Read Ntcham 1 Timothée 2 Bible Online

1 Timothée 2 - Ntcham bible

1 Timothée 2

¹Tibɔpeepeekaal tin m kpáafí bí ŋée di sá bí nīn mèé ki gbàam̄ ki jáaḿ Unimbɔti binib kɔkɔ pu.

²Bí nīn mèé bibɔtiibi nì biyidambi kɔkɔ pu, án nín làá ŋá pu tiba ń taa páb́-ti, tí nīn bí nsɔŋfin kí nīn nóó Unimbɔti mmɔntiimin kí lafun nín̄ sá binimɔntiibee.

³Á mèè kí tīī binibee ŋān̄ Unimbɔti ti-Fiiliu cee,

⁴kun puee u là yii binib kɔkɔ ń ká difiil[6] kí béé ibaamɔn.

⁵Di sá yii Unimbɔti sá ubaanti, ní ugbaamil un yú timbi binib nì Unimbɔti kansikinee mun sá ubaanti, úǹ di sá Yeesu Kriisitoo un kpántì unilee.

⁶U dū u-ba ki tīī ki pàn̄ ti-kɔkɔ pu ki fōō-ti ki líì[7]. U ŋá míǹ ki dàkā yii Unimbɔti là binib kɔkɔ ń ká difiil ŋyunti ŋun u síiǹee ní.

⁷Ní Unimbɔti dū-mi ki ŋá un sòoǹ u-bɔtee nì u-kpambal[8], ḿ nīn dàkà bin kaa sá Juuda yabee u-bɔti tin sá ibaamɔnee bí fōō kí kíí. Tin m lì nee sá ibaamɔn ní, maa mɔ́ntí.

⁸An puee, m là yii, báà laakiŋyee, bininjab ń yòon̄ bi-ŋalii yilpu[9] kí nīn mèé, bi-pɔbiliŋ poon ń nīn bí circir, bí taa nín̄ cáá diŋuul nì kunikpɔŋkpɔkɔu.

⁹M là yii binimpoobi mun ń nīn pèentí tiwan min kítèe, kí taa nín̄ nyāantí bi-ba ki gíti lákatí, kí taa nín̄ dàkà bi-ba, bi-yikpibóobitam ń taa nín̄ nyēē mbamin. Bí taa nín̄ cáá sindaariya nì abeedimbil wanti ki nyāantí bi-ba, kí taa nín̄ pèentí tiwan tin pɔ̄ɔ̄ kudaauee[10].

¹⁰Ama bí nīn tūǹ atummɔnti ŋin máaǹ binimpoobi bin bí yii bi nóó Unimbɔtee tuuŋŋee.

¹¹Bi yaa bíi dàkà Unimbɔti bɔtee, binimpoobi ń sìntī bi-ba taapu kí nīn ŋmí.

¹²Maa pūǹ nsan yii binimpoobi ń nīn dàkà bininjab, kí taa nín̄ wɔ́b̀ bininjab, bi máaǹ kí nīn kā soooo ní.

¹³Di sá yii Adam ní Unimbɔti péé péé ki náań, boonee ní ki nín náań Awa mun.

¹⁴An kaa tí sá Adam ní Sitaan ŋmātiǹ, u-nimpuu ní Sitaan ŋmātiǹ, ní u yīntì Unimbɔti marau[11].

¹⁵Ama ní u-maaliŋu puee, u yaa gbíntì ki pɔ̄ɔntí u-fookiiu poon nì dineendi kí nīn bí circir kí taa nín̄ dàkà u-bee, u làá dāá ká difiil.