Read Ntcham Ephésiens 5 Bible Online

Ephésiens 5 - Ntcham bible

Ephésiens 5

¹Ni nín sá Unimbɔti biyaamu mun u néeńee puee, nín̄ bímaan kii úǹ nín bí puee[21].

²Ní nīn ŋáaḿmaan tikɔkɔ nì dineendi poon, kii Kriisitoo nín néeń-ti pu, ki dū u-ba ki ŋá saraa ki tīī Unimbɔti ti-pu u-saraauee fáatì Unimbɔtee[22].

³Kɔŋkɔnnee ni sá Unimbɔti yab ní, an puee, an yaa sá tilaakpaal nì tin kɔkɔ pée sá dijɔkɔntundi nì nnimbitaataamee, bí taa gbìl̄ an bɔti pu gba ni-kansikin.

⁴An kaa ŋān̄ ní nīn sòoǹ anyɔɔbuŋkpil nì tibɔfan nì icoo bɔti, ama an ŋān̄ yii ní nīn pàkà Unimbɔti ní.

⁵Ní nīn nyí yii bin ŋáań tilaakpaal nì tin pée sá dijɔkɔntundee, nì bin cáá nnimbitaataamee: kun puee nnimbitaataam sá kii iwaatootee ní. An nibee kɔkɔ kaa làá dāá kɔ́ Kriisitoo nì Unimbɔti Beelin.

⁶Ní taa yàntī báà ubɔ ń dū tibɔfan kí ŋmàtiǹ-ni. An tuŋkpitiŋ pu ní Unimbɔti làá dāá fōō diŋuul bin kaa tɔ́-uee pu.

⁷An puee, ní taa cèeǹ bi-ni.

⁸Dooooyee, ni nìn dáá bí dibɔmbɔndin ní, ama kɔŋkɔnnee ni kɔ́ ŋwalifin, kun puee ni kpántì ti-Dindaan yab[23]. Míǹ puee ni-bimbim ń nīn bí kii bin bí ŋwalifinee bimbim nín bí puee.

⁹Kun puee ŋwalifi[24] nín tìì tiŋyee di sá tiŋan kamaa nì deedee nì ibaamɔn.

¹⁰Pɔ́ɔm̀maan ni-ba kí béé min fáatì ti-Dindaanee.

¹¹Ní taa dū ni-ba kí cèeǹ bin sá dibɔmbɔndi[25] yab ki tūǹ atuun ŋin kaa cáá ipaatee poon, ama ní nyāntí bi-tuŋkpitiŋ mpaampiin pu.

¹²An cáá icoo gba tí sòoǹ bi nín ŋáań tin dibalinee.

¹³Bi yaa nyántì tin bi ŋáańee mpaampiin puee, ní ni béetí tin ní an baasii sée.

¹⁴Kun puee tin kɔkɔ nyáń ŋwalifinee ní bi wāĺ, an pu ní an lī yii: «Sii un gèeǹee, fìntī, fìntī bitaŋkpiibi kansikin Kriisitoo ń ŋmíntí-si.»

¹⁵An puee, ní nīn nyí nì ni-ba kí taa fōō bin kaa nyí tibee bimbim, ama ní nīn sá binib bin cáá iciinee.

¹⁶Ní taa nín̄ bíiĺ iyunti kun puee, iyunti in poon ti bí nee, ikpiti wíiǹ tikpil.

¹⁷Ní taa nín̄ sá bigbaambi, ama béémaan ti-Dindaan nín là ní nīn ŋáań miŋyee.

¹⁸Ní taa nín̄ nyù idafi ki gbéè, kun puee an di bíiĺ unil, ama ní nīn gbéèmaan Unimbɔti Fam.

¹⁹Ní nīn gà ni-kansikin ilan in bí Inyɔŋki laŋyi gbɔŋkunee nì Kriisitoo nikitil laŋyi, nì ilan in Unimbɔti Fam tìì-nee, kí nīn cáámaan an laŋyi ki gà ki tìì ti-Dindaan, kí nīn nyɔ́ŋkí-u nì ni-pɔbiliŋ kɔkɔ[26].

²⁰Nín̄ jáaḿmaan ti-Baa Unimbɔti ti-Dindaan Yeesu Kriisitoo yindi pu ŋyunti kamaa nì tikɔkɔ pu.

²¹Nimbi bin tɔ́ Kriisitooyee, sìntīmaan ni-ba taapu kí tīī man tɔb.

²²Nimbi binimpoobee, sìntīmaan ni-ba taapu kí tīī ni-calib kii ni nín fàŋkí ti-Dindaan puee.

²³Kun puee uninja di sá unimpu yidaaŋwu, kii Kriisitoo nín sá uyidaan ki sá Ufiil ki tīī u-nikitil din sá u-wuntee puee.

²⁴Míǹ puee, binimpoobi máaǹ kí sìntīǹ bi-ba taapu tikɔkɔ poon kí tīī bi-calib, kii Kriisitoo nikitil nín sīntiǹ di-ba ki tīī-u puee.

²⁵Nimbi bininjabee, nín̄ néeḿmaan ni-nimpoobi, kii Kriisitoo nín néeń u-nikitil pu ki kpíì di-puee.

²⁶U ŋá míǹ u-nikitil ń nīn bí circir ní, di sá u fùl̄-bi nnyim[27] ní ki dū u-nyɔɔbundi ki ŋáŋkì-bi.

²⁷Di sá yii u gāntì-bi bí dāan̄ Unimbɔti nimbiin nì kunyaaŋŋu, kí nīn jɔ̀m̀ pɔ́lpɔl kí nīn bí circir, bí taa ká bi-pu tiba.

²⁸Míǹ mbaantiim ní bininjab mun máaǹ kí nīn néeń bi-nimpoobi kii bi nín néeń bíǹ bi-ba wunti puee. Un yaa néeń u-nimpuuee néeń u-ba dee.

²⁹Kun puee ubɔ kaa bí ki ná u-ba wunti, ama u kpīintí-tì, ní ki kpèé-tì tiŋan, kii Kriisitoo nín kpèé u-nikitil puee.

³⁰Di sá yii ti-kɔkɔ túkú u-wunti pu ní,

³¹kii an nín ŋmàn̄ Unimbɔti gbɔŋku poon puee yii: «An pu ní uninja dāa nyēē u-baa nì u-na cee, ní u nì u-nimpuu ń nīn kíǹ ki bí, ní bi-liitilee ń kpántí unibaanti[28].»

³²An sá tibɔkpaandi ní dijandi nee dàkà-ti. M làá tùkù-ni yii an sòoǹ Kriisitoo nì u-nikitil pu ní.

³³Ama tin kíǹee di sá yii nimbee, báà ŋma ń nīn néeń u-nimpuu kii úǹ u-bee, ní unimpu mun ń nīn tɔ́ u-cal.