Read Ntcham 1 Thessaloniciens 2 Bible Online

1 Thessaloniciens 2 - Ntcham bible

1 Thessaloniciens 2

¹Nnabiyaamu, kii nimbi ni-ba nín pée nyí puee, kaa sá yii ti dɔ́miń ni-dumpu fám.

²Ni nyí yii bi sāaǹ-ti ki sīī-ti Fiiliipi tiŋkin ní ti dāa nín bāań ni-cee Teesalooniiki. Ama ní Unimbɔti tīī-ti kunyannyaau tí sòoǹ nì ni u-Bɔmɔntiiti nì dikɔ̀ndi poon[5].

³Ti-bɔti tin ti sòoǹee kaa sá tinyimɔmbɔti, kaa sá ilandɔkɔkpiti bɔti, kaa tí sá tibɔŋmatiŋkaal.

⁴Ama Unimbɔti cɔ́ŋkì-ti ní ki dū u-Bɔmɔntiiti ki ŋúbiǹ-ti tí sòoǹ. An puee ní ti sòoǹ min làá nīn fáatiǹ Unimbɔti un wāĺ ti-pɔbiliŋinee, an kaa sá kí fáatíǹ binib.

⁵Nimbi ni-ba nyí yii taa sòon̄ nì ni tibɔkiilkaal ki ká jaanjaan. Taa tí sòoǹ ki nyàab̀ ni-cee animbil yam, Unimbɔti nyí ti-pu míǹ.

⁶Taa nyàab̀ ubɔ ń tīī-ti tinyool. Taa nyàab̀ nimbi nyootaaa, kaa nyàab̀ bin kíǹee mun yati.

⁷Ama ti bàà cáá nsan kii ti nín sá Kriisitoo kpambaliŋee puee kí tùkù-ni yii nimbi di máaǹ kí nīn kpèé-ti, ama taa ŋá míǹ. Ti kāl̀ ni-cee ki mɔ̄ kii ubinaati nín mɔ̄ pu ki ŋúb́ u-biyaamuee ní.

⁸Ti nín néeń-ni puee, ti là yii án taa nín̄ sá Unimbɔti bɔti ŋmaniŋma ní tí tīī-ni, ama tí dū ti-maŋfal kí kūtì kí tīī-ni, kun puee ni kɔ́-ti tiŋan tiŋan.

⁹Nnabiyaamu, nimbi ni-ba ká ti nín túń atuun pu ŋwiimpu nì kunyeeu ki gīī kí ŋmā kí ŋúb́ ti-ba kí nīn sòoǹ Unimbɔti bɔti, án taa nín̄ sá yii ni-kansikin ubɔ ní ń nīn tú ti-gìńdee.

¹⁰Nimbi ni-ba ká. Unimbɔti mun ká yii ti-bimbim min ti dūu kāl̀ nimbi bin fōō Unimbɔti bɔti ki kííyee kansikinee bí circir ki bí deedee. Taa yīntì báà tiba nì tiba poon.

¹¹Min ní ni nyí yii ubaati ŋáań u-biyaamuee, míǹ ní ti ŋá ni-kansikin ubɔ ubɔ.

¹²Ti sáŋkì-ni ki tīī-ni kunyannyaau ki páb́-ni yii ní nīn còom̄ min fáatiǹ Unimbɔtee, úǹ un yíiń-ni ní dāá kɔ́ u-Beel nì u-nyootinee.

¹³Kun pu ti gíti pàkà Unimbɔti kaa gbèentée di sá ti nín cáań Unimbɔti bɔti ki sòon̄ nì nee, ni pílifì-tì ki fōō-tì kaa dūu yíiń binib bɔti, ama ki fōō-tì yii tì sá Unimbɔti bɔti tiŋman. Tibɔti gbantee di tūǹ nimbi bin fōō ki kííyee pɔbiliŋ poon atuun.

¹⁴An puee, nnabiyaamu, ni dī Unimbɔti nikitil din bí Juudee ki sá Yeesu Kriisitoo yabee tabɔbiliŋ dee. Di sá yii falaabi bin ni jíń ni-jutiibi ceeyee, falaabee bibaantiibi ní bi mun jíń Juuda yab ŋaan[6].

¹⁵Bíǹ di kūū ti-Dindaan Yeesu nì Unimbɔti bɔnaatiliibi ki sāaǹ ti mun[7]. Unimbɔti kaa gèetíǹ-bi ní bi sá binib kɔkɔ pulincɔntiibi.

¹⁶Bi pìintí-ti nsan tí taa sòoǹ nì bin kaa sá Juuda yabee Unimbɔti bɔti tin ŋūǹ kí cáań-bi difiilee. Bi mɔ̀tīi gbēentí bi-kpitii pu ŋyunti kamaa. Ama Unimbɔti fōō bi-pu diŋuul ki dóò.

¹⁷An yaa sá timbee, nnabiyaamu, doooo ŋyunti ŋun ti yāaǹ tɔbin nì tiwun yàantam, kaa sá nì ti-pɔbiliŋee, ti nyàab̄ nì dinimbinaamandi kí bàà fàtīí ká ni-nimbiin ti-pɔbiliŋ ń bàà sɔ̀ŋkì.

¹⁸Ti mɔ̀n̄ yii tí gítiń ni-cee, cilinjee man Pɔɔl, m mākaǹ ŋfunyɔm kupaau kí bàà gítiń ni-cee. Ama Sitaan pīiǹ-ti nsan.

¹⁹Nimbi di sá bin pu timbi cɔ́tée, ki sá ti-pɔɔpindi nì ti-jajil daaŋku kun pu ti-Dindaan Yeesu yaa láa gítìńee, ti dāa gbàntī u-nimbiinee.

²⁰Tiŋman nimbi di sá timbi nyooti nì ti-pɔɔpindi.