1] ki yú deedee, ni nì Yeesu Kriisitoo ŋá ubaantee ní.

²Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.

³Ti jáaḿ Unimbɔti un sá ti-Dindaan Yeesu Kriisitoo Baayee u nín ŋá-ti tiŋan tin, ki dī u-Fam pu ki tīī-ti yilpu wammɔntiiti kɔkɔ ti nì Yeesu Kriisitoo nín ŋá ubaantee puee.

⁴Di sá yii, kí wàatī Unimbɔti ń náań duulinyee, u pée lútì-ti ki yóoǹ tí nīn sá u-yab, ti nì Kriisitoo ń ŋá ubaanti, tí nīn bí circir, ú taa ká ti-pu ikpiti iba. Unimbɔti neendi puee,

⁵ní u nìn pée lēē ki yóoǹ dooooyee yii, Yeesu Kriisitoo puee, u làá dāá dū-ti kí kpántí u-biyaamu. Di sá yii an nìn ŋān̄ u-cee ú ŋá míǹ,

⁶án nīn sá-u tinyool, tiŋaŋkpaandi tin u dī u-Jipɔnneeŋkaau pu ki ŋá ki tīī-tee pu.

⁷Kun puee, Kriisitoo kúm pu ní u fīī-ti ki nyántì tikpitilin, ní ki dū ti-kpitii ki pú-ti[2]. U ŋá míǹ kí dàkà-ti u-neendi nín wīikí min bulifee ní.

⁸U-neendi gbanti nín wīikí tikpil puee, ní u tīī-ti iciin nì dinyil.

⁹Di sá yii u yāntì ti béè u nín là kí dī Kriisitoo pu kí ŋá tin nìn bí dibalin dooooyee.

¹⁰Tin u lēē kí ŋée di sá, ŋyunti yaa láa sāāyee, ú dāá kóoǹ tin bí yilpuee nì tin bí taapuee kɔkɔ kí kpāfì, Kriisitoo baba ń nīn sá ubɔti.

¹¹Unimbɔti ŋáań tikɔkɔ kii u nín lēē ki là kí ŋá miŋyee ní, di sá yii u lútì-ti ki yóoǹ dooooyee tí nīn sá u-yab, ti nì Kriisitoo nín ŋá ubaantee pu.

¹²Mimmee, timbi bin sá bipeepeekaabi ki máká Kriisitoo puee, tí nīn pàkà-u u-nyooti pu.

¹³Nimbee, ni gbìl̄ ibaamɔn bɔti tin sá Kriisitoo Bɔmɔntiiti ki cáań-ni difiilee. Ni nín fōō ki kííyee pu, ní Unimbɔti dū u-daaŋku ki dáań-ni. Kudaaŋŋuee di sá Circir Fam min u nìn pōoǹee.

¹⁴U-Fam min u tīī-tee di dàkà yii difakal[3] din u pōoǹ kí tīī-tee dáá bíń boon ki dòoń ti làá fōō-dì. Mì tīī-ti dimákal yii ti làá dāá fōō difakalee ŋyunti ŋun Unimbɔti yaa láa nyántì u-yab kɔkɔ doo ki cáa cūnnì u-ceeyee. U ŋá míǹ tí nīn pàkà-u u-nyooti pu ní.

¹⁵An puee, m nín gbìl̄ bi sòoǹ ni-fookiiu un ni cáá ti-Dindaan Yeesu puee, nì dineendi din ni cáá Unimbɔti yab kɔkɔ puee,

¹⁶m yaa bíi mèéyee m jáaḿ Unimbɔti ni-pu múlmul.

¹⁷M mèé ti-Baa tinyooldaan un sá ti-Dindaan Yeesu Kriisitoo Nimbɔtiuee ú tīī-ni iciin ní ŋmā kí béé-u, kí nīn nyí un Unimbɔti sée.

¹⁸M gíti mèé-u yii ú ŋmíntí-ni ní wāl̀ tiwammɔntiil tin pu u yíiń-nee, ní béé tigaajati tin u kpáafì ki yóoǹ nimbi bin sá u-yabee nín wīikí ki cáá tinyool puee,

¹⁹ní béé u-pɔŋkpaaŋŋu ŋun jítiǹ tikɔkɔ u cáa tūǹ timbi bin fōō-u ki kííyee pu atuunee. U-pɔŋkpaaŋŋu gbanti mbaantee ní u dàkā,

²⁰ŋyunti ŋun u nìn fīkitì Kriisitoo ditaŋkpiilin ki yāntì u cūtìi kāl̀ u-ŋaŋgiil pú yilpuee[4].

²¹Niin ní Kriisitoo tɔ́kɔ́ tikɔkɔ pu ki jīǹ dibeel biyidambi nì bibɔtiibi nì bipɔndambi kɔkɔ pu[5]. Báà an yaa yāntì ki sá uŋyee, úǹ di jítiǹ báà ŋma duulinya un poon ti bí nee, nì un dáá bíń ki dòońee mun poon.

²²Unimbɔti dū tikɔkɔ ní ki ŋá Kriisitoo taapu[6]. U dū-u tɔ́kɔǹ tikɔkɔ pu ní ki dū-u ki ŋá Kriisitoo Nikitil yil.

²³Kriisitoo Nikitil di sá Kriisitoo wunti. Dinikitilee ni ní Kriisitoo bí gbīŋgbim ní Unimbɔti bí Kriisitoo ni mmɔm[7].