Read Ntcham 2 Thessaloniciens 3 Bible Online

2 Thessaloniciens 3 - Ntcham bible

2 Thessaloniciens 3

¹Nnabiyaamu, m-bɔjoolkaati sèé: ní nīn mèé ti-pu, án nín làá ŋá pu Unimbɔti bɔti ń gbìtī kí bà ntimu poon malaa malaa, kí nīn cáá tinyool kii an nín ŋá ni-cee miŋyee.

²Ní mèè ti-pu, án nín làá ŋá pu Unimbɔti ń nyāntí-ti binikpitib nì bitɔŋfitiibi ŋaanee, kun puee an kaa sá binib kɔkɔ di fòol̄ Unimbɔti bɔti ki kíikí.

³Ama ti-Dindaan sá ibaamɔndaan ní. U làá yàntī ní nīn ŋúb́ an pɔ̄ɔ̄, kí mɔ̄tì ni-pu Sitaan ukpiti ń taa ŋmā-ni[8].

⁴Ti-Dindaan puee, ti cáá ni-pu dimákal ki béè mbaamɔn yii tin ti dàkā-nee, ni bíi ŋáań míǹ, ki làá nīn gbíntì ki ŋáań míǹ ki cá.

⁵Ti-Dindaan ń yàntī ní béé ni-pɔbiliŋ poon Unimbɔti neendi nì Kriisitoo nín tìì kimɔtii kiŋyee.

⁶Nnabiyaamu, nì ti-Dindaan Yeesu Kriisitoo yindi puee, ní gàntīmaan nnabiyaamu mun di sá biwutijoodambi kaa là kí ŋá min ní ti dàkà-nee.

⁷Nimbi ni-ba nyí ni nín máaǹ kí fōō min timbi ŋáańee, kun puee ti nín nìn bí ni-ceeyee, taa nìn sá biwutijoodambi.

⁸Taa dɔ́miń ki kā ubɔ pu u kpīintí-ti fám. Ama kí taa nín̄ kā ubɔ pu udaan ń nīn kpīintí-tee puee, ti nìn tūǹ ditundi ní ŋwiimpu nì kunyeeu ki gì[9].

⁹Ti nín nìn bí ki ŋáań mimmee, an kaa sá yii taa nìn cáá nsan kí fōō ni-jikaati, ama ti ŋá míǹ ki dàkā-ni ní fōō min timbi ŋáańee ní.

¹⁰Di sá ti nín nìn bí ni-ceeyee, ti nìn tùkū-ni tibɔti tiba yii: «Un kaa là kí tɔ̄ ditundee kaa máaǹ kí jī mun[10].»

¹¹Kun puee ti gbìl̄ yii ni-kansikin biba sá biwutijoodambi ki kā kaa ŋáań diba ní ki cáǹ bi-ba ki kɔ̄ntí bi-jutiibi bɔtin.

¹²Nì ti-Dindaan Yeesu Kriisitoo yindi puee, ti tùkù ki kpáafí an nibee yii bí tɔ̄ ditundi nì dipɔɔsɔŋkil poon kí kpíiǹ bi-ba.

¹³Ama nimbee, nnabiyaamu, ní taa yàntī tiŋan diŋál.

¹⁴Un di yaa kaa tɔ́ tibɔti tin ti ŋmàn̄-ni kugbɔŋu nee poonee, ní dáań-u, ni nì u ń taa ti nín̄ nōotí, icoo ń kɔ́-u.

¹⁵Ní taa nín dū-u kí kpántí ni-nannanliu ní, ama ní sāŋkì-u kii unil nín sáŋkí u-nabiki tibɔti puee.

¹⁶Ti-Dindaan un tìì ŋgbansɔŋfee u-ba ń tīī-ni ŋgbansɔŋfi ŋyunti kamaa nì tikɔkɔ poon. Ti-Dindaan ń nīn bí ni-kɔkɔ cee.

¹⁷Ijaam nee, man Pɔɔl m-ba ŋal di ŋmàn̄. M-gbɔnti kɔkɔ poonee, m nín nyìitī m-ŋal puee dee. Kpèèmaan m-ŋmaŋmabiti dee.

¹⁸Ti-Dindaan Yeesu Kriisitoo ŋanti ń nīn bí ni-kɔkɔ pu.