Read Ntcham Philippiens 4 Bible Online

Philippiens 4 - Ntcham bible

Philippiens 4

¹An puee, m-nabineeŋkaamu mun m mɔ̀ ki bàà là kí gíti kée, nimbi bin tìì-mi dipɔɔpindi ki sá-mi tinyoolee, m-bɔɔbi, ni nín sá ti-Dindaan yabee puee, ní nīn gbíntìi bá ki pɔ̄ɔ̄ míǹ.

²M mèé ki gbàam̄ Eefoodii nì Sintiikee yii bí ŋá ubaanti mmɔntiim ti-Dindaan pu.

³Míǹ puee, sii m-tɔntɔnjutimɔnti, m mèé-si yii á tūtuǹ-mi binimpoobi gbanti liitil, kun puee dikɔ̀ndi din poon m bí ki sòoǹ Unimbɔti bɔtee, binimpoobee mun tútúǹ-mi, bi nì Kleeman nì m-tɔntɔnjutiibi bin kíǹee. Unimbɔti ŋmàn̄ bi-yiŋŋi dimaŋfal gbɔŋkun[11].

⁴Ni nín bí ti-Dindaan ŋaan puee, nín̄ fàal̀maan ŋyunti sá kamaa. M gíti bùsī ki tùkù-ni yii, nín̄ fàal̀maan.

⁵Ní nīn mɔ̄ báà ŋma cee, ti-Dindaan tóobiń.

⁶Ní taa nín̄ yáliŋkí tiba nì tiba pu[12], ama tin kamaa di yaa bāań-nee, ní dū ŋwimmeem nì igbaam kí mèè Unimbɔti tin lóò-nee pu, kí nīn jáaḿ-u u-ŋanti pu.

⁷Unimbɔti gbansɔŋfiŋu ŋun wīikí ki jítiǹ unil nyítamee, làá ŋúb́ ni-pɔbiliŋ nì ni-landɔkɔi ni nín sá Yeesu Kriisitoo yabee pu.

⁸Nnabiyaamu, m-bɔjoolkaati sèé: ní nīn dàkafī tin máaǹ tinyoolee pu, an dàkà yii tin kɔkɔ sá tiŋmanee, tin kɔkɔ sá bí nyɔ̄ŋkèe, tin kɔkɔ bí deedeeyee, tin kɔkɔ bí circiree, tin kɔkɔ kítì dineendee, nì tin kɔkɔ bi pàkèe.

⁹Ní nīn ŋáaḿmaan tin ni bífì ki fōō m-ceeyee nì tin ni gbìl̄ m sòon̄ee nì tin ni ká m ŋáańee, ní Unimbɔti ŋgbansɔŋfi daan ń nīn bí ni-cee.

¹⁰M jáaḿ ti-Dindaan, an mɔ́ɔkiǹ-mi tikpil kii m nín ká ni fātìi tí bíi dàkafī m-pu ki tútúǹní-mi miŋyee. Ni nìn pée cáá nlandɔkɔ gbanti m-pu an yúntì, ní mpaan kaa nìn bí ní ŋá ni nín dàkafī m-pu miŋyee.

¹¹M nín bí ki sòoǹ nì ni pu nee, an kaa sá tiba di lóò-mi. M yaa cááyaaa, m yaa kaa tí cááyaaa, an kɔkɔ mɔ̄ǹ-mi ní.

¹²M bífì kí nīn bí disoolin, ki tí bífì kí nīn bí digbíl mun poon. M yaa jíń ki díkáaa, m yaa tí dɔ̄ ŋkùmaaa, m yaa cáá ki lákatàaa, m yaa kaa tí cááyaaa, m bífì kí ŋmèè tin kamaa di yaa pée bāań-mee.

¹³M ŋūǹ tikɔkɔ Kriisitoo un tìì-mi mpɔnee pu.

¹⁴Ama ni nín kútì m-pu m jíń falaayee, ni túń ditundi.

¹⁵Fiiliipi tiŋki yab, nimbi ni-ba nyí, m nín kíĺ Unimbɔti bɔti sòontam Maseeduwaan tiŋkin ki dāa yíkèe, Kriisitoo nikitil báà diba kaa ti tútuǹ-mi, see nimbi ŋmaniŋma di kíí ki tīiń-mi tin m bàà làá lóóyee[13].

¹⁶Di sá yii, doooo, min m nìn bí Teesalooniikee, nimbi di nìn tútúǹní-mi ŋfunyɔm kupaau pu[14].

¹⁷M nín sòoǹ tin nee, kaa sá m nyàab̀ ní pɔ̄ń-mi tiba. M nyàab̀ ní nīn tūǹ atummɔnti kí ká ipaati tikpil ní.

¹⁸Tin kɔkɔ ni tīiń-mee, m fōō, m kíǹ ki bí digbíl poon ní. Ni nín tīiń ni-tūtuntam puee, kɔŋkɔnnee m cáá tikɔkɔ nì tikɔkɔ. Ni-tūtuntam min Eepafroodiiti cáań-mee sɔ́fì fíŋfiŋ kii talaaluee, ní ki bí kii saraa un fáatì Unimbɔti u fòol̄ee[15].

¹⁹Kii m-Nimbɔtiu nín cáá tigaajawan tikpil nì tinyool puee, u làá tīī-ni tin kɔkɔ yaa lóò-nee Yeesu Kriisitoo pu.

²⁰Ti-Baa Unimbɔti ń ká tinyool kí nīn pée cá jaanjaan! Ameeni.

²¹Ní jāam̀ bin kɔkɔ pée sá Yeesu Kriisitoo yabee. Ti-nabiyaamu mun bí man cee dooyee mun jáaḿ-ni.

²²Bin sá Unimbɔti yabee kɔkɔ jáaḿ-ni, kí bántée, gɔminakpaan Seesaar dicaŋkun yab jáaḿ-ni.

²³Ti-Dindaan Yeesu Kriisitoo ŋanti ń nīn bí ni-cee.