Read Ntcham Josué 11 Bible Online

Josué 11 - Ntcham bible

Josué 11

¹Asɔɔr bɔtiu Jabiini nín nìn gbìl̄ tin jítèe ní u lēē binib ki tú Maadoon bɔtiu Joobaab, nì Simroon bɔtiu nì Akisaafi bɔtiu cee.

²U nìn tú bibɔtiibi bin kóòń ŋgan pú ajoon puee, nì ditantakalin Kiineereeti mɔɔl ŋgiil pú, nì Seefeelaa paal puee, nì Dɔɔr tiŋki kin bí ŋwìiń jeetilaŋki púee cee.

³U nìn gíti tú Kanaan yab bɔtiibi bin kóòń ŋwìiń nyalaŋki pú nì ŋu-jeetilaŋki púee, nì Amɔɔr yab nì Eeti yab nì Peeriisi yab nì Jeebusi yab bin kóò ajoon puee, nì Eefi yab bin kóò Eermɔn jool taapu Miisipa tiŋkinee bɔtiibi cee.

⁴Ní bi-kɔkɔ yíkìi kālìń nsan pu, bi nì bijanjaliibi kɔkɔ. Bijanjaliibee nìn wīikí tikpil tikpil kii tiŋkugbandi bulee, ní itaamu nì janjatɔrɔkub bin bi nìn kāńee mun wīikí an kaa cáá bí lì.

⁵Bibɔtiibi gbanti nìn kóoǹ ki kpáfèe ní ki cūtìi gāā dijanjanaapaal Meeroom buŋŋu caŋin kí jáǹ Isirayeel yab.

⁶Ní ti-Dindaan bí Joosuwa yii: «Taa pée fàŋkì-bi, kun puee fool naŋkɔnampuee mama m-ba fu kūū bi-kɔkɔ ki tīī Isirayeel yab dee. Á fu gàatì ki gīfì bi-taamui taaŋi ní kí fu wà bi-janjatɔrɔkub ŋŋmi.»

⁷Joosuwa nì Isirayeel yab nìn cūtìi túuǹ-bi Meeroom buŋŋu caŋin ní ki páatìi jéetì bi-pu.

⁸Ti-Dindaan nìn dū-bi ki ŋá Isirayeel yab ŋaan ní bíǹ jáǹ ki pɔ́ɔkiǹ-bi. Bi nìn jìn̄-bi ki tin bàn̄ Siidɔn-Raaba nì Miisireefɔti-Maayiim timmu ŋwìiń jeetilaŋki pú, ní ki jìn̄-bi ki tin bàn̄ Miisipa tantakalin ŋwìiń nyalaŋki pú. Bi nìn kūū bi-kɔkɔ, báà uniseen kaa kíǹ.

⁹Joosuwa nìn gāatì ki gífì bi-taamui taaŋi ní ki wùn̄ bi-janjatɔrɔkub ŋŋmi, ki nóó nì ti-Dindaan nín nìn tùkū-u yii ú ŋá puee.

¹⁰Míǹ boonee, Joosuwa nìn fātìi gítì ki cūtìi jáń ki fōō Asɔɔr tiŋki kin nìn sá atimbun gbanti kɔkɔ tiŋyilee, ní ki kūū ki-bɔtiu.

¹¹Bi nìn kūū binifoobi bin kóò kitiŋ gbantinee kɔkɔ. Báà uniseen kaa nìn kíǹ, ní ki sēē-kì ŋŋmi.

¹²Joosuwa nìn fōol̀ bibɔtiibi gbanti timmu kɔkɔ ki cútì bibɔtiibee bi-ba ki kūū. U nìn kūū ki céetì bi-kɔkɔ kii ti-Dindaan tɔntɔnliu Mooyiisi nín nìn sòon̄ pu ki síiǹee.

¹³Ama Isirayeel yab kaa nìn wùn̄ ntimu mun bi máń ki tɔ́kɔ́ǹ ŋgbantamu[21] puee báà kiba, asee Asɔɔr tiŋki baba ní Joosuwa nìn pée wùn̄ ŋŋmi.

¹⁴Isirayeel yab nìn yōoǹ tiwan tin bi nìn jáń ki fōō ntimu gbanti poonee ki kpáaǹ tiwaŋkuti. Ama bi nìn kūū ki céetì ntimuee nib kɔkɔ. Báà uniseen kaa nìn kíǹ.

¹⁵Tin ti-Dindaan nìn tīī u-tɔntɔnliu Mooyiisi mara ú ŋée, tíǹ ní Mooyiisi mun nìn dūu tīī Joosuwa. Ní Joosuwa nìn ŋá tin ti-Dindaan nìn tīī Mooyiisi mara ú ŋée deedee, kaa bātì báà tiba ki fá.

¹⁶Míǹ ní Joosuwa nìn jáń ki fōō kitiŋ gbanti kɔkɔ. U nìn fōō ntimu mun bí ajoon puee, nì Neegeeb teekun kɔkɔee, nì Gooseen timmu kɔkɔ, nì ntimu mun bí Seefeelaa paal puee nì mun bí Arabaa teekunee, nì mun bí Isirayeel jool nì ki-paal puee.

¹⁷U nìn gíti fōō kí yòon̄ Alaaki jool din bí ki cá Seeyiir tiŋki watil púee, kí tin cáá sāā Baal-Gaadi tiŋki kin bí Leebanɔn tantakalin, Eermɔn jool taapuee. U nìn cútì ntimu gbanti bɔtiibi kɔkɔ ki kūū.

¹⁸Joosuwa nìn dū iwiin kupaau ní ki jáń nì bibɔtiibi gbanti kɔkɔ.

¹⁹Kitiŋ báà kiba nib nì Isirayeel yab kaa nìn sòon̄ ki gbìlīǹ tɔb ki ŋá mpèé, asee Eefi yab bin nìn kóò Gabawɔn tiŋkinee baba. Isirayeel yab nìn jáń ní ki fōol̀ ntimu mun kíǹee kɔkɔ.

²⁰Ti-Dindaan di nìn pɔ́ɔkì ntimu gbanti nib pɔbiliŋ ní bi kíí ki jáń nì Isirayeel yab, án nín làá ŋá pu ní bíǹ ń kpɔ̀ kí céetí-bi kí taa sɔ̄ bi-saai kii ti-Dindaan nín nìn tīī Mooyiisi mara puee.

²¹Ŋyunti gbantee ní Joosuwa cūtì ki jáń nì Anaaki yab bin nìn kóò ntimu mun bí ajoon puee, an dàkà yii Eebrɔn nì Deebiir nì Anaab timmu, nì ntimu mun kɔkɔ bí Juuda nì Isirayeel jooŋŋi puee. Joosuwa nìn kūū ki céetì binib gbanti ní ki nāaǹ bi-timmu kɔkɔ.

²²Anaaki yab báà unil kaa nìn gíti kíǹ Isirayeel yab tiŋkin, asee Gaasaa nì Gaati nì Asidoodi timmun ní bikaaŋkaabi biba nìn kíǹ ki bí.

²³Joosuwa nìn fōō kitiŋee kɔkɔ ki nóó nì ti-Dindaan nín nìn tīī Mooyiisi mara puee, ní ki dū-kì ki yākatì ki tīī Isirayeel yab bí nīn kíǹ ki yì, ki nóó nì bi-naakɔti nín sá puee. Niinee ní ŋgbansɔŋfi dɔ́miń kitiŋee pu ní kujaau gbēeǹ.