Read Ntcham 2 Thessaloniciens 2 Bible Online

2 Thessaloniciens 2 - Ntcham bible

2 Thessaloniciens 2

¹Nnabiyaamu, ti-Dindaan Yeesu Kriisitoo làá gítiń ní ti làá dāá kóoǹ kí kpāfì u-cee. Tibɔti gbanti puee, tin ti cáá kí kpāafì-nee sɔ̀[4].

²Ní taa yàntī ni-pɔbiliŋ ń bīil̀ binib nín lì yii ti-Dindaan gbanti pūtì kpáàa bāańee pu. Báà ubɔ di yaa bí yii u fōō Unimbɔti cee tibɔti ní ki nāatì-naaa, ubɔ di yaa tí bí yii tibɔti àá kugbɔŋu ní u fōō ti-cee kí dūú nàatī-nee, ní taa fōō kí kíí.

³Ní taa pée yàntī ubɔ ń dī tiba pu kí ŋmàtiǹ-ni. See binib ń dāá fá Unimbɔti ní utɔŋfiti un ti-Dindaan làá dāá nàan̄ee ń nyā kí jī mpaan, kí wàatī ní ti-Dindaan wiiŋŋu ń nín bàń.

⁴Utɔŋfitee kaa dāa kíikí binib ń nóó Unimbɔtaaa, kaa dāa kíikí bí jāam̀ tiba nì tiba. U làá dāá yíí kí mɔ̄tì míǹ ní kí tin kpáàa kɔ́ kí kàl̄ kunimbɔtidiin ní kí dū u-ba kí gíiǹ Unimbɔti[5].

⁵Naa téetí yii m nín nìn dáá bí ni-ceeyee, m nìn tùkū-ni an bɔtaaa?

⁶Ama tiba di dáá ŋúb́-u ní an bɔtee kaa láá bíi ŋáań kɔŋkɔnnee. Ni mun nyí kudɔŋu kun dáá ŋúb́-uee. An puee, see utɔŋfitee yuntiŋu yaa láa bàn̄ee ní ú nín nyā kí jī mpaan.

⁷U-pɔŋŋu bí dibalin ki bíi tūǹ ditundi dooooyee. Ama un ŋúb́-uee yaa láa búntèe,

⁸niinee ní utɔŋfitee ń nyā, ní ti-Dindaan ń dāá púfí-u ní ú kpú, ní u-dāantam nín dāa jìl̀ puee ń nàan̄-u[6].

⁹Utɔŋfitee làá dāá dāan̄ nì Sitaan pɔŋŋu ní ki ŋáań maamaacib kɔkɔ nì tidaandi nì tinyimɔŋkpaŋkpantiil[7].

¹⁰U dāa cáá tin pée sá ikpitee ki kíiĺ bin wáŋkèe, kun puee bi yíì kaa néeń ibaamɔn in bàà ŋūǹ kí fīī-bee.

¹¹An pu ní Unimbɔti dū mpɔn ŋun làá yàntī bí gáatée ki tīiń-bi án nín làá ŋá pu bí nīn nóó tinyimɔmbɔtee.

¹²Míǹ puee Unimbɔti làá dāá dáaĺ bin yíì kaa fōō ibaamɔn ki kíí ki néeń ikpitee tafal.

¹³Nnabiyaamu, ti làá nīn pée jáaḿ Unimbɔti ni-pu ní baabadal, nimbi bin ti-Dindaan néeńee. Di sá yii Unimbɔti péé ki lútì-ni ki fīī-ni nì u-Fam min yāntì ni kpántì u-yabee nì ni nín fōō ibaamɔn ki kííyee pu.

¹⁴Míǹ pu ní Unimbɔti dī Tibɔmɔntiil tin ti sòoǹ nì ni nee pu ki yíiń-ni ní nīn cáá ti-Dindaan Yeesu Kriisitoo nyooti.

¹⁵Míǹ puee nnabiyaamu, tibɔti tin ti cáań ki dàkà-ni nee, ní nīn ŋúb́-tì an píkí. An yaa sá tin ti sòon̄ kinyɔkɔneeyaaa, an yaa tí sá tin ti ŋmàn̄-neeyaaa, ní kpāafìmaan-tì tiŋan.

¹⁶Ti-Dindaan Yeesu Kriisitoo u-ba nì ti-Baa Unimbɔti un néeń-ti ki ŋá-ti tiŋan ki tīī-ti dipɔɔsɔŋkil din kaa cáá dikúntilee nì dimákamɔntiilee,

¹⁷ń gbéeǹ ni-pɔbiliŋ kunyannyaau kí tīī-ni mpɔn ní ŋmā kí nīn ŋáań tin ŋān̄ee ni-tuuŋŋi nì ni-bɔsoontam poon.