Read Ntcham Colossiens 1 Bible Online

Colossiens 1 - Ntcham bible

Colossiens 1

¹Man Pɔɔl un Unimbɔti là ḿ nīn sá Yeesu Kriisitoo kpambalee nì ti-nabiki Tiimootee di ŋmàn̄ kugbɔŋu nee.

²Ti ŋmàn̄-ku kí tīī nimbi bin sá Unimbɔti yab bin bí Kooloosi, ki kpántì ti-nabimɔntiimu Kriisitoo puee ní. Ti-Baa Unimbɔti ń ŋá-ni tiŋan kí tīī-ni ŋgbansɔŋfi.

³Ŋyunti sá kamaa, ti yaa pée bíi mèé ki tìì-nee, ti jáaḿ Unimbɔti ti-Dindaan Yeesu Kriisitoo Baa ni-pu.

⁴Di sá yii ti gbìl̄ ni nín cáá dimákal Yeesu Kriisitoo pu ki néeń Unimbɔti yab kɔkɔee.

⁵Di sá yii ni dàkafī tipaal tin dɔ̄ ki cí-ni yilpuee pu. Ni béè an paati pu ŋyunti ŋun bi nìn péé péé ki sòon̄ nì ni ibaamɔn bɔtee[1].

⁶Tibɔmɔntiil gbanti tin bi cáań-nee bíi gbìtī ki lòoǹ abimɔnti ajan kɔkɔ nib cee. Míǹ ní tì túń atunnyaan ni-cee, kí yòon̄ doooo ŋyunti ŋun ni nìn péé péé ki fōō-tì ki lafun béè Unimbɔti nín ŋáań binib tiŋan tiŋyee.

⁷Tíǹ ní Eepafrasi nìn dàkā-ni. Úǹ di sá ti-tɔntɔnjuti un ti néeńee, ki tūǹ Kriisitoo tundi deedee ki tútúǹ-ni.

⁸U máafì-ti dineendi din Circir Fam yàntī ni cáá Unimbɔti yab puee.

⁹Míǹ puee, kí yòon̄ daliŋkin ti gbìl̄ ni-puee, ti mun pée bí ki mèé kaa gbèentí ki tìì-ni yii Unimbɔti ń yàntī ní béé mmɔntiim tin u là ní ŋée, kí tīī-ni iciin kɔkɔ nì dinyil din Unimbɔti Fam tììyee ní gbìl̄ u-bɔti taapu.

¹⁰Ú yàntī ni-bimbim ń nīn nóó nì bin sá ti-Dindaan yabee bimbim kí ŋmā kí fáatí-u ŋyunti sá kamaa. Míǹ ní ni làá nīn lòoǹ abimɔnti ŋin sá ní nīn tūǹ atummɔnti kɔkɔee, kí nīn mɔ̀tīi béetí Unimbɔti,

¹¹ú nīn tìì-ni mpɔn ŋyunti sá kamaa, kii u nín sá ipɔn nì tinyooldaan puee. Mpɔn gbanti làá yàntī ní nīn jīǹ kimɔtii ki pɔ̄ɔntí ŋyunti sá kamaa.

¹²Ní nīn jáaḿ ti-Baa Unimbɔti dipɔɔpindi poon u nín yāntì ní dāá ŋmā kí ká tin u síiǹ kí tīī u-yab u-dumpu, ŋwalifi laŋkee.

¹³Di sá yii u nyántì-ti dibɔmbɔndi pɔŋŋun[2] ki cáań-ti u-Jipɔnneeŋkaau beel poon.

¹⁴U-Jipɔɔnee di yāntì Unimbɔti fīī-ti ki líì, ki dū ti-kpitii ki pú-ti.

¹⁵Úǹ di sá Unimbɔti un baa wāĺee naŋku, ní ki līī tin kɔkɔwoooo Unimbɔti náańee nyɔkɔpu[3].

¹⁶Di sá yii tiwan tin kɔkɔ bí yilpuee nì tin bí taapuee, tin bi wāĺee nì tin baa wāĺee, an yaa sá ituun in jīǹ abeeyee nì in sá bikpilibeeyeeee, an yaa tí sá in cáá mpɔneeyeeee[4], Unimbɔti nìn dī u-Jipɔɔnee pu ní ki náań tíǹ kɔkɔ. U-Jipɔɔnee di náań tikɔkɔ ki yì an kɔkɔ mun.

¹⁷Úǹ di nìn bí ní boonee tiwan kɔkɔ dɔ́miń. Úǹ di yàntī tiwan kɔkɔ bí ti-laŋki.

¹⁸Úǹ di sá u-nikitil yil ní u-nikitil sá u-wunti. Úǹ di tìì dimaŋfal. Bin fīkitì ditaŋkpiilinee kansikinee, úǹ di sá ukpil, án nín làá ŋá pu ú kpántí upeepeekaa tikɔkɔ poonee.

¹⁹Di sá yii Unimbɔti lēē yii u-Jipɔɔnni ní u làá nīn bí mmɔmin.

²⁰U bóob́ kí dī u-pu u nì duulinya kɔkɔ ń mɔ̄ɔkì. U-Jipɔɔnee nín kpíì ndɔpuntikaa pu puee di cáań ŋgbansɔŋfi tin kɔkɔ bí yilpuee nì tin kɔkɔ bí taapuee pu.

²¹Ni nín nìn cáá tilandɔkɔkpiil ki tūǹ atuŋkpiti puee, ni nì Unimbɔti kansikin nìn bíil̀, ní ni nìn sá u-nannanliibi.

²²Ama kɔŋkɔnnee, Yeesu nín nìn kpántì unil ki kpíì puee ní Unimbɔti yāntì ni nì u mɔ́ɔkì. Mimmee, u làá cáań-ni u-nimbiin, ní nīn sá u-yab kí nīn bí circir, báà ubɔ ń taa ká ni-pu tikpitil kí lì.

²³Ama, ni máaǹ tibɔti tin ni nìn fōō ki kííyee, ní nīn ŋúb́-tì mmɔntiimin, kí nīn sí deedee kí báań inyaan kí taa lēē dimákal Tibɔmɔntiil tin ni gbìl̄ee pu. An bɔtee di sá tin bi sòon̄ ki tīī báà ŋma ajan kɔkɔee. Man mun Pɔɔl kpántì un kíǹ ki sòoǹ an bɔtee ní.

²⁴Kɔŋkɔnnee an mɔ́ɔkiǹ-mi m nín bíi jīǹ falaa ni-puee, an dàkà yii ḿ púntí falaa un Kriisitoo tīī-mee m-wuntin kí tīī u-nikitil din sá u-wuntee[5].

²⁵Kii Unimbɔti nín túǹ-mi ditúndi ḿ tɔ̄ ditundi kí tīī nimbi Kriisitoo nikitil puee, man kpántì utɔntɔnli ki tīī-ni: m-tundi di sá ḿ sòoǹ u-bɔtee kɔkɔ mmɔntiim.

²⁶Tibɔtee di sá tin nìn bí dibalin doooo abin abin, báà ubɔ kaa béè ti-puee, ní kɔŋkɔnnee Unimbɔti bīitì ti-pu ki tīī u-nib.

²⁷U nín là puee di sá bí béé tibɔbalkaalee nín cáá kunyaaŋŋu tikpil ki tīī bin kaa sá Juuda yabee puee yii: Kriisitoo bí ni-pɔbiliŋin ki yàntī ni máká yii ni làá dāá jī Unimbɔti nyooti.

²⁸An puee, ti sòoǹ Yeesu Kriisitoo gbanti bɔti ki tìì unil sá kamaa, ki dù ti-ciiŋyi kɔkɔ ki dàkà ki kpáafí báà ŋma, bí ŋmā kí nīn sá binib bin bīńee, kun puee bi nì Yeesu Kriisitoo ŋá ubaanti.

²⁹Míǹ pu ní m gì ki dù mpɔŋkpaan ŋun Kriisitoo tìì-mee, mpɔn ŋun tūǹ ditundi man nee, ki cáa mɔ̀ dimool ni-pu.