Read Ntcham 1 Thessaloniciens 1 Bible Online

1 Thessaloniciens 1 - Ntcham bible

1 Thessaloniciens 1

¹Man Pɔɔl nì Siilasi nì Tiimootee di ŋmàn̄ kugbɔŋu nee. Ti ŋmàn̄-ku kí tīī nimbi Kriisitoo nikitil din bí Teesalooniiki[1] ki sá ti-Baa Unimbɔti nì ti-Dindaan Yeesu Kriisitoo yabee. Unimbɔti ń ŋá-ni tiŋan kí tīī-ni ŋgbansɔŋfi.

²Ti pàkà Unimbɔti ní baabadal ni-kɔkɔ pu, ní ti-wimmeem poonee ti téetí ki mèé ni-pu múlmul.

³Ti-wimmeem poon ti-Baa Unimbɔti nimbiinee, ti téetí atuun ŋin ni tūǹ ni-fookiiu nì ni-neendi puee nì ni-mákal din ni cáá ti-Dindaan Yeesu Kriisitoo puee nín pɔ̄ɔ̄ miŋyee[2].

⁴Nnabiyaamu, ti nyí yii Unimbɔti néeń-ni ní ki lútì-ni ní nīn sá u-yab.

⁵Kun puee Tibɔmɔntiil tin ti sòon̄ nì nee kaa sá nì kinyɔkɔn ŋmaniŋma, ama ti nìn sòon̄ nì Unimbɔti pɔŋŋu nì u-Fam tūtuntam ki tɔ́kɔ́ ibaamɔn pu páaa ní. Ni nyí ti-pu ti nín nìn dɔ́miń ki bí ni-kansikin nì mbimbim min kí tūtuǹ-nee.

⁶Ni nín fōō Unimbɔti bɔti ki kíí nì falaabi tikpil poon nì dipɔɔpindi din Unimbɔti Fam tììyee puee, ni kpántì bin fōō timbi nì ti-Dindaan didandee dee[3].

⁷Min ni ŋá nee dàkà Maseeduwaan nì Akaayi[4] yab bin fōō ki kííyee mun ń fōō míǹ dee.

⁸Kun puee nimbi cee ní ti-Dindaan bɔti gbītì, ki bàn̄ Maseeduwaan nì Akaayi yab cee. Kaa sá bíǹ baba, ajan ŋin kɔkɔ kíǹee yab mun gbìl̄ ni nín fōō Unimbɔti ki kíí miŋyee. An kaa ti bàlifī yii timbi ń māafì-bi gba.

⁹Báà ŋma máafí ti nín dɔ́miń ni-cee ni fōō-ti pu, ki fá ni-waaŋi ki kíǹ ki nóó ibaamɔn Nimbɔtiu un bí dimaŋfalinee.

¹⁰Ni kā ki cí yii u-Jipɔɔn Yeesu ń nyānní yilpu kí dāan̄. Úǹ ní Unimbɔti fīkitì ditaŋkpiilin. Úǹ di fīī-ti ki nyántì Unimbɔti ŋuul din bí ki dòońee poon.