Read Ntcham Josué 15 Bible Online

Josué 15 - Ntcham bible

Josué 15

¹Bi nìn tɔ́ kasi ki lēē ditinjandi ki tīī Juuda yab bi dūu yākatì ki nóó nì bi nín pēē pēē mmaal puee. Bi-tinjandi gbanti nìn dɔ̄ kí kíĺ Siini teeku nín kúntí pu ŋgiil púee kí tin sāā Eedoom tiŋki kpaanyɔkɔ.

²Ŋgiil pú púee, bi-kpaanyɔkɔ nìn kíĺ Ŋyaam mɔɔl gbeenlaŋki, laakin kitiŋ tin kóò dimɔɔlin ní an náań nì dilimbil ki túĺ Neegeeb teeku púee.

³Ki yōoǹ niinee ki dūu dī Akrabiim gbantaŋki Siini teeku ŋgiil pú, ki nín jɔ́ḿ Kadeesi-Baarneeya tiŋki ŋgiil pú ki tin bàn̄ Eesirɔn tiŋkin. Ki yōoǹ niin ki nín jɔ́ḿ Adaar tiŋkin ní ki pɔ́ĺ ki cūtì Karka tiŋki watil pú,

⁴ki jítì Asimɔn tiŋki pu ki tin bàn̄ Eejipiti buŋŋu[31] ní ki tin sāā Meediiteeranee tiŋkuu. Ŋgiil púee, Juuda yab tinjandi din bi fōōyee kpaanyɔkɔ dee.

⁵Ŋwìiń nyalaŋki púee, bi-tinjandi kpaanyɔkɔ kíĺ Ŋyaam mɔɔl ki cáa sāā Jɔɔdan buŋŋu nín kúntí puee. Ŋgan púee, kikpaanyɔkɔ kíĺ Ŋyaam mɔɔl laakin náań nì dilimbilee ki cáa sāā Jɔɔdan buŋŋu nín kúntí puee.

⁶Ki yōoǹ niinee ki nín jɔ́ḿ Beeti-Oogila tiŋki, ki dī Beeti-Arabaa ŋgan pú ki tin sāā laakin bi yíì yii Rubeen jipɔɔn Bookan taŋkpalee.

⁷Kikpaanyɔkɔ yōoǹ niinee ní ki dūu dī Akɔɔr tantakalin ki tin bàn̄ Deebiir tiŋki. Ki pɔ́ĺ ŋgan pú ki nín cá Geeliilɔti tiŋki kin bí Adumiim gbantaŋki nimbiinee watil pú, mbun nín dɔ̄ puee ŋgiil pú. Ki nìkī ki nín cá Eeni-Seemeesi buŋŋu pú ní ki tin bàn̄ Eeni-Roogeel.

⁸Niinee ní kikpaanyɔkɔ fātìi nín jɔ́ḿ Been-Kiinoom tantakal pú, Jeebusi yab tiŋki kin bi gíti yíì yii Jeerusaleem tiŋkee caŋin. Niinee ní ki nín jɔ́ḿ dijool din bí Kiinoom tantakal nimbiin ŋwìiń jeetilaŋki pú, nì Reefayiim gbantaŋki kúntilaŋki ŋgan púee yilpu.

⁹Kikpaanyɔkɔ yíkì dijool yilpuee ní ki sīntì Neefitoowa nyimbuliŋu watil pú ní ki nín nìkì Eefrɔn jool timmu pu, ki pɔ́ĺ ki nín cá Baala tiŋki kin bi gíti yíì yii Kiiriyati-Yeeyariim tiŋkee watil pú.

¹⁰Kikpaanyɔkɔ yōoǹ Baala tiŋkee ní ki pɔ́ĺ ŋwìiń jeetilaŋki pú ki nín cá Seeyiir jool watil pú, ki kpākaǹ Yaariim jool din bi gíti yíì yii Keesalɔn joolee ŋgan pú, ki nín sìntī Beeti-Seemeesi tiŋkin ki cūtìi pūntì Tiimina tiŋki.

¹¹Ki yōoǹ niinee ní ki cáa bàn̄ Eekrɔn tiŋki caŋin ŋgan pú, ní ki pɔ́ĺ ki nín cá Siikaroon tiŋki watil pú, ki nín nìkì Baala jool nì Yabineeyeel tiŋki watil pú ní ki tin cáa sāā Meediiteeranee tiŋkuu.

¹²Ŋwìiń jeetilaŋki púee, Meediiteeranee tiŋkuu di nìn sá kikpaanyɔkɔ. Ditinjandi din bi tīī Juuda naakookun yab bi yākatì ki nóó nì bi nín pēē pēē mmaal puee kpaanyɔmmu dee.

¹³Yeefunee jipɔɔn Kaleeb mun nìn fōō kitiŋ Juuda yab tinjandi poon ki nóó nì ti-Dindaan nín nìn tùkū Joosuwa yii ú ŋá puee. Bi nìn tīī-u Kiiriyati-Ariba tiŋki kin nìn sá Anaaki yab tiŋki bi kíǹ ki yíì díǹ pu nee yii Eebrɔn tiŋkee ní. Arba di nìn sá Anaaki baa.

¹⁴Kaleeb nìn jìn̄ Anaaki jipɔmbi taatil bin nìn bí niinee naantiibi. U-jipɔmbi gbanti yiŋŋi di nìn sá Seesayi nì Akiimaani nì Talimayi.

¹⁵Boonee ní u nìkī ki cūtìi jáń nì Deebiir tiŋki kin bi nìn yíì dooooyee yii Kiiriyati-Seefeer tiŋkee yab.

¹⁶Niin ní Kaleeb bí yii: «Un di yaa ŋúń ki jáń nì Kiiriyati-Seefeer yab ki fōō bi-tiŋkee, m làá dū m-bisal Akisa kí tīī udaan ú cáá.»

¹⁷Ní Kaleeb nabiki Keenaasi jipɔɔn Ootiniyeel ŋúń ki jáń ki fōō kitiŋ gbanti. Di sá ní Kaleeb dū u-bisal Akisa ki tīī-u u cáá.

¹⁸Akisa bàn̄ u-cal ceeyee ní ki sāal̀-u ú bàlifì u-baa ú tīī-u tikpaatan. Boonee ní u kpákatì u-maŋki pu ní u-baa Kaleeb bālifì-u yii: «A là ba ní?»

¹⁹Ní u kii yii: «M là kí mèè-si tiba ní. Di sá yii a tīī-mi ntimu Neegeeb teekun ní, an puee á tīī-mi anyimbɔbil mun!» Ní Kaleeb tīī-u anyimbɔbil ŋin bí yilpu puee nì ŋin bí taapu puee.

²⁰Ditinjandi din bi nìn tīī Juuda naakookun yab ki nóó nì bi nín pēē pēē mmaal puee sɔ̀.

²¹Kunaakoou gbanti tinjandi poonee, ntimu mun kúntì ŋgiil pú, Eedoom tiŋki kpaanyɔkɔ watil púee di sá Yabiseel nì Eedeer nì Yaguur,

²²nì Kiina nì Diimoona nì Adaada,

²³nì Keedeesi nì Asɔɔr nì Yitinan,

²⁴nì Siifi nì Teeleem nì Beeyalooti,

²⁵nì Asɔɔr-Adaata nì Keeriyooti-Eesirɔn tiŋki kin bi gíti yíì yii Asɔɔr tiŋkee,

²⁶nì Amaam nì Seema nì Moolada,

²⁷nì Asaar-Gada nì Eesmɔn nì Beeti-Peeleeti,

²⁸nì Asaar-Suwaal nì Beerseeba tiŋki nì ki-timbilimmu kɔkɔ,

²⁹nì Baala nì Iyiim nì Eeseem,

³⁰nì Eeltoolaadi nì Keesiil nì Ɔrima,

³¹nì Siikilaagi nì Madimana nì Sansaana,

³²nì Leebawɔti nì Siiliim nì Ayiin nì Riimɔn. Ntimu gbanti nìn kpáfì mmuŋku nì muwa ní, mu nì mu-timbilimmu.

³³Ntimu mun bí Seefeelaa paal puee di sá Eesitawool nì Sooreeya nì Aseena,

³⁴nì Sanoowa nì Eeni-Ganiim nì Tapuuwa nì Eeniyam,

³⁵nì Yaarmuti nì Adulaam nì Sookoo nì Aseeka,

³⁶nì Saarayiim nì Aditayiim nì Geedeera tiŋki nì ki-timbilimmu. Mu nìn kpáfì ntimu kiba kpá saalku ní, mu nì mu-timbilimmu.

³⁷Ntimu mun nìn kíǹee di sá Seenan nì Adaasa nì Miigidaal-Gaadi,

³⁸nì Diileeyan nì Miisipee nì Yɔkiteel,

³⁹nì Lakiisi ní Bɔsikaati nì Eeglɔn,

⁴⁰nì Kaboon nì Lakimaasi nì Kiitiliisi,

⁴¹nì Geedeerooti nì Beeti-Daagɔn nì Naama nì Makeeda. Mu nìn kpáfì ntimu saalku nì kiba ní, mu nì mu-timbilimmu.

⁴²Ntimu mubɔ mun di sá Liibina nì Eeteer nì Asan,

⁴³nì Yiifita nì Asina nì Neesiib,

⁴⁴nì Keeyiila nì Akisiib nì Mareesa. Mu mun nìn kpáfì ntimu muwa ní, mu nì mu-timbilimmu.

⁴⁵Ntimu mun nìn gíti kútèe di sá Eekrɔn tiŋki nì ki-timbilimmu nì ntimbilimu mun bí ki-taapuee kɔkɔ,

⁴⁶nì Eekrɔn tiŋki ŋwìiń jeetilaŋki pú nì ntimu mun kɔkɔ pée pìlīǹ Asidoodi tiŋkee nì mu-timbilimmu kɔkɔ,

⁴⁷nì Asidoodi tiŋki nì ki-timbilimmu nì ntimbilimu mun bí ki-taapuee kɔkɔ. Kí kūtì Gaasaa tiŋki nì ki-timbilimmu nì ntimbilimu mun bí ki-taapuee kɔkɔ ki tin cáa sāā Eejipiti buŋŋu nì Meediiteeranee tiŋkugbandi.

⁴⁸Ntimu mun bí dijool puee di sá Samiir nì Yatiir nì Sookoo,

⁴⁹nì Dana nì Kiiriyati-Sana tiŋki kin bi yíì yii Deebiir tiŋkee,

⁵⁰nì Anaab nì Eesiteemoo nì Aniim,

⁵¹nì Gooseen nì Ɔlooni nì Giiloo. Mu nìn kpáfì ntimu saalaa nì muli ní, mu nì mu-timbilimmu.

⁵²Ntimu mun nìn gíti kútèe di sá Araab nì Duuma nì Eeseeyan,

⁵³nì Yanuum nì Beeti-Tapuuwa nì Afeeka,

⁵⁴nì Umita nì Kiiriyati-Ariba tiŋki kin bi gíti yíì yii Eebrɔn tiŋkee, nì Siiyɔɔr. Mu nìn kpáfì ntimu muwa ní, mu nì mu-timbilimmu.

⁵⁵Ki kútì Maawɔn nì Kaarmeel nì Siifi nì Yuuta,

⁵⁶nì Jisirayeel nì Yɔkideeyam nì Sanoowa,

⁵⁷nì Kaayiin nì Giibeeya nì Tiimina. Mu nìn kpáfì ntimu saalaa ní, mu nì mu-timbilimmu.

⁵⁸Ntimu mun nìn gíti kútèe di sá Aluuli nì Beeti-Suur nì Geedɔɔr,

⁵⁹nì Maarati nì Beeti-Anooti nì Eelteekooni. Mu nìn kpáfì ntimu muluu ní, mu nì mu-timbilimmu,

⁶⁰ní ki kútì Kiiriyati-Baal tiŋki kin bi gíti yíì yii Kiiriyati-Yeeyariim tiŋkee nì Arabaa tiŋki. Múǹ nìn sá ntimu muli ní, mu nì mu-timbilimmu.

⁶¹Ntimu mun nìn bí kuteeunee di sá Beeti-Arabaa nì Miidiini nì Seekaka,

⁶²nì Niibisan nì Iir-Ameela nì Eeni-Geedii. Mu nìn kpáfì ntimu muluu ní, mu nì mu-timbilimmu.

⁶³Ama Juuda yab kaa nìn ŋúń ki jìn̄ Jeebusi yab bin nìn kóò Jeerusaleem tiŋkinee ki fōō bi-tiŋki. An pu ní díǹ pu nee Jeebusi yab dáá gbíntìi kóò Jeerusaleem tiŋkin, Juuda naakookun yab kansikin.