Read Ntcham Josué 14 Bible Online

Josué 14 - Ntcham bible

Josué 14

¹Atinjan ŋin Isirayeel yab nìn fōō Kanaan[28] tiŋkinee sèé. Usaraaŋakpil Eeleeyasaar nì Nuuni jipɔɔn Joosuwa nì Isirayeel naakɔti poon binib nín pēē pēē mmaal puee kpilib di nìn yākatì atinjan gbanti ki tīī-bi.

²Kii ti-Dindaan nín nìn tīī Mooyiisi mara puee, bi nìn tɔ́ kasi ní ki yākatì atinjan gbanti ki tīī tinaakɔti tiwa nì dijandi tin kíǹee.

³Di sá yii Mooyiisi nìn pée tīī tinaakɔti tili nì dijandi tin béeyee tinjaŋŋi Jɔɔdan buŋgbandi lapu pu jaaŋŋu ní. Ama waa nìn tīī Leefii yab bíǹ ditinjandi Isirayeel naakɔti yab bin kíǹee kansikin.

⁴Jooseefi naantiibi nìn kpáfì ki sá tinaakɔti tili ní, Manasee yab nì Eefiraayiim yab. An puee baa nìn yākatì kitiŋ ki kpáaǹ Leefii yab. Ama bi nìn tīī-bi ntimu bí nīn kóò, nì ntimu gbanti kpaanceetii, bi-waŋkuti nì bi-wanti tin bi gíti cááyee pu.

⁵Isirayeel yab nìn nóó ti-Dindaan nín nìn tīī Mooyiisi mara puee ní ki yākatì kitiŋ.

⁶Dalbee, Juuda naakookun yab biba dɔ́miń Joosuwa cee Giilgaal tiŋkin ní Yeefunee un sá Keeniisi maaliŋunee jipɔɔn Kaleeb bí Joosuwa yii: «A máaǹ ki téetí tin ti-Dindaan nìn sòon̄ man nì sii pu u-tɔntɔnliu Mooyiisi cee, Kadeesi-Baarneeya tiŋkinee.

⁷M nìn cáá abin imuŋku ili ní ti-Dindaan tɔntɔnliu Mooyiisi nìn túnní-mi ŋyunti ŋun ti nìn dáá bíń Kadeesi-Baarneeya tiŋkinee m dɔ́miń ki cɔ́ŋkì ki béè kitiŋ nee, ní ki fātìi gítì ki máafì-u an nín jítì puee nì m-pɔbil kɔkɔ.

⁸Man nì m-nabiyaamu mun nìn cūtèe nìn bíil̀ samaa pɔbil, ama ní man nìn nóó ti-Dindaan m-Nimbɔtiu bɔti nì dipɔbil diba[29].

⁹Ŋwiin gbantee Mooyiisi nìn pūtì ki pōoǹ-mi yii: <M pūtì yii kitiŋ kin a-taal tāā nee, kíǹ ní bi làá dūú tīī sii nì a-maaliŋu yab ní nīn kíǹ ki yì kí nīn cá jaanjaan, kun puee a ŋá ti-Dindaan m-Nimbɔtiu nín bí yii á ŋá puee deedee!>

¹⁰Ti-Dindaan lafun yāntì m bí dimaŋfalin ki dāa sāā díǹ pu nee, kii u nín nìn pōoǹ-mi puee. Ti-Dindaan nín sòon̄ nì Mooyiisi an bɔtee, an ŋá abin imuŋku ili nì aŋmoo dee. Ŋyunti gbanti ní Isirayeel yab nìn bí ki còom̄ kuteeunee. Kpèè, kɔŋkɔnnee m cáá abin imuŋku inaa nì abin aŋmoo dee.

¹¹Díǹ pu nee m dáá pée gbíntìi pɔ̄ɔ̄ kii ŋwiin ŋun Mooyiisi nìn tīī-mi ditundi gbantee ní. Mpɔn dáá gbíntìi bí-mi kɔŋkɔnnee kii ŋyunti gbantee, ḿ ŋmā kí cù kujaau àá kí ŋá báà án yaa sá tiŋyee.

¹²An puee, dū dijool pu tiŋki kin ti-Dindaan nìn pōoǹ-mi ŋwiin gbantee kí tīī-mi. Ŋyuntee, m nìn tùkū-si yii Anaaki[30] yab di kóò niin, ní bi-timmu sá ntiŋkpaamu bi máń agun ki māntìi tú-mu. An yaa yíì ti-Dindaan làá tíkiń-mi ḿ ŋmā kí já kí fōō kitiŋ gbanti bi-cee, kii úǹ u-ba nín nìn sòon̄ puee.»

¹³Niinee ní Joosuwa bīiǹ Yeefunee jipɔɔn Kaleeb pu, ní ki dū Eebrɔn tiŋki ki tīī-u ú nīn kíǹ ki yì.

¹⁴An pu ní Eebrɔn tiŋki gbíntìi sá Yeefunee un sá Keeniisi maaliŋunee jipɔɔn Kaleeb tiŋki ki dāa sāā díǹ pu nee. Di sá yii u nìn kíí ki nóó ti-Dindaan Isirayeel Nimbɔtiu nì u-pɔbil kɔkɔ.

¹⁵Njaminee, Eebrɔn yindi di nìn sá Kiiriyati-Ariba. Arba gbanti di nìn nyáń diyindi ki jítiǹ Anaaki yab bin kíǹee kɔkɔ. Míǹ boonee ní ŋgbansɔŋfi dɔ́miń Kanaan tiŋki pu ní baa ti bíi jáà.