Read Ntcham Ephésiens 2 Bible Online

Ephésiens 2 - Ntcham bible

Ephésiens 2

¹Dooooyee, ni nín nìn yìntī ki ŋáań ikpiti iŋyee puee, ni nìn kpíì Unimbɔti nimbiin.

²Ni nìn ŋáań kii duulinya yab nín pée ŋáań puee ní, ki nóó arasiniibi bɔtiu[8] un bí kutaa pu ki yàntī nnibiyaamu kaa tɔ́ Unimbɔtee.

³Ti-kɔkɔ mun nìn pée bí míǹ ní dooooyee, ki nóó timbi ti-ba nín là puee ní ki ŋáań min ní ti-pɔbiliŋ nì ti-landɔkɔi fáatèe. Ti nín nìn bí miŋyee, Unimbɔti tafadaaldi nìn dɔ̄ ki cí-ti kii an nín dɔ̄ ki cí bin béeyee puee ní.

⁴Ama, Unimbɔti sūǹ binib saai tikpil. U-neeŋkpaandi din u cáá ti-puee yāntì,

⁵nì min kɔkɔ ti nìn bí ŋkúmin ti-kpitii puee, u fātìi tīī-ti dimaŋfal ti nín kpáfì nì Yeesu Kriisitooyee. An sá u-ŋanti pu ní ni ká difiil.

⁶Ti nì Kriisitoo nín ŋá ubaantee pu ní Unimbɔti fīkitì ti nì u, ki yāntì ti nì u kā yilpu.

⁷U dī Yeesu Kriisitoo pu ní ki ŋá-ti tiŋan gbanti, kí dàkà bin làá dāá dāan̄ boonee u-ŋanti nín wīikí ki jítiǹ tikɔkɔ puee.

⁸Di sá yii Unimbɔti ŋanti pu nì ni nín fōō Kriisitoo ki kííyee pu ní ni ká difiil. Difiil gbantee, naa ŋá tiba ní ki ká-dì, u pú-ni-dì faalaa ní.

⁹An kaa tí sá ditundi pu, ní ubɔ ń nīn cáa gà u-bindi.

¹⁰Kun puee ti sá Unimbɔti wannaaŋkaati ní. Ti nín ŋá ubaanti nì Yeesu Kriisitooyee ní u fātìi náań-ti mpɔm, tí ŋmā kí nīn tūǹ atummɔnti ŋin u nìn bɔ́ntì ki yóoǹ tí nīn tūǹee.

¹¹An puee, ní téetímaan dooooyee ni nín nìn bí miŋyee. Naa sá Juuda yab maaliŋun, nimbi ní Juuda yab bin gífí akpancanee yíì yii bin kaa gífée. (Ama digiil gbantee, an sá kudaaŋŋu kun unil pée ŋáań u-wunti pu fámee ní.)

¹²Téetímaan yii, ŋyunti gbantee, naa nìn dáá nyí Kriisitoo, ni nìn sá binicambi ní. Naa nìn sá Isirayeel tindambiyaamu. Unimbɔti nín nìn ŋá mpèé nì u-yab ki pōoǹ-bi dipoondee, ni nìn kpá poon. Ni nìn bí duulinyan kaa nyí Unimbɔti, kaa cɔ́tí tiba mun pu.

¹³Ama nimbi bin nìn dátiǹ-uee, kɔŋkɔnnee ni nì Yeesu Kriisitoo nín ŋá ubaantee, ni sútìń ki pìl̄-u Kriisitoo kúm pu.

¹⁴Di sá yii úǹ Kriisitoo di sá timbi gbansɔŋfiŋu. Úǹ di yāntì Juuda yab nì bin kaa sá Juuda yabee kpántì dinibubaantiil. Di sá yii kináŋ nìn pītì ti-kansikin kii digundee, ní u dū u-maŋfal ki tīī ki wīī digundee.

¹⁵U kpītì Juuda yab marab nì tin bi nìn pée ŋáańee kɔkɔ. Ti nì u nín ŋá ubaantee pu ní u dū anibul alee ki ŋá dinibubaantiil din sá dipɔndee, ní ki cáań-ti ŋgbansɔŋfi.

¹⁶Kriisitoo kúm ndɔpuntikaa pu di kúntì kináŋ, ki cāntì Juuda yab nì bin kaa sá Juuda yabee kpántì tiwumbaantiil, bi nì Unimbɔti mɔ́ɔkì.

¹⁷U dɔ́miń duulinyan ki sòon̄ dipɔɔsɔŋkil bɔti ki tīī nimbi bin kaa sá Juuda yab ki dátiǹ Unimbɔtee, nì timbi bin sá Juuda yab ki pìlīǹ-uee mun[9].

¹⁸Di sá yii Kriisitoo pu ní timbi bin sá Juuda yabee nì nimbi bin kaa sée kɔkɔ ŋūǹ kí bà ti-Baa Unimbɔti nì u-Fam mbaantiim tūtuntam pu.

¹⁹Míǹ puee naa ti sá binicambi, kaa ti sá bin nyánní laabee. Ni kpántì ntindambiyaamu kii bin sá Unimbɔti yabee nín sá puee ní, ní ki sá Unimbɔti dicaŋkun yab.

²⁰Ni sá kudii ní, ní kudiiyee nín tɔ́kɔ́ ataŋkpee ŋin puee di sá Yeesu Kriisitoo kpambaliŋ nì Unimbɔti bɔnaatiliibi, ní Yeesu sá ditaŋkpal din yì kudiiyee pɔŋŋuee.

²¹Úǹ di yì-tì ní kudiiyee yú ki pɔ̄ɔ̄ ní ki wīintí ki jɔ́ḿ ki kpántí circir diiku ti-Dindaan pu.

²²Ni nì Yeesu Kriisitoo nín ŋá ubaantee puee, nimbi nì timbi di kpáfì ki ŋá kii kudii kun ni Unimbɔti kóò kí dūú dī u-Fam puee.