Read Ntcham 1 Timothée 1 Bible Online

1 Timothée 1 - Ntcham bible

1 Timothée 1

¹Man Pɔɔl, un sá Yeesu Kriisitoo kpambal din Unimbɔti ti-Fiiliu nì Yeesu Kriisitoo un pu ti mákée túnnée di ŋmàn̄ kugbɔŋu nee.

²M ŋmàn̄-ku kí tīī sii Tiimootee[1] un sá m-ba bindi pu jipɔɔn a nín fōō Yeesu Kriisitoo ki kííyee puee ní. Ti-Baa Unimbɔti nì ti-Dindaan Yeesu Kriisitoo ń ŋá-si tiŋan, kí sɔ̄ a-saai, kí tīī-si ŋgbansɔŋfi.

³Ŋyunti ŋun m làá nìn yīkì kí nīn cá Maseeduwaanee, m nìn tùkū-si yii á nīn kā Eefeesi[2] kí pìin̄ bin bí niin ki dàkà tinyimɔmbɔtee nsan bí taa ti dàkà. Á nīn ŋáań míǹ,

⁴ki dàkà-bi bí taa nín̄ kā ki máafí mmaam ki kàaǹ atiŋkpikiyin[3] ŋin kaa dóotée. An cāabìń kunikpɔŋkpɔkɔu, kaa tútúǹ unil ń béé Unimbɔti nín yóoǹ puee: an dàkà yii tí fōō-u kí kíí.

⁵Kun pu ní a kpáafí-bi mimmee di sá a là bí nīn cáá dineendi din nyēeń dipɔɔnyaandinee ní, bi-landɔkɔjaatiŋu ń nīn sá mmɔnti bi-fookiiu ń nīn bá ki pɔ̄ɔ̄.

⁶Biba dū an saŋŋuee ki fá, ní ki cūtìi kɔ́ tibɔfan tin kaa cáá taapuee ni.

⁷Bi bàà là kí nīn dàkà binib Unimbɔti marab, ama nì min kɔkɔ bi dàkà nì mpɔnee, bíǹ biba kaa gbìl̀aaa, kaa nyí tibɔti tin bi sòoǹee taapu.

⁸Ti nyí yii marab sá tiwammɔntiil ní, a yaa dū marab gbanti ki ŋá min sá á dūú ŋée.

⁹Ti nyí yii an kaa sá binimɔntiibi pu ní bi yóoǹ marab, an sá bin gáatèe, nì bin yiliŋ pɔ̄ɔ̄yee, nì bin kaa tɔ́ Unimbɔtee, nì bikpitiŋaliibi, nì binib bin kaa là Unimbɔtee, nì bin bíiĺ Unimbɔti wantee, nì bin kù bi-baabi nì bi-nabee, nì binikpɔliibi,

¹⁰nì bin ŋáań tilaakpaalee, nì bin dɔ̀ nì bi-ninjajutiibee, nì bin nyáfí binibee, nì binyimɔndambi, nì bin pùtī fám fámee, nì bin kɔkɔ ŋáań tin jáà nì ibaamɔn bɔti tin bi dàkà-tee pu ní bi yóoǹ marab.

¹¹Tinyool Nimbɔtiu un bí mmɔnnee Bɔmɔntiiti tin u dūu ŋá m-ŋaanee poon ní tin m sòon̄ ki tīī-ni nee kā.

¹²M jáaḿ ti-Dindaan Yeesu Kriisitoo un di tīī-mi mpɔn ki cáá m-pu dimákal yii ḿ tɔ̄ u-tundee.

¹³Nì min kɔkɔ m nìn sòoǹ u-pu min kaa kítèe ki sàantí u-yab ki wɔ́b̀-bee, Unimbɔti súń m-saai, kun puee maa nìn fōō Yeesu ki kíí, kaa nìn nyí yii m bíi yìntī[4].

¹⁴Ti-Dindaan ŋá-mi tiŋan tikpil ki yāntì m fōō ki kíí, ní ki tīī-mi dineendi din nyēeń Yeesu Kriisitoo ceeyee.

¹⁵Tibɔti nee sá mbaamɔn ní ki máaǹ báà ŋma ń fōō-tì kí kíí mmɔntiimin. Di sá yii Yeesu Kriisitoo dɔ́miń duulinya nee ni kí fīī binikpitib, binikpitibee kansikinee man di sá unikpitikpaan.

¹⁶Ama ní Unimbɔti súń m-saai ki yāntì Yeesu Kriisitoo dī man unikpitikpaan pu ki dàkā u-mɔtiiki nín wīikí min bulifee, án nīn sá kudaaŋŋu kí tīī bin làá dāá fōō-u kí kíí foolboon kí ká dimaŋfal din kaa kúntée.

¹⁷An puee, bí tīī Unimbɔti un bí talku, kaa kúù, baa wālifí-uee jilma nì tinyool. Úǹ baba di sá Unimbɔti, kí nīn cá abin abin! Ameeni.

¹⁸Sii m-biki Tiimootee, m dū tibɔti nee ki ŋá a-ŋaan. Kii tibɔti tin bi nìn fōō Unimbɔti cee a-pu dooooyee ki dūu nāatèe, á tɔ́kɔń tibɔtee pu kí já kujamɔntiiu.

¹⁹Á nīn gbíntìi ŋúb́ tin a nìn fōō ki kííyee kí nīn cáá nlandɔkɔmɔnti. Biba fá nlandɔkɔmɔnti ní bi-fookiiu ŋá fám.

²⁰Ti kāntí binib gbanti kansikinee Imeenee nì Aleekisandir, bin m dū ki líiǹ Sitaan[5], án nín làá ŋá pu án cíiǹ-bi bí béé kí taa nín̄ gíti sòoǹ ki bíiĺ Unimbɔtee.