Read Ntcham 1 Thessaloniciens 5 Bible Online

1 Thessaloniciens 5 - Ntcham bible

1 Thessaloniciens 5

¹Nnabiyaamu, an kaa ti bàlifī yii tí ŋmà kí tùkù-ni iyunti in ní an bɔtee làá bàńee.

²Di sá yii nimbi ni-ba ni nyí ti-Dindaan dāantam bɔti tiŋan yii u làá bàń kii unaayuu nín dòoń kunyeeu puee ní[12].

³Ŋyunti ŋun binib yaa láa bí ki lì yii: «Ŋgbansɔŋfi, ti ŋmátì dee[13]», dicilpu kpalaa niin ní nnaabu ń jēetí bi-pu kí nàan̄-bi. Báà ubɔ kaa dāa ŋmátí, an dāa bí kii imatiŋween nín bàń upɔdaan puee ní.

⁴Ama nimbee, nnabiyaamu, naa ti bí dibɔmbɔndin ŋwiin gbanti ń dāá túuǹ-ni kii unaayuu nín tūuntí binib puee.

⁵Di sá yii nimbi kɔkɔ sá ŋwalifi biyaamu ní ki bí ŋwiimpu. Taa sá kunyeeu yabaaa, kaa sá dibɔmbɔndi yab.

⁶Míǹ puee, tí taa nín̄ gèeǹ kii bin kíǹee nín gèeǹ puee, ama timbi ń fìntī kí nīn ŋúb́ ti-ba.

⁷Kunyeeu ní bin gèeǹee gèeǹ, ní bin nyù ki gbéèyee nyù kunyeeu.

⁸Ama timbi bin sá ŋwalifin yabee. Ti máaǹ kí nīn ŋúb́ ti-ba tiŋan. Ti máaǹ kí dū ti-fookiiu nì ti-neendi kí dūú pèen̄ kii dijanjabɔkutilee, ní kí dū ti-fiil din pu ti mákée kí cíkiń kii kifuuliiyee[14].

⁹Di sá yii Unimbɔti kaa lēē-ti ki yóoǹ tí nīn sá bin pu u làá dāá fōō diŋuulee, ama tí nīn sá bin làá ká difiil ti-Dindaan Yeesu Kriisitoo puee.

¹⁰Úǹ Kriisitoo di kpíì ti-pu, án nín làá ŋá pu báà ti yaa láa bí dimaŋfalinaaa, ti yaa láa kpíìyaaa, u yaa láa gítìńee ti nì u ń kpāfì kí nīn bí mbaantiiminee.

¹¹Míǹ puee ní nīn tììmaan tɔb kunyannyaau ki kútí tɔb mpɔn kii ni nín pée ŋáań puee.

¹²Nnabiyaamu, ti mèé-ni yii ní nīn tɔ́ bin bí ni-kansikin ki tūǹ ditundi, ki cáá ti-Dindaan bɔti ki dàkà-ni, ki kpòotī-nee.

¹³Nín̄ cáámaan bi-pu dineeŋkpaandi atuun ŋin bi bí ni-kansikin ki tūǹee pu. Ŋgbansɔŋfi ń nīn bí ni-kansikin.

¹⁴Ti mèé-ni, nnabiyaamu, yii ní kpāafì biwutijoodambee, kí tīī bifaantidambee kunyannyaau, kí tūtuǹ bin wunti yɔ̄tèe, kí nīn cáá kimɔtii báà ŋma pu.

¹⁵Ní nīn nyíǹ ni-ba ni-jutiibi yaa ŋá-ni ikpitee, ní taa dū ikpiti kí téeǹ-bi, ama nín̄ nyàab̀maan tiŋan diŋál baabadal ki ŋáań ni-jutiibi nì binib kɔkɔ.

¹⁶Ní nīn fàal̀maan baabadal,

¹⁷kí nīn mèé Unimbɔti kí taa gbèen̄.

¹⁸Báà tin kamaa di yaa pée bāańee, ní nīn jáaḿ Unimbɔti. Min Unimbɔti là bin sá Yeesu Kriisitoo yabee ń nīn bée dee.

¹⁹Ní taa kpɔ̀ Unimbɔti Fam tuuŋŋi ni-ni,

²⁰kí taa kpèè Unimbɔti bɔnaatiliibi bɔti tin bi sòon̄ee fám.

²¹Ama, ní kpèè tiwan kɔkɔ kí lēē tin ŋān̄ee,

²²kí nīn nyíǹ ni-ba nì tikpitil kɔkɔ nì ti-bulifi.

²³Unimbɔti un tìì ŋgbansɔŋfee u-ba ń yàntī ní dū ni-ba kɔkɔ kí tīī-u. Ú ŋúb́ ni-Fam nì ni-nammu nì ni-wunti kɔkɔ, án nín làá ŋá pu ti-Dindaan Yeesu Kriisitoo bàńtamee, ní nīn bí circir bí taa láa ká ni-pu ikpiti ibee.

²⁴Un yíiń-nee làá ŋá míǹ kí tīī-ni kun puee u sá ibaamɔndaan ní.

²⁵Nnabiyaamu, ní nīn mèé ki tìì ti mun.

²⁶Ní jāam̀ ti-yab nì kunabitiiu jaamii kí tīī-mi.

²⁷Nì ti-Dindaan yindi puee, m tùkù-ni yii ní dūmaan kugbɔŋu nee kí kàaǹ nnabiyaamu kɔkɔ nimbiin.

²⁸Ti-Dindaan Yeesu Kriisitoo ŋanti ń nīn bí ni-pu.