Read Ntcham Ephésiens 4 Bible Online

Ephésiens 4 - Ntcham bible

Ephésiens 4

¹An puee, man Pɔɔl un bí sarkan m nín nóó ti-Dindaanee puee, m mèé-ni yii ní nīn bí mbimbim min poon Unimbɔti yíiń-ni ní nīn bée.

²Ní nīn sìntīǹ ni-ba taapu kí nīn mɔ̄, kí nīn cáá kimɔtii tɔb pu, kí nīn ŋúb́maan tɔb nì dineendi poon.

³Ní pɔ́ɔǹ ni-ba kí nīn ŋúb́ nnyɔɔpee ŋun Unimbɔti Fam tìì-nee, ŋgbansɔŋfi ń nīn bí ni-kansikin ní ŋá ubaanti.

⁴Yeesu wunti sá tibaantiil[13] ní, ní Unimbɔti Fam mun sá mbaantiim. Míǹ ní ti-kɔkɔ máká kuwambaantiiu kun pu Unimbɔti yíiń-nee.

⁵Ti-kɔkɔ Dindaan sá ubaanti, ní ti-fookiiu sá ubaanti, ní Unimbɔti nyim fàltam sá mbaantiim.

⁶Unimbɔti sá ubaanti, ki sá tikɔkɔ Baa, ki tɔ́kɔ́ tikɔkɔ pu, ki dì tikɔkɔ pu ki tūǹ u-tundi ní ki bí tikɔkɔn.

⁷Un sá kamaa fōō dipɔl kii Kriisitoo nín tīī-u puee.

⁸Kii an nín ŋmàn̄ Unimbɔti gbɔŋku poon puee yii: «U nín jɔ́ḿ yilpuee, u kpáaǹ iyumbu ní ki pú binib apɔl[14].»

⁹Mimmee, dinyɔɔbundi din lī yii: «U jɔ́m̀ yilpuee» là kí lì yii ba dee? An taapu di sá yii u nìn dáá sīntìń taapu doo nee ní.

¹⁰Yeesu Kriisitoo un sīntìń taapu dooyee, úǹ ubaantee di tí jɔ́m̀ yilpu fɔ́ŋŋŋ kí gbí duulinya kɔkɔn.

¹¹Úǹ di yākatì atuun ki tīī u-nib, biba ń nīn sá u-kpambaliŋ, biba ń nīn sá Unimbɔti bɔnaatiliibi, biba ń nīn yìiǹ ki sòoǹ Yeesu Bɔmɔntiiti, biba ń nīn sá u-nikitiŋ kpootiliibi ní biba mun ń nīn sá Unimbɔti bɔti dàkaliibi[15].

¹²U yākatì atuun míǹ ki tīī Unimbɔti nib ń ŋmā kí tɔ̄ Unimbɔti tundi mmɔntiim án nín làá ŋá pu Kriisitoo wuntee ń nīn cá nyɔkɔpuee ní.

¹³Míǹ di làá yàntī ti-kɔkɔ ń kpántí ubaanti ti nín fōō Unimbɔti Jipɔɔn Yeesu Kriisitoo ki kííyee pu, ní kí béé-u mbaamɔm. Mimmee, ti cíkití Unimbɔti bɔtin ní kí kpántí biniŋmambi, kii Kriisitoo u-ba nín bí puee.

¹⁴Ŋyunti gbantee, taa ti sá kii campɔntibee biŋmatinliibi cáá bi-bɔti ki ŋmàtíǹ-ti kii nnyim nì kubuŋu nín téekí buŋalimbu pu bu yìiǹ ajan kɔkɔ puee.

¹⁵Ama ti máaǹ kí nīn cáá dineendi ki sòoǹ Yeesu bɔti nì ibaamɔn, kí nīn wīintí kí tin ŋmàntīǹ Kriisitoo un sá u-nikitil yilee.

¹⁶Úǹ di kpáfì u-nikitil din sá u-wuntee, bi ŋá ubaanti, kii unil wunti jaŋŋi nín kpáfì ki nɔ̀b̄ tɔb pu puee. Ajan kɔkɔ yaa tūǹ ŋi-tundi nín sá puee, tiwun wīintí ní tiŋan. Míǹ ní dineendi yaa bí Kriisitoo nikitil kansikinee, dì cá nyɔkɔpu ní tiŋan.

¹⁷Tibɔti tin m làá sòoǹ nì ni nee, ti-Dindaan nyɔkɔpu ní m làá sòoǹ-tì. Ni-bimbim ń taa nín̄ bí kii bin kaa nyí Unimbɔtee nín bí puee. Bíǹ nóó bi-landɔkɔkulimii ní.

¹⁸Bi-pɔbiliŋ nín gbìfì baa nyí nnimbɔtisanee pu ní bi dáá bí dibɔmbɔndin ki lántì dimaŋfal din Unimbɔti tīīyee.

¹⁹Baa nyí icoo, ki dū bi-ba ki tīī atuŋkpiti ní ki ŋáań tijɔkɔndi kɔkɔ nì ti-bulifi ki cá, kaa gbèentí.

²⁰Nimbee, kaa sá míǹ ní bi dàkā-ni ní béé Kriisitoo.

²¹Ni lafun gbìl̄ tikɔkɔ u-pu, ní bi dàkā-ni ni béè ibaamɔn in bí Yeesunee.

²²An puee, fámaan ni-bimbim min kaa ŋān̄ee, min cāabìń-ni nnimbitaataam ki bíiĺ-nee.

²³Ní yàntī Unimbɔti ń kpántí ni-pɔbiliŋ nì ni-landɔkɔi mpɔm.

²⁴Ní nīn nóómaan mbimbipɔm min Unimbɔti náań ki nántiǹ u-yam[16] min sá deedee nì circir ki nyánní ibaamɔnnee.

²⁵An puee, ní fá inyimɔn. Báà ŋma ń sòoǹ u-juti ibaamɔn[17], kun puee ti-kɔkɔ kpáfì ki ŋá tiwumbaantiil ní.

²⁶Ni yaa fōō diŋuulee, ní nīn nyí nì ni-ba kí taa kɔ́ ikpitin[18], kí taa nín̄ díkí diŋuul míǹ áli kunyeeu ń tin mɔ́.

²⁷Ní taa pɔ̄maan Sitaan nsan.

²⁸Un nìn sá unaayuuyee ń taa ti yɔ̀. Ú pɔ́ɔǹ u-ba kí tɔ̄ ditundi min máaǹee kí kpíiǹ u-ba kí ká kí tūtuǹ uwɔfi.

²⁹Tibɔkpitil ń taa nín̄ nyēē ni-nyɔmmun, ama ni yaa làá sòoǹee, nín̄ sòom̀maan tin làá tūtuǹ bin fōō Yeesu ki kííyee ń cù nyɔkɔpu, kí kèetī bin bí ki pílifée mun.

³⁰Ní taa kɔ́ǹ Unimbɔti Fam kunimbaau[19], u-Famee ní u dūu dáań-ni ki síiǹ yii ŋwiin ŋubɔ dòoń u làá dāá fīī-ni kí líí kɔkɔ.

³¹Ní nyāntímaan ni-kansikin ntuntun nì kináŋ nì diŋuul tɔb pu, nì kujaau, nì tɔb boon disambiil, kí kúntímaan ntoom nì mi-yalii kɔkɔ.

³²Ama nín̄ sámaan binimɔntiibi, kí nīn sūǹ tɔb saai, kí nīn pūǹ tɔb kpitii, kii Kriisitoo puee, Unimbɔti nín dū ni mun kpitii ki pú-ni puee[20].