Read Ntcham Philippiens 2 Bible Online

Philippiens 2 - Ntcham bible

Philippiens 2

¹Yeesu Kriisitoo cee ní ni ká kunyannyaau ní u-neendi tīī-ni dipɔɔsɔŋkil, ni nì Unimbɔti Fam ŋá ubaanti, ni néeń tɔb ki sūǹ tɔb saai, kaa sá mimmaaa?

²An puee, m mèé-ni yii ní ŋámaan ubaanti kí nīn cáá tɔb pu dineendi, ni-pɔbiliŋ ń ŋá dibaantiil, ni-landɔkɔŋu mun ń nīn sá mbaanti. Ŋámaan míǹ, man pɔbil ń pīil̀ tiŋan.

³Ní taa nín̄ ŋáań tiba ki là ni-ba jandi pu ŋmaniŋma, kí taa nín̄ nyàab̀ kupampakakuliŋŋu. Ní nīn sìntīǹ ni-ba taapu ki tìì tɔb, kí nīn kpèé ni-jutiibi yii bi jítiǹ-ni.

⁴Báà ŋma ń nīn nyàab̀ min ŋān̄ee ki tìì u-juti kí taa nín̄ dàkafī u-baba ŋmaniŋma ŋanti pu.

⁵Ní nīn cáá Yeesu Kriisitoo landɔkɔŋu.

⁶Úǹ un sá Unimbɔti u-bee, waa nyàab̄ yii u nì Unimbɔti ń nīn ŋmà.

⁷Ama u yāntì tin kɔkɔ u nìn cááyee, ní ki fōō uyumbu bimbim[5]. U dū u-ba ki nántiǹ binib, ki dɔ́miń nniyaamin,

⁸ní ki sīntì u-ba taapu, ní ki pílifiǹ Unimbɔti áli ki tin kpíì ŋkúm min sá ndɔpuntikaa pu kúmee.

⁹An puee ní Unimbɔti yōoǹ-u ki kāaǹ mpaan ŋun bí yilpu ki jítiǹ ipaan kɔkɔee, ní ki pú-u diyindi din jítiǹ ayin kɔkɔee,

¹⁰án nín làá ŋá pu bin bí yilpuee nì bin bí kitiŋ puee nì bin gíti bí kitiŋ taapuee, báà ŋma ń gbàan̄ u-tabiŋyiliŋ pu kí nīn tɔ́ Yeesu yindi,

¹¹ní báà ŋma ń lì u-nyɔkɔn yii Yeesu Kriisitoo di sá ti-Dindaan, ní ti-baa Unimbɔti ń ká tinyool.

¹²An puee, m-nabineeŋkaamu, kii m nín bí ni-cee ki ká ni tɔ́ Unimbɔti ŋyunti kamaa miŋyee, kɔŋkɔnnee m nín kpá ni-cee pu nee, ní nīn gbíntìi tɔ́-u míǹ gbīŋgbim. Kii Unimbɔti nín fīī-ni puee, ní nīn fàŋkí-u, kí nīn tūm̀maan ditundi.

¹³Kun puee Unimbɔti di bíi tūǹ ni-ni ditundi ki yàntī ni néeń u nín là miŋyee ki ŋáań míǹ.

¹⁴Tin kɔkɔ ni yaa bíi ŋáańee, ní taa nín̄ gbùkum̄ kí taa nín̄ cáá kunikpɔŋkpɔkɔu.

¹⁵Mimmee baa làá ká ni-pu tiba, ní ní nīn bí circir ki sá Unimbɔti biyaamu mun kaa cáá ikpiti iba duulinya nib binikpitib nì bikiililiibi kansikinee[6]. Ní nīn wāĺ duulinyan kii iŋmalbijaayee,

¹⁶kí nīn báakí Unimbɔti bɔti tin sá dimaŋfalee. Ni yaa ŋá mimmee, daliŋkin Kriisitoo làá gítińee, m dāa mɔ̀ɔǹ ní, an di dāa dàkà yii m-tundi nì m-pɔ́ɔǹtam kaa ŋá fám.

¹⁷Ni-fookiiu sá kii saraa un ni tìì Unimbɔtee ní. An yaa yíì, bi yaa kūū-mee, m-fatikuu di dāa kútí ni-saraau gbanti pu[7]. An yaa lafun sá mimmee, an dāa mɔ́ɔkíǹ-mi, ní ni mun ń dāá kūtì m-pu tí fàal̀.

¹⁸Míǹ mbaantiim, ni mun dāa bí dipɔɔpindi poon ní ma mun ń kūtì ni-pu tí fàal̀.

¹⁹Ti-Dindaan Yeesu yaa lèe, m máká yii an kaa làá yúntí m làá tɔ̄ń Tiimootee ni-cee, án nín làá ŋá pu, u yaa láa fātìi gítìń ki máafì-mi ni nín bí lapu miŋyee, ḿ ká kunyannyaauee.

²⁰Kun puee ubɔ kaa ti bí. Úǹ baba di kútì m-pu ti cáá nlandɔkɔbaanti ki dàkafī ni-pu tikpil.

²¹Bin kɔkɔ kíǹee dàkafī bíǹ bi-ba bɔti pu ní kaa fātìi tɔ́ Yeesu Kriisitoo yati.

²²Nimbi ni-ba nyí min ní Tiimootee gbanti nìn dàkā u-bimbimɔntiim, nì man nì u nín túń ditundi ki sòoǹ Unimbɔti bɔti kii kibiki nì ki-baayee.

²³M yaa láa béè tin poon m bée, m làá tɔ̄ń-u ni-cee malaa.

²⁴M máká ti-Dindaan pu yii, án kaa làá ti yúntí, mama m-ba làá dāan̄ kí màntì ni-pu.

²⁵M ká yii an máaǹ ḿ tɔ̄ń ni-cee m-nabiki Eepafroodiiti m-tɔntɔnjuti man nì un bōō dikɔ̀ndi puee. Úǹ ní ni nìn túnní m-cee, u cáań-mi tin nìn lóò-mi ni tútúǹní-mee.

²⁶U nyàab̀ kí dāan̄ kí fàtīí ká ni-kɔkɔ ní. U nín béè yii ni gbìl̄ yii u búŋkèe, an páb́-u tikpil.

²⁷U lafun búŋkì tikpil, áli ki tóob́ ŋkúm, ama ní Unimbɔti súń u-saai. An kaa sá úǹ baba saai, u súń ki kpáaǹ ma mun saai, kunimbaau ń taa dāan̄ kí gíti kūtì kunimbaau pu.

²⁸An puee m jìkì kí dū-u kí tɔ̄ń ni-cee malaa, án nín làá ŋá pu, ni yaa gíti fātìi ká-uee, ni-pɔbiliŋ ń fàtīí tí sɔ̀ŋkì, ní ma mun nimbaaku ń bàtēe.

²⁹Míǹ puee, u yaa bāańee, ní fōō-u nì dipɔɔpiŋkpaandi ti-Dindaan pu. Binib bin bí kii úŋ̀wuee, ni máaǹ kí nīn tɔ́-bi ní,

³⁰kun puee Kriisitoo tundi puee, fiii di pée kpá ú bàà kpú. Waa fāŋkì ŋkúm ki tútúǹ-mi ditutundi din, ni yaa bàà bí doo, an bàà sá ní tūtuǹ-mee.