Read Ntcham Josué 4 Bible Online

Josué 4 - Ntcham bible

Josué 4

¹Ŋyunti ŋun samaa kɔkɔ dūtì Jɔɔdan buŋŋu ki dóòyee, ní ti-Dindaan bí Joosuwa yii:

²«Lēē samaa kansikin binib saalaa nì bili, kunaakoou kamaa poon unil ubɔ ubɔ,

³kí tùkù-bi yii: <Ní kɔ́maan kí tòò ataŋkpee saalaa nì ali Jɔɔdan buŋŋu kansikin, dibɔbil din bisaraaŋaliibi yúl̀ee. Ní kpáaǹ-ŋi kí cáá bíĺ laakin ni làá dòon̄ kunyeeu neeyee.>»

⁴Niinee ní Joosuwa yíiń binib saalaa nì bili bin u yāntì Isirayeel yab lēē bi-kansikinee, kunaakoou kamaa poon unil ubɔ ubɔee ki kpáfì,

⁵ní ki bí-bi yii: «Ní lìntīmaan ti-Dindaan ni-Nimbɔtiu Poondi dakaau nyɔkɔpu kí kɔ́ Jɔɔdan buŋŋu kansikin, ní báà ŋma ń yòon̄ ditaŋkpal diba diba kí dūú bùkun̄ u-gbigbil pu, kí nóó nì Isirayeel yab naakɔti nyɔkɔm nín sá puee.

⁶An taŋkpeeŋee di làá nīn sá-ni kudaaŋŋu. Fool boon ni-biyaamu yaa láa bālifì-ni yii ba ní ataŋkpee nee sá ki tīī-nee,

⁷ní dāá kíí-bi yii: <Bi nín nìn túǹ ti-Dindaan Poondi dakaau ki dūtì Jɔɔdan buŋŋuee, mi-nyim nìn cúu yākatì mili ní. Ŋyunti ŋun bi nìn bíi dùtī nì Dipoondi dakaauee, nnyim nìn cúu yākatì ní bi jítì. An puee, ataŋkpee nee sá kí nīn téetí Isirayeel yab an bɔti ní kí nīn cáa cá jaanjaan.>»

⁸Ní Isirayeel yab lafun ŋá kii Joosuwa nín yóoǹ-bi yii bí ŋá puee. Bi nìn lēē ataŋkpee saalaa nì ali Jɔɔdan buŋŋu kansikin, kunaakoou kamaa ditaŋkpal diba, kii ti-Dindaan nín nìn tùkū Joosuwa yii bí ŋá puee, ní ki cáa cūnnì ki bíl̀ laakin bi nìn dōoǹ kunyeeu gbantee.

⁹Joosuwa nìn gíti yāntì bi tōō ataŋkpee saalaa nì ali aba mun ki cóoǹ Jɔɔdan buŋŋu kansikin, laakin bisaraaŋaliibi bin nìn tú Dipoondi dakaauee nìn yúl̀ee. Ataŋkpee gbanti dáá gbíntìi bí niin ki dāa sāā díǹ.

¹⁰Bisaraaŋaliibi bin nìn tú Dipoondi dakaauee nìn gbíntìi yú Jɔɔdan buŋŋu kansikin míǹ ní tin kɔkɔ ti-Dindaan yāntì Joosuwa tùkū Isirayeel yabee ŋá kii Mooyiisi nín nìn kpáafì Joosuwa yii ú ŋá puee. Boonee ní samaa kɔkɔ ŋá malaa ki dūtì.

¹¹Binib kɔkɔ nín dāa pée dūtì ki dóòyee ní bisaraaŋaliibi kpáaǹ ti-Dindaan Poondi dakaau ki dūtì ní ki jítìi tí līntì samaa nyɔkɔpu.

¹²Rubeen nì Gaadi naakɔti yab, nì Manasee naakooku yab dijandi diba nìn līntì Isirayeel yab kɔkɔ nyɔkɔpu, ki bóob́ dikɔ̀ndi, kii Mooyiisi nín nìn kpáafì-bi yii bí ŋá puee[7].

¹³Bijanjaliibi kii binib kutukub imuŋku ili nyɔkɔm di nìn dūtì Jɔɔdan buŋŋu, ki ŋúb́ tijanjawan ki còom̄ ti-Dindaan Poondi dakaau nimbiin ki cá Jeeriikoo tantakal watil pú kí cùú já kujaau.

¹⁴Ŋwiin gbantee, ti-Dindaan nìn yāntì Joosuwa nyáń diyindi tikpil Isirayeel yab nimbiin, ní bi nìn kíǹ ki tɔ́-u kii bi nín nìn tɔ́ Mooyiisi puee u-maŋfal wiiŋyi kɔkɔ poon.

¹⁵Boonee ti-Dindaan bí Joosuwa yii:

¹⁶«Tùkù bisaraaŋaliibi bin tú ti-Dindaan Poondi dakaauee yii bí nyānní Jɔɔdan buŋŋu poon.»

¹⁷Ní Joosuwa bí bisaraaŋaliibee yii: «Ní nyānnímaan Jɔɔdan buŋŋu poon!»

¹⁸Ŋyunti ŋun bisaraaŋaliibi bin tú ti-Dindaan Poondi dakaauee nyáń Jɔɔdan buŋŋunee, bi-tafati tin pée gbèetī kitiŋkuliŋŋee ní Jɔɔdan nyim fātìi kíĺ ki bíi pùub̀ kii mi nín pée kpààa pùub̀ puee, ní ki gbí ki bàn̄ abuŋgbán liitil.

¹⁹Uŋmapeepeekaa poon iwiin saalaa dal ní Isirayeel yab dūtì Jɔɔdan buŋŋu ní ki cūtìi kāl̀ laakin bi yíì yii Giilgaal, an bí Jeeriikoo tiŋki ŋwìiń nyalaŋki púee.

²⁰Giilgaal niin ní Joosuwa yāntì bi cóoǹ ataŋkpee ŋin bi kɔ́ Jɔɔdan buŋŋun ki tōōyee.

²¹Bi cóoǹ ki dóòyee ní u tùkū Isirayeel yab yii: «Fool boon ni-biyaamu yaa láa bālifì nimbi bibaatiibi yii ba taŋkpeeŋi sèéyee,

²²ní dāá lēē taapu kí tùkù-bi yii: <Isirayeel yab nìn dūtì Jɔɔdan buŋŋu ŋun dɔ̄ nee nì atakulim ní.>

²³Di sá yii ti-Dindaan ni-Nimbɔtiu yāntì Jɔɔdan buŋŋu nyim fóotì ni-nimbiin ní ni-kɔkɔ dūtì kii úǹ ti-Dindaan ni-Nimbɔtiu nín nìn yāntì Tikati mɔɔl nyim fóotì timbi nimbiin ki tin sāā ŋyunti ŋun ti-kɔ dūtèe[8].

²⁴U ŋá míǹ anibul ŋin bí kitiŋ puee kɔkɔ ń béé yii úǹ ti-Dindaan pɔŋŋu di sá mpɔŋkpaan, ní nimbi ń nīn fàŋkí-u kí nīn cáa cá jaanjaan!»