Read Ntcham Josué 6 Bible Online

Josué 6 - Ntcham bible

Josué 6

¹Isirayeel yab puee, Jeeriikoo yab nìn dū bi-tiŋki punyɔmmu ki pīiǹ ki kpàl̄. Báà ubɔ kaa nìn ŋūǹ kí kɔ́ɔɔ, kaa nìn ŋūǹ kí nyā mun.

²Ní ti-Dindaan bí Joosuwa yii: «Kpèè, m dū Jeeriikoo tiŋki nì ki-bɔtiu nì ki-baatandambi ki ŋá a-ŋaan.

³Sii nì a-janjaliibi ń còom̀ kí màntīí tū kitiŋ gbanti diba ŋwiin, kí nīn ŋáań míǹ kí tin sāā iwiin iluu.

⁴Bisaraaŋaliibi biluli ń nīn ŋúb́ ipijaa yiŋyi ki līī Dipoondi dakaau nyɔkɔpu. Ŋwinluluúti dalee, ní dāá còom̀ kí màntīí tū kitiŋ ŋfunyɔm miluli ní bisaraaŋaliibee ń dāá nīn búǹ iyin.

⁵Bi yaa láa búń upìja yiŋŋu ni gbìl̄ an súńee, samaa kɔkɔ ń dāá kúuǹ mpɔn mpɔn. Digundi din bi máń ki māntìi tú kitiŋee làá lítí niin niin. Niinee samaa kɔkɔ ń sāǹ kí kɔ́ kitiŋin, báà ŋma ń nīn pée túĺ u-nimbiin.»

⁶Ní Nuuni jipɔɔn Joosuwa yíiń bisaraaŋaliibi ki bí-bi yii: «Yòom̄maan Dipoondi dakaau kí bùkun̄ ní bisaraaŋaliibi biluli ń nīn ŋúb́ ipijaa yiŋyi ki līī ti-Dindaan dakaau nyɔkɔpu.»

⁷Ní u bí samaa yii: «Yīkìmaan kí còom̀ kí màntīí tū kitiŋ, bijanjaliibi bin lìntī nsanee ń lìntī ti-Dindaan dakaau nyɔkɔpu.»

⁸Joosuwa nín tùkū samaa yii bí ŋá puee, míǹ ní bi ŋá. Bisaraaŋaliibi biluli bin nìn ŋúb́ ipijaa yiŋyi ti-Dindaan nimbiinee līntì ki búǹ ní ti-Dindaan Poondi dakaau pá bi-boon.

⁹Bijanjaliibi bin lìntī nsanee līī bisaraaŋaliibi bin búǹ iyinee nyɔkɔpu, ní bijanjaliibi bin pāantí boonee pá Dipoondi dakaau boon. Ní báà ŋma còom̄ ki cá ní iyin búǹ.

¹⁰Ama ní Joosuwa kpáafì samaa yii: «Ní taa kúuǹ, kí taa yàntī bí gbìl̄ ni-neen pu. Báà dinyɔɔbundi ń taa nyā unil nyɔkɔn kí tin sāā ŋwiin ŋun m làá tùkù-ni yii ní kúuǹee, ní ní nín kúuǹ.»

¹¹Míǹ ní Joosuwa yāntì bi būkuǹ ti-Dindaan Poondi dakaau ki cōom̀ ki māntìi tú kitiŋee diba, ní ki fātìi gítì dinaapaal pu ki dōoǹ.

¹²Ku wúntì, Joosuwa fīntì kutaafaau pɔ̀lpɔlee ní ki yāntì bisaraaŋaliibi fātìi yōoǹ ti-Dindaan Poondi dakaau ki būkuǹ.

¹³Bisaraaŋaliibi biluli bin ŋúb́ ipijaa yiŋyee cōom̀ ki līntì Dipoondi dakaau nyɔkɔpu, ki pée búǹ iyinee. Bijanjaliibi bin lìntī nsanee līī bíǹ nyɔkɔpu, ní bin pāantí boonee pá ti-Dindaan dakaau boon. Ní bi còom̄ ki cá ní iyin búǹ!

¹⁴Ŋwinliliitee, bi tí cōom̀ ki māntìi tú kitiŋ diba ní ki fātìi nín gítí dinaapaal pu. Bi ŋáaǹ míǹ ní ki tin sāā iwiin iluu.

¹⁵Ŋwinluluúti dalee, bi péé ki yíkì ntaafaabɔmbɔmin ní ki cōom̀ ki māntìi tú kitiŋ, kii bi nín pée kpàà ŋáań puee miluli pu. Ŋwiin gbanti baba ní bi cōom̀ ki māntìi tú kitiŋ miluli.

¹⁶Bi nín māntì nluluútiim ní bisaraaŋaliibi búń iyinee, ní Joosuwa bí samaa yii: «Ní kúum̀maan, kun puee ti-Dindaan dū kitiŋ nee ki ŋá ni-ŋaan ní!

¹⁷Ní nàan̄ kitiŋ gbanti nì tin kɔkɔ pée bí ki-poonee kí dàkà yii tì kpántì ti-Dindaan wanti ubɔ kaa ti máaǹ kí gbēē! Asee Rakaab kinimpulaakpaai baba di làá ŋmátí, ní kí kūtì binib bin kɔkɔ pée bí u-cee kudiinee. Kun puee úǹ di nìn bál̀ binib bin ti lēē ki tú bi cūtì ki cɔ́ŋkì ki béè kitiŋee.

¹⁸Ama nimbee, ní nīn nyí nì ni-ba kí taa gbēē tin kpántì ti-Dindaan wantee, kí mèè mbusu ki tɔ́ Isirayeel yab kɔkɔ pu kí kɔ́ǹ-bi tibɔtin!

¹⁹Tin kɔkɔ pée sá animbil nì sindaariya nì tasa wanti nì tikúti wantee, ní dūú sú ti-Dindaan kí dū-tì kí kūtì u-wanti poon!»

²⁰Ní bisaraaŋaliibi búń iyin ní samaa kɔkɔ kúuǹ mpɔn. Ŋyunti ŋun samaa gbìl̄ iyin pu ki kúuǹ mpɔnee, ní digundi cúu wūtì. Niinee ní Isirayeel yab sáǹ ki nín jɔ́ḿ kitiŋin, báà ŋma túĺ u-nimbiin, ní bi jáń ki fōō kitiŋ.

²¹Bi kɔ́ mimmee ní ki kūū ki céetì tin kɔkɔ pée bí kitiŋee poon ki cáá kufoouee, an dàkà yii bininjab nì binimpoobi, binipɔmbi nì bitikpilib, inaa nì ipii nì mmamu. Bi nìn pée gāatì kɔkɔ nì ntàataajimu ní ki kūū.

²²Joosuwa tùkū bininjab bili bin u nìn lēē ki tú bi cūtìi cɔ́ŋkì ki béè kitiŋ nín bí puee yii: «Ní kɔ́maan kinimpulaakpaayee dumpu kí nyāntiń ki nì ki-yab kɔkɔ, kii ni nín nìn pūtì ki pōoǹ-kì puee!»

²³Ní binaacimpɔmbi bin nìn cūtì ki cɔ́ŋkì ki béè kitiŋee kɔ́ ki nyántìń Rakaab nì u-baa nì u-na, nì u-niijab nì u-nabiyaamu mun nìn bí u-ceeyee. Bi nyántìń bi-kɔkɔee ní ki cáań-bi ki kāaǹ Isirayeel yab naapaal kpaanceetiŋu tiba ń taa gbēē-bi.

²⁴Boonee ní bi sēē kitiŋee ŋŋmi ki kpáaǹ tin kɔkɔ bí ki-poonee. Asee animbil kúti nì sindaariya nì tasa wanti nì tikúti wanti ní bi nìn pée gāntì ki dūu kútì ti-Dindaan wanti tin bí u-diikunee pu.

²⁵Ama Joosuwa nìn fīī Rakaab kinimpulaakpaai ki kpáaǹ u-yab kɔkɔ. Rakaab gbíntì ki kāl̀ Isirayeel yab kansikin, ní u-naantiibi dáá gbíntìi kóò niin ki dāa sāā díǹ, kun puee úǹ di nìn bál̀ binib bin Joosuwa nìn lēē ki tú bi cūtìi cɔ́ŋkì ki béè Jeeriikoo tiŋkee.

²⁶Ŋyunti gbanti ní Joosuwa nìn pūtì ki lī yii: «Ti-Dindaan yindi puee, mbusu ń kɔ́ unil un kamaa yaa mākaǹ yii u làá fàtīí mā Jeeriikoo tiŋki neeyee. Udaan jipɔŋkpiliu ní u làá dūú kíĺ kitiŋ gbanti dimal, ní kí dū u-jipɔnjoolkaau kí cóoń ki-punuubi[14]!»

²⁷Míǹ ní ti-Dindaan nìn bí Joosuwa cee ní u-yindi nìn gbītì kitiŋ kɔkɔ poon.