Read Ntcham 1 Thessaloniciens 3 Bible Online

1 Thessaloniciens 3 - Ntcham bible

1 Thessaloniciens 3

¹Ti nín kaa nìn gíti ŋūǹ kí nīn kā míǹ kaa gbìl̄ ni-puee ní timbi lēē yii min ŋān̄ee di sá tí gbíntí kí kàl̄ Ateeni ti-baba[8].

²Ní ti dū ti-nabiki Tiimootee ti nì un tūǹ Unimbɔti tundi ki sòoǹ Kriisitoo Bɔmɔntiitee ki túnní ni-cee ú tīī-ni kunyannyaau kí kūtì-ni mpɔn ni-fookiiu poon.

³Ni-kansikin ubɔ ń taa yàntī falaa un poon ni bée ń ŋmā-u. Kun puee ni nyí yii an sá falaa di pée dɔ̄ ki cí-ti tí jī.

⁴Ti nín nìn dáá bí ni-ceeyee, ti nìn pée tùkū-ni ki yóoǹ yii falaa dɔ̄ ki cí-ti, an di bāań nee kii ni nín nìn gbìl̄ puee.

⁵M nín kaa ti ŋūǹ kí nīn gbíntìi kā ki cée puee ní m túnní Tiimootee ú dāá kpèè ni-fookiiu nín bí puee, kun puee m fàŋkí yii Sitaan ń taa láa cɔ̄ŋkì kí líí-ni ti-tundi din ti túńee ń ŋá fám.

⁶Ama kɔŋkɔnnee Tiimootee nín nyánní ni-cee ki fātìi bāańee[9], u cáań-ti faawiimɔnti ni-fookiiu nì ni-neendi pu. U máafì-ti yii ni téetí ti-pu múlmul mmɔntiimin ki nyàab̀ kí bàà ká-ti kii ti mun nín nyàab̀ kí ká ni mun puee.

⁷Míǹ puee nnabiyaamu, ni-puee ti kāntí kunyannyaau ti-falaabi nì ti-nimbinaamandi kɔkɔ poon. Ni-fookiiu di tīī-ti dipɔɔsɔŋkil.

⁸Díǹ pu nee timbi ŋmátì ní, kun puee ni gbíntìi bí ti-Dindaanni ki ŋúb́ an píkí.

⁹Dipɔɔpiŋkpaandi din ti cáá ni-pu ki fàal̀ Unimbɔti nimbiinee, taa ti nyí gba ti nín làá pàkà-u kí gbèen̄ puee.

¹⁰Ti mèé ki páb̀-u ŋwiimpu nì kunyeeu yii ú pée yàntī tí gíti ká-ni án nín làá ŋá pu ní kun naa cááyee tí tīī-ni ní dūú gbéeǹ ni-fookiiu puee.

¹¹Ti-Baa Unimbɔti u-ba nì ti-Dindaan Yeesu ń ŋāŋkì ti-saŋŋu tí ŋmā kí dāá ká-ni.

¹²Ti-Dindaan ń yàntī dineendi din ni cáá tɔb pu nì binib kɔkɔ puee ń wíiǹ ní mɔ̀tīí nīn néeń tɔb míǹ tikpil kí nīn pée cáa cá, án nīn bí kii ti mun nín néeń-ni puee.

¹³Ú yàntī ni-pɔbiliŋ ń nīn tɔ́kɔ́ ibaamɔn pu ki pɔ̄ɔ̄, kí nīn bí circir bí taa ká ni-pu ikpiti iba ti-Baa Unimbɔti nimbiin ŋyunti ŋun ti-Dindaan Yeesu yaa láa gítìń nì bin kɔkɔ sá u-yabee. Ameeni.