Read Ntcham Colossiens 3 Bible Online

Colossiens 3 - Ntcham bible

Colossiens 3

¹Ama ni yaa nyí yii Kriisitoo kpáaǹ-ni ki kpíì ki fīkitèe, nín̄ nyàab̀maan tin bí yilpuee, laakin úǹ bí ki kā Unimbɔti ŋaŋgiil púee[10].

²Dūmaan ni-landɔkɔi kí dūú tɔ̄ yilpu wanti pu, kí taa dūú tɔ̄ taapu yati pu.

³Di sá yii ni kpíì, ní ni-maŋfal bál̀ Kriisitoo ni Unimbɔti cee.

⁴Kriisitoo un sá ni-maŋfalee yaa láa páaǹnée, ni mun dāa pāantiń ní ki cáá tinyool kii úŋ̀wuee.

⁵Mimmee, kpɔ̀maan taapu doo bimbikpitim min bí ni-nee, tin sá tilaakpaal nì tijɔkɔndi, ilandɔkɔkpiti nì nnimbitaataam min nì iwaatooti sá tiwambaantiilee.

⁶Ikpiti gbanti pu ní Unimbɔti làá dáaĺ bin kaa tɔ́-uee tafal.

⁷Míǹ ní ni nìn ŋáań dooooyee, ŋyunti ŋun ni nìn dáá bí ikpitinee.

⁸Ama kɔŋkɔnnee, ní fámaan ikpiti kɔkɔ, kí taa nín̄ fòol̄ mbiim, kí taa nín̄ cáá diŋuul nì tilandɔkɔkpiil. Ní taa yàntī asiibil nì tibɔfan ń nīn nyēē ni-nyɔmmun.

⁹Ní taa nín̄ mɔ́ntímaan tɔb. Di sá yii ni fá ni-bimbikpitim nì atuun ŋin ni nìn ŋáań dooooyee kɔkɔwoooo,

¹⁰ní ki yōoǹ mbimbipɔm min pɔ̀ntī baabadal[11] ki cá ki nántíǹ Unimbɔti un náań-mèe nín bí puee. Mimmee, án làá yàntī ní béé ni-Nimbɔtiuee mbaamɔm.

¹¹Míǹ puee, a yaa sá Juuda yɔuaaa, a yaa kaa sáaa, a yaa gíí dikpancandaaa, a yaa kaa gííyaaa, a yaa sá unicaanaaa, a yaa tí sá umɔnilaaa, a yaa sá uyumbuɔɔɔ, a yaa tí tɔ́ a-baaa, tíǹ kaa páb́. Un baba bɔti páb́ee di sá Kriisitoo un bí báà ŋmanee.

¹²Nimbi bin Unimbɔti lútì, ni kpántì u-yab bin u néeńee, ní nīn sūm̀maan tɔb saai kí nīn ŋáań tɔb tiŋan kí nīn sìntīǹ ni-ba taapu ki tìì tɔb, kí nīn cáá kimɔtii.

¹³Ní nīn ŋúb́maan tɔb. Ni-jutiibi yaa yīntiǹ-nee, ní nīn cáa pūǹ-bi. Kii ti-Dindaan nín dū ni-kpitii ki pú-ni puee, ni mun ń nīn cáa pūm̀maan tɔb míǹ mbaantiim[12].

¹⁴Tin páb́ ki jítiǹ tikɔkɔee di sá ní nīn néeń tɔb. Míǹ ní ni làá ŋmā kí nīn cáá nnyɔɔpee tiŋman pu.

¹⁵Yàntīmaan ŋgbansɔŋfi ŋun Kriisitoo tììyee ń nīn kpòotī ni-pɔbiliŋ. Di sá yii ŋúǹ pu ní Unimbɔti yíiń-ni ki kpáfì kii tiwumbaantiilee. Ní nīn jáaḿ Unimbɔti tiŋan tin u ŋáań ki tìì-nee pu.

¹⁶Kriisitoo bɔtee nì tì-gaajati kɔkɔ ń nīn bí ni-cee mmɔntiimin. Ní nīn dàkà tɔb u-bɔtee kí nīn kpáafímaan tɔb nì iciimmɔnti, kí nīn gà ilan nì ni-pɔbiliŋ kɔkɔ, ilan in kā Inyɔŋki laŋyi gbɔŋku poonee nì Kriisitoo nikitil laŋyi nì ilan in Unimbɔti Fam tìì-nee kí nīn cáa pàkà Unimbɔti u-ŋanti pu[13].

¹⁷Tin kamaa ni yaa làá lèe nì tin kamaa ni yaa làá ŋée, ŋámaan an kɔkɔ nì ti-Dindaan Yeesu pu, kí nīn dìmaan u-pu ki jáaḿ ti-Baa Unimbɔti.

¹⁸Nimbi binimpoobee, nín̄ tɔ́maan ni-calib, min máaǹ ti-Dindaan yab ń ŋée dee.

¹⁹Nimbi bininjabee, nín̄ néeḿmaan ni-nimpoobi, kí taa nín̄ cáá bi-pu ntoom.

²⁰Nimbi mbiyaamuee, an sá ni-tundi yii ní nīn gbìlim̀maan ni-baabi nì ni-nab nyɔmmu ŋyunti sá kamaa, míǹ di sá min fáatiǹ ti-Dindaanee.

²¹Nimbi bibaatiibee, ní taa nín̄ páb́ ni-biyaamu tikpil, mu-wunti ń yɔ̀tī.

²²Nimbi iyumbuee, ní nīn gbìlim̀maan bin sá ni-dindambi taapu dooyee nyɔmmu iyunti kɔkɔ. Ní taa nín̄ tūǹ ditundi min fáatì-bee ŋyunti ŋun bi kpèé-nee ŋmaniŋma, ama ní nīn tūǹ bi-tuuŋŋi nì dipɔbil diba kii ni nín fàŋkí ti-Dindaan puee.

²³Báà ditundi din ní an yaa yāntì ki sée, tɔ̄maan-dì nì ni-pɔbiliŋ kɔkɔ, a lì kii ti-Dindaan ní ni tūǹ ki tìì, an kaa sá nnibiyaamuee.

²⁴Ní nīn nyí yii ti-Dindaan làá dāá pà-ni tipaal tin sá kutindaŋuee[14]. Di sá yii ni-Dindaan un ni baasii tūǹ ditundi ki tììyee di sá Kriisitoo.

²⁵Un yaa ŋá ikpitee làá ká ikpiti paati, kun puee ti-Dindaan gbanti kaa gàntī binib[15].