Read Ntcham Colossiens 4 Bible Online

Colossiens 4 - Ntcham bible

Colossiens 4

¹Nimbi bin cáá iyumbuee, ní nīn ŋúb́-i mmɔntiimin, kí nīn ŋáań-i tiŋan, kí nīn nyí yii ni mun cáá ukpil ubɔ u bí yilpu.

²Ní nīn mèé múlmul kí taa gbèen̄, kí nīn wálifì kí nīn jáaḿ Unimbɔti u-ŋanti pu.

³Ni yaa bíi mèéyee, ní nīn mèé ki tìì ti mun, yii Unimbɔti ń pìitī-ti nsan tí ŋmā kí sòoǹ u-bɔti kí bìitī tibɔbalkaal tin sá Kriisitoo yatee. Tibɔti gbanti pu ní m bí sarkan nee.

⁴Ní nīn mèé yii ḿ ŋmā kí nīn sòoǹ ki cántí-tì kii an nín máaǹ puee.

⁵Ni-bimbiminee, ní nīn cáá iciin bin kaa láá fōō ki kííyee cee, kí taa dū iyunti in ni kāntí bi-ceeyee kí bīil̀.

⁶Ní nīn sòoǹ anyɔɔbummɔɔn ŋí nīn cáá taapu, kí nīn nyí min ní ni làá nīn kíikí báà ŋma án nīn kítèe.

⁷An yaa sá m-bɔtee, ti-nabineeŋkaaki Tiisiiki[16], un sá ti-tɔntɔnjuti ki tūǹ ditundi mmɔntiim ki tìì ti-Dindaanee, làá sòoǹ nì ni tin kɔkɔ m cááyee.

⁸An pu ní m túnní-u ni-cee ní béé ti-gbampɔŋŋu pu kí ká kunyannyaau.

⁹Úǹ nì ti-nabineeŋkaaki Ooneesiim[17] un yú deedee ki sá ni-yɔu ubɔee làá dāá nīn táań, kí dāá tùkù-ni tin kɔkɔ bíi jītí dooyee.

¹⁰Ariistaarki man nì un bí sarkan dooyee jáamiń-ni, ní Maarki Baarnaabaasi[18] naal mun tīiń-ni ijaam. Dooooyee, bi tùkū-ni Maarki gbanti bɔti ki yóoǹ. Mimmee, u yaa láa bāań ni-ceeyee, ní dāá fōō-u mmɔntiim.

¹¹Yeesu un bi yíì Justuusee mun jáamiń-ni. Juuda yab kansikinee, binib bita nee baba di sá man nì bin tūǹ ditundi Unimbɔti Beel ń cù nyɔkɔpuee. Bíǹ di tìì-mi kunyannyaau.

¹²Ni-yɔu Eepafrasi, Yeesu Kriisitoo tɔntɔnliuee, mun tīiń-ni ijaam. U mèé ni-pu tikpil ŋyunti sá kamaa, kaa gbèentí, yii ní nīn gbíntìi ŋúb́ Yeesu Kriisitoo bɔti mmɔntiim kí wíiǹ kí kpántí biniŋmambi, kí ŋmā kí ŋá tin kɔkɔ Unimbɔti là ní ŋée.

¹³Mama m-ba ŋūǹ kí lì u-pu yii u gì nimbi nì Lawoodiisee yab nì Eerapooliisi yab pu digìńdi.

¹⁴Luuki, ti-nabineeŋkaaki un sá dɔkɔtee, nì Deemasi jáamiń-ni[19].

¹⁵Ní jāam̀ nnabiyaamu mun bí Lawoodiiseeyee, nì Niŋfasi, kí kpáaǹ Kriisitoo nikitil din kpáfí u-dumpuee.

¹⁶Ni yaa kàan̄ kugbɔŋu nee ki tīī ni-yab ki dóòyee, ní dūú tīī Kriisitoo nikitil din bí Lawoodiiseeyee mun ń kàaǹ. Míǹ ní Lawoodiisee yab yaa tīiń-ni bi-yɔkuee ní kàaǹ ku mun.

¹⁷Ní tùkù Arkiipi[20] yii ú kpèè soooo kí tɔ̄ ditundi din ti-Dindaan tīī-uee tiŋan.

¹⁸Man Pɔɔl di dū m-ŋal ki ŋmàn̄ anyɔɔbun nee ki jáaḿ-ni. - Taa súntímaan yii m bí sarkan. - Unimbɔti ŋanti ń nīn bí ni-pu.