Read Ntcham Josué 20 Bible Online

Josué 20 - Ntcham bible

Josué 20

¹Ti-Dindaan sòon̄ nì Joosuwa ki bí-u yii:

²«Tùkù Isirayeel yab yii bí lēē ntimu mun ubɔ yaa kaa nyí ki kūū unil ú sāǹ kí kɔ́ee[33]. M nìn dī Mooyiisi pu ki sòon̄ nì ntimu gbanti bɔti.

³Unil yaa kaa nyí ki kūū u-juti, ní an kaa sá mun yii u-ba nì u-làtamee, unikpɔlee ń sāǹ kí kɔ́ ntimu gbanti kiban kí ŋmátí un u kūūyee nabiki kin máaǹ kí kpɔ̀-u kí tɔ̀ ipɔntoonee ŋaan.

⁴Unikpɔlee ń sāǹ kí cù ntimu gbanti kiba poon, kí sīĺ kitiŋ punyɔkɔpu kí dū tibɔti nín jítì puee kí kàaǹ kí tùkù niin tindaŋkpilib. Bitindaŋkpilibee ń fōō unikpɔlee bi-tiŋki gbanti poon, kí nyàab̀ ŋkɔŋkoon kí tīī-u u nì bi ń nīn kóò.

⁵Un bi kūūyee nabiki kin máaǹ kí kpɔ̀ unikpɔlee kí tɔ̀ ipɔntoonee yaa jìn̄ u-boonee, bí taa dū unikpɔlee kí ŋá u-ŋaan. Di sá yii unikpɔlee kaa là ní ki kūū-u, kaa tí sá mun yii u ná-u.

⁶Unikpɔlee ń gbíntí kí nīn bí kitiŋ gbantin kí dāá sāā ŋyunti ŋun ní u làá dāá yūĺ samaa kɔkɔ nimbiin bí sòoǹ u-bɔtee. Ú nīn bí niin kí cáá sāā ŋyunti ŋun ní usaraaŋakpil un bi lēē ŋyunti gbantee yaa láa kpíìyee. Míǹ boonee, unikpɔlee ŋūǹ kí fàtīí gítí u-dumpu, kitiŋ kin poon u sáǹ ki kátèe.»

⁷Di sá ní bi nìn lēē Kadeesi tiŋki kin bí Galiilee tiŋkin Neefitalii jool puee, nì Siikeem tiŋki kin bí Eefiraayiim jool puee, nì Kiiriyati-Ariba tiŋki kin bi gíti yíì yii Eebrɔn tiŋki kì bí Juuda jool puee.

⁸Jɔɔdan buŋgbandi lapu pu yal Jeeriikoo tiŋki ŋwìiń nyalaŋki púee, bi nìn lēē Beeseer tiŋki kin bí kuteeunee Rubeen yab tiŋki kin tèen̄ee poon, ki nìn lēē Ramooti tiŋki kin bí Galaadi tiŋkinee Gaadi yab timmu poon, ní ki lēē Goolan tiŋki kin bí Baasan tiŋkinee Manasee yab timmu poon.

⁹Ntimu mun bi nìn lēē ki yóoǹ Isirayeel yab kɔkɔ nì binicambi bin kóò bi-kansikinee, un yaa kaa nyí ki kūū u-jutee ń sāǹ kí kɔ́ee dee. Mimmee unikpɔlee ŋūǹ kí ŋmátí un u kūūyee nabiki kin máaǹ kí kpɔ̀-u kí tɔ̀ ipɔntoonee ŋaan, kí nīn cí ŋyunti ŋun ní u làá dāá yūĺ samaa nimbiin bí sòoǹ u-bɔtee.