Read Ntcham Josué 13 Bible Online

Josué 13 - Ntcham bible

Josué 13

¹Ŋyunti ŋun Joosuwa dāa púĺ tikpilee ní ti-Dindaan bí-u yii: «A-wiiŋyi kaa ti náaǹ, ama ní kitiŋ nee jandi din kíǹ ní fōōyee dáá gbíntìi wīikí tikpil.

²Kitiŋ jandi din kíǹ ní fōōyee di sá Fiiliistii yab nì Geesuur yab timmu kɔkɔ,

³an dàkà yii Kanaan yab tiŋki kin kíǹ ní fōōyee di sá kí yòon̄ Siikɔɔr buŋŋu ŋun dɔ̄ ki pìlīǹ Eejipiti tiŋki ŋwìiń nyalaŋki pú ki sá kikpaanyɔkɔee, kí cáá sāā Eekrɔn tiŋki ŋgan pú. Niin ní Fiiliistii yab bɔtiibi biŋmooyee nìn kóò. Bi-timmu di nìn sá Gaasaa nì Asidoodi nì Asikeelɔn nì Gaati nì Eekrɔn, ní kí kūtì Aafi yab timmu.

⁴Ŋgiil púee an kíǹ ní fōō kí yòon̄ Kanaan yab tiŋki kɔkɔ, nì Siidɔn yab tiŋki Meeyara, kí cáá sāā Afeeki yab tiŋki, ní kí gíti yòon̄ míǹ kí cáá sāā Amɔɔr yab tiŋki kpaanyɔkɔ.

⁵An kíǹ ní fōō Geebaal yab tiŋki, nì Leebanɔn tiŋki dijandi din bí ŋwìiń nyalaŋki púee kɔkɔ, kí yòon̄ Baal-Gaadi tiŋki kin bí Eermɔn jool taapuee kí cáá sāā Amaati tiŋki kpaanyɔkɔ.

⁶Ní púntíí fōō ajoon pu timmu kɔkɔ, kí yòon̄ Leebanɔn kí cáá sāā Miisireefɔti-Maayiim. Ntimu gbantinee Siidɔn yab di kóò. Mama m-ba di làá jà-bi Isirayeel yab nimbiin. Siiyee, pée dū kitiŋ kí yàkatī kí tīī Isirayeel yab bí nīn kíǹ ki yì kii m nín tīī-si mara puee.

⁷Kɔŋkɔnnee, cúú kitiŋ gbanti kí yàkatī kí tīī tinaakɔti tiwa tin kíǹee nì Manasee naakookun yab dijandi din kíǹee bí nīn kíǹ ki yì.»

⁸Manasee naakookun yab dijandi diba nì Rubeen naakookun yab nì Gaadi naakookun yab nìn fōō bi-tinjandi din Mooyiisi nìn tīī-bee Jɔɔdan buŋŋu ŋwìiń nyalaŋki pú ní. Ti-Dindaan tɔntɔnliu Mooyiisi di nìn yākatì kitiŋ gbanti ki tīī-bi.

⁹Bi-tinjandi gbanti di sá kí yòon̄ Arooweer tiŋki kin bí Arinɔn buŋŋu caŋinee, nì kitiŋ kin bí Arinɔn tantakalinee kɔkɔ, nì Meedeeba tiŋki kin dɔ̄ ki tèen̄ee kí tin sāā Diibɔn tiŋki.

¹⁰Bi-tinjandi gbanti nìn nìkī kí yòon̄ Amɔɔr yab bɔtiu Siiwɔn un nìn kóò Eesbɔn tiŋkin, kí tin cáá sāā Amɔn yab tiŋki kpaanyɔkɔ.

¹¹Bi-timmu di nìn gíti sá kí yòon̄ Galaadi tiŋki, nì Geesuur yab nì Maaka yab timmu, nì Eermɔn jool nì Baasan tiŋki kɔkɔ kí tin cáá sāā Salka tiŋki[25].

¹²Baasan tiŋki pu ní ubɔti Ɔɔgi, un nìn sá Reefa yab bin kíǹ kitiŋ puee ubɔee nìn jíń dibeel. U nìn kóò Asitarooti nì Eedreeyii timmun ní. Mooyiisi nìn jáń ki pɔ́ɔkiǹ bibɔtiibi gbanti liitil ní ki fōō bi-timmu.

¹³Ama Isirayeel yab kaa nìn fōō Geesuur yab nì Maaka yab timmu. An pu ní Geesuur nì Maaka yab dáá gbíntìi kóò Isirayeel yab kansikin ki dāa sāā díǹ pu nee.

¹⁴Leefii naakookun yab baba ní baa nìn yākatì kitiŋ ki kpáaǹ. Bíǹ fakal di sá saraabi bin bi ŋáań ki tìì ti-Dindaan Isirayeel Nimbɔtiuee, kii úǹ u-ba nín nìn pōoǹ-bi puee[26].

¹⁵Mooyiisi nìn tīī Rubeen naakookun yab bi-tinjandi ki nóó nì bi nín nìn pēē mmaal puee ní.

¹⁶Bi-tiŋki di nìn sá kí yòon̄ Arooweer tiŋki kin pìlīǹ Arinɔn buŋŋuee, nì kitiŋ kin bí ditantakalinee, nì kitiŋ kin dɔ̄ ki tèen̄ ki gítí Meedeeba tiŋki watil púee,

¹⁷nì Eesbɔn tiŋki nì ki-timbilimmu mun bí kitiŋ kin dɔ̄ ki tèen̄ee poonee kɔkɔ. An dàkà yii Diibɔn nì Bamooti-Baal nì Beeti-Baal-Meeyɔn,

¹⁸nì Yakisa nì Keedeemooti nì Meefaati,

¹⁹nì Kiiriyatayiim nì Siibima nì Seereeti-Asakaar tiŋki kin tɔ́kɔ́ kigbantaŋ pu ditantakalinee,

²⁰nì Beeti-Peewɔɔr nì Piisga jool nín wúntí puee, nì Beeti-Yeesimooti,

²¹nì ntimu mun kɔkɔ bí kitiŋ kin dɔ̄ ki tèen̄ee puee, nì Amɔɔr yab bɔtiu Siiwɔn un nìn kóò Eesbɔn tiŋkinee timmu kɔkɔ. Úǹ ní Mooyiisi nìn jáń ki pɔ́ɔkiǹ, ki kpáaǹ Maadiyan tiŋki bɔtiibi Eefi nì Reekeem nì Suur nì Kuur nì Reeba. Bíǹ gbanti kɔkɔ nìn bí ubɔti Siiwɔn taapu ní ki nìn kóò kitiŋ gbanti pu.

²²Beewɔɔr jipɔɔn Balaam un nìn sá ubɔɔyee mun nìn kútì binib bin Isirayeel yab nìn kūūyee poon.

²³Jɔɔdan buŋŋu di nìn sá Rubeen naakookun yab tiŋki kpaanyɔkɔ ŋwìiń jeetilaŋki pú. Rubeen naakookun yab tinjandi timmu nì di-timbilimmu nín nìn sá puee dee, ki nóó nì bi nín nìn pēē pēē mmaal puee.

²⁴Mooyiisi nìn tīī Gaadi naakookun yab mun bi-tinjandi ki nóó nì bi nín pēē pēē mmaal puee.

²⁵Bíǹ tiŋki di nìn sá Yaseer tiŋki nì Galaadi timmu kɔkɔ nì Amɔn yab tiŋki dijandi diba, kí cáá sāā Arooweer tiŋki kin pìlīǹ Raaba tiŋkee.

²⁶Bi-timmu di nìn gíti sá kí yòon̄ Eesbɔn tiŋki kí cáá sāā Ramati-Miisipee tiŋki nì Beetooniim tiŋki, ní kí yòon̄ Maanayiim tiŋki ki cáá sāā Deebiir tiŋki kpaanyɔkɔ.

²⁷Jɔɔdan buŋŋu tantakalinee, bi-timmu di nìn sá Beeti-Aram nì Beeti-Niimra nì Sukooti nì Safoon. Bíǹ di nìn gíti yì Eesbɔn bɔtiu Siiwɔn tiŋki kɔkɔ, an dàkà yii kí yòon̄ Jɔɔdan buŋŋu ŋwìiń nyalaŋki pú kitiŋ kin pée dɔ̄ kansikin kí tin cáá sāā Kiineereeti mɔɔl kúntilaŋki ŋgan púee.

²⁸Gaadi naakookun yab tinjandi timmu nì di-timbilimmu nín nìn sá puee dee, ki nóó nì bi nín nìn pēē pēē mmaal puee.

²⁹Mooyiisi nìn tīī Manasee naakookun yab dijandi diba mun bi-tinjandi Jɔɔdan buŋŋu, ŋwìiń nyalaŋki jaaŋŋu pú.

³⁰Bíǹ tiŋki di nìn sá Baasan tiŋki kɔkɔ, kí kíĺ Maanayiim nì Baasan bɔtiu Ɔɔgi timmu kɔkɔ nì Yayiir timbilimmu mun kɔkɔ pée bí Baasan tiŋki puee. Ntimu gbanti kɔkɔ nìn nyáń ntimu imuŋku ita ní.

³¹Bíǹ di nìn gíti yì Galaadi tiŋki dijandi diba nì Baasan timmu Asitarooti nì Eedreeyii, laakin ubɔti Ɔɔgi nìn kóòyee. Ntimu mun bi nìn tīī Manasee jipɔɔn Makiir biyaamu ki nóó nì bi nín nìn pēē pēē mmaal puee dee.

³²Atinjan ŋin Mooyiisi nìn yākatì ki tīī Isirayeel yab Moowaab tantakalin, Jɔɔdan buŋgbandi lapu pu yal, Jeeriikoo tiŋki ŋwìiń nyalaŋki púee dee.

³³Ama Mooyiisi kaa nìn tīī Leefii naakooku yab bíǹ ditinjandi. Ti-Dindaan Isirayeel Nimbɔtiu di nìn sá bíǹ fakal, kii úǹ u-ba nín nìn pōoǹ-bi puee[27].