Read Ntcham Josué 18 Bible Online

Josué 18 - Ntcham bible

Josué 18

¹Isirayeel yab nìn jáń ki fōō kitiŋ kɔkɔ. Niinee ní bi kóoǹ ki kpáfì Siiloo tiŋkin, ní ki dū dikpafindi tantiu ki cóoǹ niin.

²Ama Isirayeel yab kansikinee, an nìn kíǹ tinaakɔti tiluli yab bin baa láá yākatì kitiŋ ki lēē bíǹ tinjaŋŋi ki tīī-bee.

³Niinee ní Joosuwa bí Isirayeel yab yii: «Ni làá kàl̄ kí cīití kí tin sāā ŋyunti ŋulɔŋu ní kí cùú fōō kitiŋ kin ti-Dindaan, ni-naanjab Nimbɔtiu dūu tīī-nee ní?

⁴Ní lēēmaan kunaakoou kamaa poon binib bita bita. M làá dū-bi kí tɔ̄ bí cùú yìiǹ kitiŋ kɔkɔ pu, kí ŋmà bi-naakɔti tinjaŋŋi nín sá puee, ní kí fàtīí gítiń kí tùkù-mi.

⁵Bi làá cúú-kì kí yàkatī miluli pu ní. Juuda yab làá gbíntí bi-tinjandi pu ŋgiil pú, ní Jooseefi yab ń gbíntí bi-yal pu ŋgan pú.

⁶Ní ŋmàmaan atinjan alulee nín bí puee kí cáań-mi. Man làá tɔ̄ kasi ti-Dindaan ti-Nimbɔtiu nimbiin, kí lēē kunaakoou kamaa tinjandi kí tīī-ku.

⁷Ama Leefii yab bíǹ kaa cáá ditinjandi ki làá fōō nimbi kansikin. Bíǹ fakal di sá bí nīn sá ti-Dindaan saraaŋaliibi. An yaa kíǹ Gaadi yab nì Rubeen yab nì Manasee naakookun yab dijandi dibee, bíǹ gíti dáá fōō bi-fakal Jɔɔdan buŋŋu lapu jaaŋŋu, ŋwìiń nyalaŋki pú. Ti-Dindaan tɔntɔnliu Mooyiisi di nìn tīī bíǹ bi-fakal gbanti niin.»

⁸Ní binib bin bi lēēyee lafun yíkì ki nín cá. Kí wàatī bí búntí kí cùú ŋmà kitiŋ nín bí puee ní Joosuwa bí-bi yii: «Nín̄ cámaan kí cùú yìiǹ kitiŋ kɔkɔ pu. Ní kpèè kì nín bí puee tiŋan kí fàtīí gítiń kí tùkù-mi. M làá tɔ̄ kasi ti-Dindaan nimbiin Siiloo tiŋkin doo, kí yàkatī-kì kí tīī kunaakoou kamaa ku-tinjandi.»

⁹Ní binibee nín cá ki cūtìi yìin̄ kitiŋee kɔkɔ pu. Bi nìn ŋmàn̄ atinjan alulee nín bí puee nì ŋi-timmu. Míǹ boonee ní bi fātìi nín gítiń Joosuwa cee Siiloo naapaal pu.

¹⁰Joosuwa nìn tɔ́ kasi Siiloo naapaalin niin ti-Dindaan nimbiin, ní ki yākatì kitiŋ ki tīī Isirayeel yab. U nìn tīī kunaakoou kamaa ku-tinjandi.

¹¹Bi nín nìn tɔ́ kasee, an nìn péé ki lēē Beenjameen naakookun yab tinjandi ní ki tīī-bi. Bi-tinjandi gbanti nìn sáká Juuda naakookun yab nì Jooseefi naakookun yab tinjaŋŋi kansikin ní.

¹²Ŋgan púee, bi-kpaanyɔkɔ nìn kíĺ Jɔɔdan buŋŋu ní, ki dūu dī Jeeriikoo tiŋki ŋgan pú, ki kpākaǹ dijool ŋwìiń jeetilaŋki pú, ki tin cáa gbēeǹ Beeti-Aween teeku.

¹³Kikpaanyɔkɔ nìn yíkì niinee ní ki dūu kpākaǹ Luusi tiŋki kin bi gíti yíì yii Beeteel tiŋkee ŋgiil pú, ní ki nín sìntī Atarooti-Adaar tiŋki watil pú ki bàn̄ dijool din bí Beeti-Oorɔn tiŋkinee ŋgiil pú.

¹⁴Niinee ní kikpaanyɔkɔ nìn dūu pɔ́ĺ ki māntì ŋwìiń jeetilaŋki pú, dijool din bí Beeti-Oorɔn tiŋki nyɔkɔpuee ŋgiil pú ní ki cáa gbēeǹ Kiiriyati-Baal àá Kiiriyati-Yeeyariim tiŋki kin sá Juuda yab tiŋkee. Ŋwìiń jeetilaŋki púee, kikpaanyɔkɔ dee.

¹⁵Ŋgiil púee, kikpaanyɔkɔ nìn kíĺ doooo Kiiriyati-Yeeyariim nín kúntí puee ní, ki nìkī Ŋyaam mɔɔl watil pú ki tin cáa gbēeǹ Neefitoowa nyimbuliŋu.

¹⁶Kikpaanyɔkɔ tí yōoǹ niinee ní ki nín sìntī dijool kúntilaŋki laakin bíitiǹ Been-Inɔɔm tantakalee, Reefa yab tantakal poon ki cá ŋgiil pú. Ki nìn nóó Inoom tantakal gbantee ki dūu dī Jeebusi yab tiŋki ŋgiil pú, ki tin cáa gbēeǹ Eeni-Roogeel tiŋki.

¹⁷Kikpaanyɔkɔ nìn yíkì niinee ní ki pɔ́ĺ ŋgan pú ki nín cá Eeni-Seemeesi tiŋki pú, ki nìkī Geeliilɔti tiŋki kin bí Adumiim gbantaŋki nyɔkɔpuee ní ki nín sìntī laakin bi yíì yii Rubeen Jipɔɔn Boowan taŋkpalee watil pú.

¹⁸Ki nìn yōoǹ niinee ní ki kpākaǹ kigbantaŋ kin bí Beeti-Arabaa tiŋki nyɔkɔpuee ŋgan pú, ní ki nín nìkì Arabaa tantakalin.

¹⁹Niinee ní ki nìn dūu dī Beeti-Oogila tiŋki ŋgan pú ki cáa gbēeǹ Ŋyaam mɔɔl nín kífí pu ŋgan púee, an dàkà yii Jɔɔdan buŋŋu kúntilaŋki ŋgiil pú. Ŋgan pú kpaanyɔkɔ nín nìn sá puee dee.

²⁰Jɔɔdan buŋŋu di nìn sá kikpaanyɔkɔ ŋwìiń nyalaŋki jaaŋŋu pú. Beenjameen yab tinjandi din bi yākatì ki tīī-bee nì di-kpaanyɔkɔ nín nìn sá puee dee, ki nóó nì bi nín pēē pēē mmaal puee.

²¹Beenjameen naakookun yab gbanti timmu mun bi nìn fōō ki nóó nì bi nín nìn pēē pēē mmaal puee di nìn sá Jeeriikoo nì Beeti-Oogila nì Eemeeki-Keesiisi,

²²nì Beeti-Arabaa nì Seemarayiim nì Beeteel,

²³nì Awiim nì Paara nì Oofiraa,

²⁴nì Keefaar-Amɔna nì Oofinii nì Geeba. Mu nìn kpáfì ntimu saalaa nì muli ní, mu nì mu-timbilimmu.

²⁵Bi-timmu di nìn gíti sá Gabawɔn nì Raama nì Beerooti,

²⁶nì Miisipee nì Keefiira nì Moosa,

²⁷nì Reekeem nì Yiirpeel nì Tareeyala,

²⁸nì Seera nì Eeleefi nì Jeebusi àá Jeerusaleem tiŋki nì Giibeeyaati nì Kiiriyati. Mu mun nìn kpáfì ntimu kiba kpá saalku ní, mun nì mu-timbilimmu. Beenjameen yab tinjandi din bi nìn tīī-bi bi yākatì ki nóó nì bi nín pēē pēē mmaal puee dee.