Read Ntcham Josué 1 Bible Online

Josué 1 - Ntcham bible

Josué 1

¹Ti-Dindaan tɔntɔnliu Mooyiisi kúm boonee, ní ti-Dindaan tùkū Nuuni jipɔɔn Joosuwa un nìn bí Mooyiisi cee ki tútúǹ-uee yii:

²«M-tɔntɔnliu Mooyiisi kpíì dee. Kɔŋkɔnnee, yīkì sii nì samaa nee kɔkɔ ní dùtī Jɔɔdan buŋŋu ŋun bí nee kí kɔ́ kitiŋ kin m làá dūu tīī Isirayeel yabee.

³M làá dū laakin kamaa ní ni-taaŋi yaa tāāyee kí tīī-ni kii m nín nìn tùkū Mooyiisi yii m làá ŋá puee.

⁴Ni-tiŋki di làá nīn sá kí yòon̄ kuteeu ŋgiil pú kí cáá sāā Leebanɔn jooŋŋi, kí yòon̄ kí nīn cá dimɔɔkpaandi ŋgan pú, an dàkà yii Eefiraati mɔɔl, ní kí yòon̄ Eeti yab tiŋki kɔkɔ ŋwìiń nyalaŋki pú kí tin cáá sāā Meediiteeranee tiŋkuu ŋwìiń jeetilaŋki pú.

⁵A-maŋfal wiiŋyi kɔkɔ kí tin cáá sāā a-kúmee, ubɔ kpá kí já kí pɔ̄ɔkiǹ-si. M nín nìn bí Mooyiisi cee puee, míǹ ní m làá nīn bí si mun cee. Maa làá yàntī-si, kaa làá fá-si mun.

⁶Pɔ́ɔǹ a-ba kí ká dipɔbil, kun puee sii di làá dū kitiŋ kin m pōoǹ dinibul nee naanjab yii m làá tīī bi-naantiibee kí tīī-bi[1].

⁷Sii dee ká dipɔbil kí taa fàŋkì báà tiba, kí nīn pée nóó Mara un m-tɔntɔnliu Mooyiisi yóoǹ-see deedee, kí taa yìntīǹ an marau gbanti báà fiii. A yaa ŋá mimmee tin kɔkɔ ní a làá ŋée làá nīn còom̄ tiŋan ní ki tīī-si.

⁸Á yàntī kugbɔŋu kun poon bi ŋmàn̄ Mara ki ŋée ń nīn bí ki kɔ́ĺ-si. Á nīn pée kàaǹ-ku ŋwiimpu nì kunyeeu, án nín làá ŋá pu á ŋmā kí nīn ŋáań tikɔkɔ ki nóó nì tibɔti tin bi ŋmàn̄ ku-poonee. A yaa ŋáań mimmee ní a làá ŋmā kí bɔ́ntí a-sàmbiyaamu ní án bútí-si á ŋmā kí ŋá tin kɔkɔ a là kí ŋée.

⁹Maa kpáafì-si yii á ká dipɔbil kí taa fàŋkì báà tibaaa? Taa yàntī tifaandi ń cúú-si, kí taa yàntī a-wunti ń yɔ̀tī, kun puee man a-Dindaan a-Nimbɔtiu làá nīn bí a-cee laakin kamaa ní a làá cùee!»

¹⁰Niinee ní Joosuwa tīī Isirayeel yab tindaŋkpilib mara nee yii:

¹¹«Ní yìim̀maan dinaapaal kɔkɔ pu kí bāakì tibɔti nee kí tùkù samaa kɔkɔ. Ní lì yii: <Ní bɔ́ntímaan tijin kí yóoń, kun puee kí yòon̄ díǹ kí tin sāā iwiin itee, ni làá dùtī Jɔɔdan buŋŋu ŋun dɔ̄ nee kí cùú já kí fōō kitiŋ kin ti-Dindaan ni-Nimbɔtiu tīī-ni, kí nīn sá ni-yakee.>»

¹²Boonee ní Joosuwa sòon̄ nì Rubeen naakookun yab, nì Gaadi naakookun yab, nì Manasee naakooku dijandi diba yab ki bí-bi yii:

¹³«Ní téetímaan mara un ti-Dindaan tɔntɔnliu Mooyiisi nìn tīī-nee. U nìn lī yii: <Ti-Dindaan ni-Nimbɔtiu tīī-ni diŋuŋfil ní kitiŋ kin u tīī-ni nee poon.>

¹⁴An puee, yàntīmaan ni-nimpoobi nì ni-biyaamu nì ni-waŋkuti ń gbíntí kitiŋ kin Mooyiisi tīī-ni Jɔɔdan buŋgbandi din bí doo pú nee. Nimbi bibaatandambi kɔkɔ ń bóob́ dikɔ̀ndi kí lìntī ni-nabiyaamu nyɔkɔpu kí cùú tūtuǹ-bi

¹⁵bí já kí tin cáá sāā ŋyunti ŋun ní ni-Nimbɔtiu làá dāá tīī-bi diŋuŋfil kii u nín tīī ni mun diŋuŋfil puee, ní bi mun ń ŋmā kí fōō kitiŋ kin ti-Dindaan ni-Nimbɔtiu tīī-bee. Míǹ boonee ní ní gítiń kí dāá kàl̄ ni-tiŋki kin ti-Dindaan tɔntɔnliu Mooyiisi tīī-ni Jɔɔdan buŋgbandi din bí doo pú nee, an dàkà yii dibuŋgbándi din bí ŋwìiń nyalaŋki pú nee[2].»

¹⁶Ní bi bí Joosuwa yii: «Ti kíí ki làá ŋá tin kɔkɔ a yaa bí yii tí ŋée. Laakin ní a yaa pée tú-tee, ti làá cù.

¹⁷Kii ti nín nìn pée pílifiǹ Mooyiisi tikɔkɔ poon puee, míǹ mbaantiim ní ti làá nīn tí pílifíǹ sii mun. Ti-Dindaan a-Nimbɔtiu ń nīn bí a-cee kii u nín nìn bí Mooyiisi cee puee.

¹⁸Unil un kamaa yaa ŋèen̄ nì a-marab, ki yíì kaa pílifì a-nyɔkɔ kí ŋá a nín lī puee, bí kpɔ̀ udaan! Siiyee, pɔ́ɔǹ a-ba kí ká dipɔbil!»