Read Ntcham Philippiens 1 Bible Online

Philippiens 1 - Ntcham bible

Philippiens 1

¹Man Pɔɔl nì Tiimootee, timbi bin sá Yeesu Kriisitoo tɔntɔnliibee, di ŋmàn̄ kugbɔŋu nee. Ti ŋmàn̄-ku kí tīī nimbi bin sá Unimbɔti yab ki kóò Fiiliipi tiŋkin ki fōō Yeesu Kriisitoo ki kííyee, ki kpáaǹ bin kpòotī Kriisitoo nikitilee nì bin tútúǹ ditundi Kriisitoo nikitil kansikinee.

²Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.

³Ŋyunti sá kamaa, m yaa bíi dàkafī ni-bɔtee, m jáaḿ Unimbɔti ni-pu.

⁴Ŋyunti kamaa m yaa bíi mèé ni-kɔkɔ puee, m mèé nì dipɔɔpindi ní.

⁵Di sá ni nìn tútuǹ-ti, kí yòon̄ ŋwimpeepeekaa[1] ŋun ni fōō Yeesu ki kííyee ki dāa dūu sāā díǹ, tí ŋmā kí sòoǹ Tibɔmɔntiil ajan kɔkɔ pu.

⁶M nyí yii Unimbɔti un kíĺ ki bíi tūǹ ditummɔntiil nee ni-pɔbiliŋ poonee kaa làá gbèen̄. U làá nīn pée gbíntìi tūǹ míǹ ní kí nīn pée cí Yeesu Kriisitoo gítintam wiiŋŋu[2].

⁷An kítì ḿ nīn dàkafī ni-kɔkɔ pu míǹ ní, kun puee ni-bɔti kɔ́-mi tiŋan. Di sá yii, m yaa bí sarkanaaa, m yaa tí bí ki dàkà ki cántí Tibɔmɔntiilee baamɔŋyi nín sá pueeyaaa, ni-kɔkɔ kútí m-pu ki fòol̄ diyimɔɔbaantiil din Unimbɔti tīī-mee.

⁸Unimbɔti u-ba nyí yii m néeń ni-kɔkɔ nì dineembaamɔndi din nyánní Yeesu Kriisitoo ceeyee ní.

⁹M nín mèé ni-pu tiŋyee di sá yii Unimbɔti ń yàntī ni-neendi ń nīn wīintí ki cá baabadal, ní nīn mɔ̀tīi béetí ibaamɔn ki gàntī tiŋan nì tikpitil,

¹⁰án nín làá ŋá pu ní ŋmā kí lēē tin kítèe. Ní Kriisitoo gítintam wiiŋŋu dalee, ní dāá nīn bí circir, bí taa ká ni-pu tiba.

¹¹Yeesu Kriisitoo puee, ni làá dāá lòoǹ abil tikpil ŋin sá deedee tuuŋŋi ŋin tìì Unimbɔti tinyool nì inyɔŋkee.

¹²Nnabiyaamu, m là ní béé yii sarka un bi cúú-mi nee di yāntì ní Yeesu bɔti sòontam cūtì nyɔkɔpu malaa.

¹³Di sá yii gɔminakpaan kàliŋkpilib kɔkɔ nì bin kɔ kíǹee béè yii an sá Kriisitoo un m nóóyee pu ní m bí sarkan[3].

¹⁴Áli gba, man sarkau nee pu ní ti-nabiyaamu tikpil mɔ̀tīi dù bi-mákal ki ŋáań ti-Dindaan ni, ki kāntí kunyannyaau ki sòoǹ Unimbɔti bɔti, kaa fàŋkí.

¹⁵Ama bi-kansikin bibee, an sá kináŋ kin bi cáá m-puee di yì-tì ní bi sòoǹ Kriisitoo bɔti ki kpākantí-mi, ní bin kíǹee, bíǹ baasii sòoǹ Unimbɔti bɔti nì nlandɔkɔmɔnti.

¹⁶Bin sòoǹ Unimbɔti bɔti nì nlandɔkɔmɔntee, bíǹ néeń-mi ní ki nyí yii Unimbɔti lēē-mi ḿ nīn dàkà yii Kriisitoo bɔti sá ibaamɔn.

¹⁷Ama bin béeyee, bíǹ sòoǹ Kriisitoo bɔti nì ilandɔkɔkpiti ki là kí kpákáǹ-mi, ki nyàab̀ kí gíti kɔ́ǹ-mi digìńdi kí kūtì sarka un poon m bí nee.

¹⁸Bi yaa sòoǹ Unimbɔti bɔti ki là kí kpákáǹ-maaa, an yaa tí sá nì dipɔɔmɔntiilaaa, tíǹ kaa wù-mi. An sá man dipɔɔpindi ní ki làá nīn pée mɔ̄ǹ-mi ki cá, kun puee Kriisitoo bɔti ní bi-kɔkɔ sòoǹ.

¹⁹Di sá m nyí yii, nì ni-wimmeem pu, nì Yeesu Kriisitoo Fam tūtuntam puee, m làá ká difiil.

²⁰M nín là tiwan tin ki cí tikpil ki cɔ́tí ti-puee di sá icoo ń taa cúú-mi tiba pu. Ama kɔŋkɔnnee kí nīn cée, m yaa làá kpúɔɔɔ, m yaa làá nīn tí báaa, ḿ mɔ̀tīí nīn cáá dipɔbil, m-wunti ń tīī Kriisitoo tinyool.

²¹Ama mamee, Kriisitoo di sá man maŋfal, ní ŋkúm cāabìń-mi ipaati.

²²An yaa tí sá ḿ nīn bí dimaŋfal poon kí ŋmā kí tɔ̄ atummɔnti abaaa, maa nyí laakin m làá lēēyee.

²³Ajan gbanti liitil bí ki dátí-mi, m bàà là kí kpú kí cùú nīn kā Kriisitoo cee, míǹ di bàà ŋān̄ tikpil.

²⁴Ama, nimbi puee, an gíti páb́ ki lákatì yii ḿ nīn dáá bí dimaŋfalin.

²⁵M nín béè yii an sá mimmee, ní m nyí yii m làá nīn bí dimaŋfalin, man nì ni kɔkɔ làá nīn bí, ḿ tūtuǹ-ni ní ŋmā kí cù nyɔkɔpu, kí nīn bí dipɔɔpindin Unimbɔti saŋŋu poon.

²⁶Mimmee m yaa fātìi tí gítìń ni-kansikinee, man puee, án làá dāá nīn mɔ̄ǹ-ni ki gíti lákatì ni nì Yeesu Kriisitoo nín ŋá ubaantee pu.

²⁷Tin páb́ee di sá ni-bimbim ń nīn táá nì Kriisitoo Bɔmɔntiiti, ní báà m yaa dɔ́miń ni-ceeyaaa, m yaa kaa dɔ́mińaaa, ḿ nīn gbìl̀ bi sòoǹ ni nín pēē kinyɔkɔ pu ki báaǹ inyaan, ki jáà nì dipɔbil diba Tibɔmɔntiilee ń cù nyɔkɔpuee.

²⁸Ní taa yàntī ni-nannanliibi ń fàaǹ-ni tiba poon. Ni nín bí miŋyee di làá dàkà bíǹ yii bi wáŋkì, ní kí dàkà nimbi yii ni yú difiil saŋŋu pu. Unimbɔti di làá yàntī bí béé míǹ.

²⁹Di sá yii u pú-ni diyimɔɔl ní nīn nóó Kriisitoo kí taa fōō-u kí kíí ŋmaniŋma, ama ní jī falaa mun u-pu.

³⁰Kɔŋkɔnnee, man nì ni kɔkɔ di kpáfì ki bí dimool poon. Dooooyee ní ni nìn ká yii m bí dimool gbantin[4], ní ni gbìl̄ yii m dáá gbíntìi bí ki mɔ̀ áli nìn díǹ.