Read Ntcham 1 Timothée 4 Bible Online

1 Timothée 4 - Ntcham bible

1 Timothée 4

¹Unimbɔti Fam lī ki cántì yii, iyuntijoolkaa poonee, binib biba làá dāá fá nnimbɔtisan ní ki kíǹ ki tɔ́ arasiniibi bin kíiĺ binibee, ní ki nóó bi-dàkatam.

²Mpoonnyoondambi bin mɔ́ntí binib, bi-pɔbiliŋ tīlifèe di làá dāá yàntī bí gáatí.

³Bi dāa yíití yii an kaa ŋān̄ unil ń cáá unimpu, ní ki kòó tijin tiba, tijikaal tin Unimbɔti nyántì yii bin fōō Yeesu ki kíí ki nyí ibaamɔn kɔkɔee ń mèè kí jāam̀ Unimbɔti ní kí jēe.

⁴Tin kɔkɔ Unimbɔti náańee ŋān̄ ní[14], tiba kaa sá tí dūú fá. Tí fōō tin kɔkɔ bée kí jāam̀ Unimbɔti.

⁵Unimbɔti bɔti nì ŋwimmeem yàntī tijin ń kpántí timɔntiil ní u-nimbiin.

⁶A yaa dū tibɔti nee ki dàkā ti-nabiyaamuee, a kpántí Yeesu Kriisitoo tɔntɔmmɔntiu, ní kí nīn cáá nnimbɔtisan bɔti nì didàkamɔntiil din a nóó tiŋanee ki kpīintí a-ba.

⁷Á fá mmaam min nyáń mi-ba nì nnimbɔtisan bɔti ki sá tibɔfanee, kí pɔ́ɔǹ a-ba kí mɔ̀tīí nóó Unimbɔti mbaamɔmin.

⁸A yaa sáń ki kpàtī a-giiŋyee, an tútúǹ-si fiii, ama á nóó Unimbɔti mmɔntiiminee di tútúǹ tikɔkɔ poon, kun puee an pòontí-si dimaŋfal kɔŋkɔnnee ki kpáaǹ foolboon.

⁹Tibɔti nee di sá ibaamɔn ki máaǹ báà ŋma ń fōō-tì kí kíí.

¹⁰Kun pu ti tūǹ ditundi ki gì ki bí kujaau poonee di sá ti dū ti-mákal ki ŋá Unimbɔti un bí kaa kúùyee ni, Unimbɔti un fìil̄ binib kɔkɔee: kí cántée, bin fōō Yeesu ki kííyee ní an sá.

¹¹Á dàkà binib tibɔti nee kɔkɔ kí yàntī bí ŋá míǹ.

¹²Á taa yàntī bí kpèè kí sìŋkīǹ-si yii a nín sá kinaacimpɔmbikee pu. Ama á nīn sá un bin fōō Yeesu ki kííyee làá nīn kpèé ki ŋáań min a ŋáańee, kí fōō a-sòontam nì a-bimbim nì a-neendi nì a-fookiiu nì a-circir bítam.

¹³Kí wàatī ḿ nín dāan̄ee, á dū a-ba kí tīī Unimbɔti gbɔŋku dikàandi binib cee, kí nīn sòoǹ ki tìì-bi kunyannyaau, ki dàkà-bi Unimbɔti bɔti.

¹⁴Mpɔn ŋun Unimbɔti nìn pú-si ŋyunti ŋun bi nìn fōō a-pu Unimbɔti cee tibɔti ki nāatì, ní Kriisitoo nikitil kpilib dū bi-ŋalii ki páaǹ a-puee, ŋu bí a-ni. Á dū-ŋu kí tɔ̄ ditundi.

¹⁵Á taa gbīiliǹ ditundi gbanti. Á dū a-ba kɔkɔ kí kúntí di-poon, án nín làá ŋá pu báà ŋma ń ká a nín cá nyɔkɔpu miŋyee.

¹⁶Á nīn nyí nì a-ba bítam nì tin a dàkèe, kí cúú an píkí. A yaa lafun ŋá míǹ, a làá fīī a-ba, kí kpáàa fīī bin pílifíǹ-see mun.