Read Ntcham Colossiens 2 Bible Online

Colossiens 2 - Ntcham bible

Colossiens 2

¹M nyàab̀ ní béé yii m bíi mɔ̀ dimool an pɔ̄ɔ̄, nimbi nì Lawoodiisee yab nì bin kɔkɔ kaa láá pée ká-mi dalbee pu.

²Di sá yii m là bí ká kunyannyaau bi-pɔbiliŋin, kí nīn néeń tɔb, kí nīn cáá nnyɔɔpee, kí nīn nyí an kɔkɔ taapu kí nīn cáá dimákal mmɔntiim. Mimmee, bi làá béé tin tin Unimbɔti nìn ŋúb́ dibalinee mbaamɔm, an dàkà yii Yeesu Kriisitoo,

³un ni ní iciin nì dinyil kɔkɔ bál̀ ki kēe.

⁴M tùkù-ni tibɔti nee ní kpèè tiŋan, ubɔ ń taa dū kinyɔɔmɔɔi kí ŋmàtiǹ-ni.

⁵Báà m yaa kaa bí ni-kansikin, m-landɔkɔŋu bí ni-cee, ní an mɔ̄ǹ-mi m nín ká yii ni kpáfì mbaantiim ki sí deedee ki gbíntìi cáá dimákal Yeesu Kriisitoo puee.

⁶Kii ni nín nìn fōō ti-Dindaan Yeesu Kriisitoo puee, ní nīn gbíntìi nóó-u míǹ.

⁷Ní báań inyaan u-ni kí nīn wīintí, kí nīn ŋúb́ tin bi nìn dàkā-ni ni fōō ki kííyee mpɔn, kí nīn jáaḿ-u u-ŋanti pu tikpil.

⁸Ní kpèè tiŋan ubɔ ń taa dū u-nyil nì u-bɔfanti tin tɔ́kɔ́ binib koobiliŋ nì duulinya marab pu[6] kaa tɔ́kɔ́ Kriisitoo puee kí ŋmàtiǹ-ni.

⁹Di sá yii Unimbɔti bimbim kɔkɔ bí Kriisitoo wuntin,

¹⁰ní nimbi kāntí tikɔkɔ u-cee, kun puee úǹ di sá ubɔti tin kɔkɔ cáá ipɔnee pu.

¹¹Ŋyunti ŋun ni nì Yeesu Kriisitoo ŋá ubaantee, u gíí-ni nì digiil din kaa sá tiwun gíitamee, ki gíí ki lēē ni-bimbikpitim.

¹²Kii bi nín síb̀ bin kúùyee puee, míǹ ní ni nì Kriisitoo nìn kpíì, ní bi síb́-ni ŋyunti ŋun bi nìn fùl̄-ni Unimbɔti nyimee. Boonee, ni nì u fīkitì, kun puee ni fōō ki kíí yii Unimbɔti cáá mpɔŋkpaan ki ŋúń ki fīkitì Kriisitoo[7].

¹³Dooooyee, ni-kpitii pu, nì ni nín kaa sá Juuda yab kaa gíí dikpancandee puee, naa nìn cáá dimaŋfal. Kɔŋkɔnnee, ni nì Kriisitoo nín ŋá ubaantee puee, Unimbɔti fīkitì-ni. U dū ti-kpitii kɔkɔ ki pú-ti,

¹⁴ní ki fōō kugbɔŋu kun poon bi nìn ŋmàn̄ ti-kpitii ki bóob́ yii bí dáaĺ ti-tafalee, ki kpītì ki dū ki kpáá Yeesu dɔpuntikaaŋu pu.

¹⁵Unimbɔti gbákal̀ arasiniibi nì ŋfaŋkpitim pɔŋyi. U cáań-bi ki dàkā báà ŋma ń kpèè bin pu u jíń dinyandee. U-Jipɔɔn dɔpuntikaaŋuee di sá u-nyandi gbanti.

¹⁶Mimmee, bi yaa bíi sòoǹ ni-pu[8] yii naa kòó tijikaal tiba, kaa kòó tinyɔkaal tiba mun, nì ni nín kaa kàal̀ iwiin in bi nìn yóoǹee, kaa kàal̀ iŋmapɔɔn nì iwiŋŋuŋfikaa puee, ní taa yàntī án nīn páb́-ni.

¹⁷Di sá yii akoobilee di nìn dàkà tin dáá bí boon ki dòońee, an dàkà yii Kriisitoo.

¹⁸Ubɔ ń taa ŋmàtiǹ-ni yii ni yīntì ni nín kaa là kí sìntī ni-ba taapu kí nīn jáaḿ Unimbɔti tuuŋyee. Di sá bi là kí lì yii bíǹ wāĺ ní. Ama baa máaǹ kí dàkà bi-ba kii bi nín yòontí bi-ba yilpu min nee, kun puee bi-landɔkɔi nyēeń bi-bimbikpitimin ní ki sá nniyaamin.

¹⁹Baa ŋúb́ Yeesu Kriisitoo bɔti. Úǹ di sá diyil ki tīī tiwun kɔkɔ, ki tūkuntí akpab ní ki nɔ̀b̀ igiin, ki kpīintí tiwun ki yàntī tí nīn wīintí kii Unimbɔti nín là puee.

²⁰Ni nì Kriisitoo nín kpíì, u fīī-ni ki nyántì-ni duulinya marabinee, ba ŋá ní ni bí kii ni gíti sá taapu doo yabee[9]? Ba ŋá ní ni gbíntìi dì akoobil ŋin sá yii:

²¹«Taa cúú doo, taa dáká tinee, taa gbēē tin kíǹee.»

²²An bɔtee sá binib marab nì bi-dàkatam ní. Ni yaa gíti dáá dū tijin gbanti ki jíńee, tì bíil̀ dee, an kaa cáá yii án làá ŋá-ni tiba.

²³Ibaamɔn, a yaa kpēē marab gbantee, a làá lì yii bi cáá iciin ŋyunti ŋun bi bí yii binib ń dī dipɔ́ɔǹdi saŋŋu, kí sìntī bi-ba taapu, kí yàntī án píĺ bi-wuntee, ama marabee kaa cáá mpɔn kí cúú tiwun ń taa ŋá min kaa kítèe.