Read Ntcham Josué 9 Bible Online

Josué 9 - Ntcham bible

Josué 9

¹Bibɔtiibi bin kɔkɔ nìn bí Jɔɔdan buŋgbandi ŋwìiń jeetilaŋki jandi pú ki kóò ntimu mun bí ajoon pu, Seefeelaa paalee, nì mun bí ki nóó nì Meediiteeranee tiŋkuu ki tin cáa sāā Leebanɔn tiŋki kɔkɔee nìn gbìl̄ tin jítì Aayi tiŋki puee. Niinee ní Eeti yab nì Amɔɔr yab nì Kanaan yab nì Peeriisi yab nì Eefi yab nì Jeebusi yab bɔtiibi

²kpáfì kinyɔkɔ ki yóoǹ yii bí cùú jáǹ Joosuwa nì Isirayeel yab.

³Gabawɔn tiŋki yab mun nìn gbìl̄ Joosuwa nín ŋá Jeeriikoo nì Aayi timmu puee.

⁴Ama bíǹ nìn ŋá nciin ŋubɔ. Bi nìn lēē binib ki tú Joosuwa cee. Binib bin bi nìn túee nìn nyàab̄ bifɔltɔkpikib bin cátì cátée, nì tidalɔti tin púĺ ki kpíì yɔ́si yɔsi bi fātìi ŋáĺ ŋáĺee ki bóob́ ki túǹ bi-mammu.

⁵Bi nìn dū anaatakakpiŋkpiki ŋin bi nìn kpáá miŋa nì miŋa puee ki táká, ki nyàab̄ ikpalcati ki pēeǹ. Kpɔnɔb bin bi ŋúb́ yii tijikaalee kūń ki pɔ́ɔkì kaŋkaŋ ní boon pùl̄ ki wíiḿ.

⁶Bi bɔ́ntì mimmee ní ki nín cá Joosuwa cee Giilgaal naapaal pu, ní ki bàn̄ ki bí u nì Isirayeel yab yii: «Ti nyánní kitiŋ kin dátèe ni ní. Ti là yii ní yàntī ti nì ni ń pùtī kí pòon̄ tɔb kí ŋá ubaanti.»

⁷Ní Isirayeel yab kíí Eeti yab gbanti yii: «An yaa yíì ni kóò ki pìlīǹ-ti ní, mana ní ti nì ni ŋūǹ kí pùtī kí pòon̄ tɔb kí ŋá ubaanti?»

⁸Ní bi bí Joosuwa yii: «Timbi sá a-tɔntɔnliibi ní!» Niinee ní Joosuwa bālifì-bi yii: «Ni sá la ní? La ní ni nyánní?»

⁹Ní bi kíí-u yii: «Timbi a-tɔntɔnliibi gbìl̄ ti-Dindaan a-Nimbɔtiu pu ní, di sá ti yíkìń kitiŋ kin dátì tikpilee ni ki cōom̀ ki dāa bāań doo. Tiŋman, ti gbìl̄ bi sòon̄ u-bɔti, ki gbìl̄ tin kɔkɔ u ŋáaǹ Eejipiti tiŋkinee.

¹⁰Ti gbìl̄ tin u ŋá Amɔɔr yab bɔtiibi bili bin nìn kóò Jɔɔdan buŋgbandi ŋwìiń nyalaŋki púee mun, an dàkà yii Eesbɔn bɔtiu Siiwɔn nì Baasan bɔtiu Ɔɔgi un nìn kóò Asitarooti tiŋkinee.

¹¹Ti-tindaŋkpilib nì ti-tiŋki nib kɔkɔ nín gbìl̄ tibɔti gbantee ní bi bí-ti yii tí bɔ́ntí tijin tin ti làá nīn jīǹ nsannee kí dāá tūŋkì-ni. Ti yaa bāań ki ká-nee, tí tùkù-ni yii ti sá ni-tɔntɔnliibi ní. Ti là yii ní yàntī ti nì ni ń pùtī kí pòon̄ tɔb kí ŋá ubaanti!

¹²Ti-kpɔnɔb bin ti ŋúbiń nee, ŋwiin ŋun ti nìn dū-bi ki ŋá ti-waŋguliŋi poon ki kālìń nsan pu kí nīn dòoń ni-cee dooyee, bi nìn dáá pée tùm̀ ní ki pɔ̀fì làblab. Kpèèmaan kɔŋkɔnnee bi nín kūń ki wíiḿ ki wúkul̀ puee!

¹³Tidalɔti nee, ti nín nìn kpíliń-tì ndaamee, tì nìn dáá pée pɔ̀ɔǹ ní kílkil. Ní kpèè kɔŋkɔnnee tì nín cátì cátì puee! Ti-wampeeŋkaati nì ti-naatakaŋ nee nín kpíì kpíì pu nee, nsan ŋun ti cōomìńee dandatiŋu di yì-tì ní an ŋá míǹ!»

¹⁴Niinee ní Isirayeel yab kíí ki fōō binibee jinti tin bi lēē ki tīī-bee, kaa bālifì ti-Dindaan ki wāatì.

¹⁵Joosuwa nìn kíí ŋgbansɔŋfi ń nīn bí bi-kansikin, ní u nì bi pūtì ki pōoǹ tɔb kí ŋá ubaanti ú yàntī bí nīn bí dimaŋfalin. Isirayeel yab tindaŋkpilib nìn pūtì ki pōoǹ-bi yii án làá ŋá míǹ.

¹⁶Isirayeel yab nì Gabawɔn yab nín pūtì ki poon tɔb kí ŋá ubaantee, iwiin ita boon ní bi gbìl̄ yii bi sá bi-kɔŋkɔnnaatɔb, ki pée kóò ki pìlīǹ-bi niin.

¹⁷Di sá yii Isirayeel yab yíkì niin ki nìkī bi-saŋkindee ní ki dūu bàn̄ binib gbanti timmun ŋwintataati dal. Bi-timmu gbanti di sá Gabawɔn nì Keefiira nì Beerooti nì Kiiriyati-Yeeyariim.

¹⁸Ama Isirayeel yab kaa nìn kūū-bi, kun puee bi-tindaŋkpilib nìn gíti dáá pūtì ti-Dindaan Isirayeel Nimbɔtiu ki pōoǹ binib gbanti yii baa làá kpɔ̀-bi. Ní Isirayeel yab kɔkɔ pée kíǹ ki gbùkum̄ ki wòoǹ bi-tindaŋkpilib.

¹⁹Ní bitindaŋkpilib sòon̄ nì Isirayeel samaau kɔkɔ yii: «Ti gíti dáá pūtì ti-Dindaan Isirayeel Nimbɔtiu ki pōoǹ-bi yii ti làá fīī bi-maŋfal, an puee taa ti ŋūǹ kí gbēē-bi.

²⁰Ti nín làá ŋá puee di sá ti làá yàntī bí nīn bí, ní ti-Dindaan ŋuul ń taa jēetí ti-pu, dipoondi din ti pūtì ki pōoǹ-bee pu.»

²¹Isirayeel tindaŋkpilib nìn bí-bi yii bí yàntī bí nīn bí, ama ní kí nīn là idɔ ki lúù nnyim ki tìì Isirayeel samaau kɔkɔ.

²²Ní Joosuwa yíiń-bi ki sòon̄ nì bi yii: «Ba ŋá ní ni mɔ́ntì-ti yii ni nyánní ndandati, kaa nyí yii ni pée kóò ki pìlīǹ-ti doo nee?

²³Too, ni dáaĺ mbusu ki tɔ́ ni-ba pu ní nee! Kí yòon̄ díǹ kí nīn cée, ni-kɔkɔ làá nīn pée sá iyumbu ní kí nīn cáa cá jaanjaan. Nimbi di làá nīn kíǹ ki là idɔ ki lúù nnyim ki cāabìń man Nimbɔtiu diikun.»

²⁴Ní bi kíí Joosuwa yii: «Bi máafì timbi a-tɔntɔnliibi miŋa nì miŋa pu yii ti-Dindaan a-Nimbɔtiu nìn kpáafì u-tɔntɔnliu Mooyiisi yii ú dū kitiŋ nee kɔkɔ kí tīī-ni ní ní kpɔ̀ kí céetí ki-nib kɔkɔ. Ti gbìl̄ mimmee ní ki fāŋkì tikpil yii ní taa kpɔ̀-ti. An pu ní ti ŋá min ti ŋá nee.

²⁵Kɔŋkɔnnee ti dū ti-ba ki ŋá a-ŋaan. Min ní sii yaa dākafì yii an kítì ki ŋān̄ á ŋá-tee, ŋá míǹ!»

²⁶Míǹ ní Joosuwa fīī binib gbanti Isirayeel yab ŋaan ní baa kūū-bi.

²⁷Ŋwiin gbanti ní Joosuwa yāntì bi kíǹ ki là idɔ ki lúù nnyim ki tìì Isirayeel samaau, ní ki cāabìń ti-Dindaan saraafaŋŋu pu ki dāa sāā díǹ pu nee, laakin kamaa ní ti-Dindaan yaa lēē bí nīn jáaḿ-uee.