Read Ntcham 1 Timothée 6 Bible Online

1 Timothée 6 - Ntcham bible

1 Timothée 6

¹Iyumbu máaǹ kí nīn tɔ́ i-dindambi nì i-pɔbiliŋ kɔkɔ. Mimmee binib kaa sòoǹ kí bīil̀ Unimbɔti yindi nì tibɔti tin ti dàkèe.

²Iyumbu in dindambi nóó Kriisitooyee, í taa kpèè-bi fám, yii bi nín sá i-nabiyaamuee pu. Míǹ gba ní i nín máaǹ kí nīn tūǹ ditundi mmɔntiimin, kun puee bin i tūǹ ditundi ki tììyee sá i-nabineeŋkaamu mun nóó Kriisitooyee ní. Min a máaǹ kí nīn dàkà binib ki kpáafí-bee sèé.

³Ubɔ yaa bíi dàkà tinyimɔmbɔti tiba, ki yíì, kaa nóó ti-Dindaan Yeesu Kriisitoo baamɔmbɔti nì bi nín dàkā-ti unil nín máaǹ kí nīn bí min Unimbɔti nimbiinee,

⁴udaan lámintí, kaa nyí tiba. Udaan būǹ tibɔti weeŋyi ní ki kpákà anyɔɔbun pu. An di cāabìń nnimbidiki, kujaau, asiibil, nì ilandɔkɔkpiti bi-jutiibi pu.

⁵Baa ti dàkafī nnimɔntiyaamin, baa ti nyí ibaamɔn, ki kpākantí tɔb an kaa kúntí. Bi nyí kii nnimbɔtisan sá laakin bi làá dī kí ká tigaajatee ní.

⁶Tiŋman, nnimbɔtisan lafun sá tigaajakpaandi ní, ŋyunti ŋun ní an mɔ̄ǹ-si tin a cááyee puee.

⁷Ti dɔ́miń duulinya nee ni nì iŋaŋkulim ní, míǹ ní ti làá dāá fàtīí tí gítí nì iŋaŋkulim.

⁸Míǹ puee, ti yaa cáá kun ti làá jēe nì kun ti làá pèen̄ee, án ŋmàntīǹ-tee.

⁹Ama bin nimbiliŋ máǹ tigaajati puee làá kɔ́ icɔŋkin kí lítí, ní nnimbitaataam tiwan tikpil pu min kaa cáá taapu ki cāabìń diwaŋkilee sàtī-bi kii kutaliŋŋuee. An di téekí binib ki cáǹ asaluun ki nàantí-bi.

¹⁰Di sá yii nnimbineel di cāabìń mbusub kɔkɔ. Biba nín néeń animbil puee, bi dū nnimbɔtisan ki fá ki dū bi-ba ki kɔ́ǹ dinimbinaamandin tikpil.

¹¹Ama sii Unimbɔti niliu, nyā tíǹ kɔkɔn, kí nyàab̀ kí nīn bí deedee, kí ŋúb́ dinimbɔtinool, kí nīn cáá fookii, kí nīn cáá dineendi nì kimɔtii, kí nīn mɔ̄.

¹²Á já kujamɔntiiu kun sá fookii jaakuee, kí cúú dimaŋfal din kaa kúntée. Di sá yii tíǹ pu ní Unimbɔti yíiń-si á béé-ŋu ŋyunti ŋun a nìn sòon̄ a nín fōō ki kíí kunipaau nimbiin miŋyee.

¹³Unimbɔti un tìì tiwan kɔkɔ dimaŋfalee nimbiin, nì Yeesu Kriisitoo un nìn sòon̄ ibaamɔn Pɔnsi Piilati[19] cee mmɔntiimee mun nimbiin ní m kpáafí-si.

¹⁴Á kpèè tibɔti tin m ŋúbiǹ-si nee tiŋan kí taa yìntī. Bí taa ká a-pu tikpitil tiba kí nīn cí ŋyunti ŋun ti-Dindaan Yeesu Kriisitoo làá dāá páannée.

¹⁵Ŋyunti ŋun Unimbɔti yóoǹee yaa láa bāańee, ní ú yàntī Yeesu ń páanní. Úǹ di sá nnaam nyeel ní ki sá tikɔkɔ Dindaan, bibɔtiibi kɔkɔ Bɔtiu nì bidindambi kɔkɔ Dindaan[20].

¹⁶Úǹ baba di kaa kúù, ki kóò ŋwalifi ŋun ubɔ kaa ŋūǹ kí sútí kí pìl̄ee ni. Báà unil kaa láá ká-u, ní kaa tí ŋūǹ kí ká-u[21]. Úǹ di máaǹ tinyool nì mpɔn kí nīn cá jaanjaan! Ameeni.

¹⁷Á kpāafì bin cáá tigaajati duulinya nee nee yii bí taa nín̄ cáá dilambil, kí taa nín̄ máká bi-gaajati tin kaa làá nīn bí ki cá jaanjaanee pu[22]. Ama bí dū bi-mákal kí ŋá Unimbɔti un di pūǹ-ti tikɔkɔ nì tikɔkɔ tikpil tikpil tí nīn bí mmɔnnee ni.

¹⁸Bí nīn ŋáań tiŋan. Bi-gaajawanti nín wīikí puee, bi-tummɔntiiŋi mun ń nīn wīikí míǹ, bí nīn cáá tiniti ki yàkatī tin bi cááyee nì bin kíǹee.

¹⁹Bi yaa ŋá mimmee, bi kōontí tigaajamɔntiil tin kaa bíiĺee ki sīintí án nīn dɔ̄ ki cí-bi foolboon dee[23], ní bí ŋmā kí ká ibaamɔn maŋfal.

²⁰Sii Tiimootee, kpāafì tin Unimbɔti tīī-see tiŋan, kí gɔ́ntí tibɔfan tin kaa nàaǹ nì nnimbɔtisanee, kí taa cèeǹ a-nyɔkɔ bin bí yii bi cáá iciin kin kaa cááyee nikpɔŋkpɔkɔku poon.

²¹Di sá biba nìn bí yii bíǹ di nyí dinyil gbanti ní ki dāa dū nnimbɔtisan ki fá. Kriisitoo ŋanti ń nīn bí ni-pu.